ਘਰੇਲੂ ਹਿੰਸਾ ਦੀ ਸ਼ਿਕਾਇਤ ‘ਚ ਯੁਵਰਾਜ ਦਾ ਨਾਮ ਵੀ ਦਰਜ

ਕ੍ਰਿਕਟਰ ਯੁਵਰਾਜ ਸਿੰਘ ਦੀ ਭਰਜਾਈ ਆਕਾਂਸ਼ਾ ਸ਼ਰਮਾ ਨੇ ਘਰੇਲੂ ਹਿੰਸਾ ਦੀ ਸ਼ਿਕਾਇਤ ‘ਚ ਉਸ ਦਾ ਨਾਮ ਵੀ ਲਿਆ ਹੈ। ਯੁਵਰਾਜ ਸਿੰਘ ਦੇ ਛੋਟੇ ਭਰਾ ਜ਼ੋਰਾਵਰ ਸਿੰਘ ਅਤੇ ਮਾਂ ਸ਼ਬਨਮ ਸਿੰਘ ਖ਼ਿਲਾਫ਼ ਦਿਮਾਗੀ ਅਤੇ ਵਿੱਤੀ ਤੌਰ ‘ਤੇ ਤਸੀਹੇ ਦੇਣ ਤਹਿਤ ਕੇਸ ਦਰਜ ਕਰਵਾਇਆ ਗਿਆ ਹੈ। ਇਥੋਂ ਦੀ ਅਦਾਲਤ ਨੇ ਯੁਵਰਾਜ ਸਿੰਘ ਅਤੇ ਉਸ ਦੇ ਪਰਿਵਾਰ ਨੂੰ ਨੋਟਿਸ ਜਾਰੀ ਕਰਕੇ 21 ਅਕਤੂਬਰ ਤਕ ਜਵਾਬ ਮੰਗਿਆ ਹੈ ਜਦੋਂ ਕੇਸ ਦੀ ਪਹਿਲੀ ਸੁਣਵਾਈ ਸ਼ੁਰੂ ਹੋਵੇਗੀ। ਆਕਾਂਸ਼ਾ ਨੇ ਦੋਸ਼ ਲਾਇਆ ਕਿ ਸਹੁਰਾ ਪਰਿਵਾਰ ਉਸ ਨੂੰ ਬੱਚਾ ਪੈਦਾ ਕਰਨ ਲਈ ਦਬਾਅ ਬਣਾ ਰਿਹਾ ਸੀ। ਉਸ ਨੇ ਕਿਹਾ ਕਿ ਯੁਵਰਾਜ ਦਾ ਨਾਮ ਸ਼ਿਕਾਇਤ ‘ਚ ਇਸ ਲਈ ਸ਼ਾਮਲ ਕੀਤਾ ਗਿਆ ਹੈ ਕਿਉਂਕਿ ਜ਼ਿਆਦਤੀ ਵੇਲੇ ਉਹ ਸਿਰਫ਼ ਮੂਕ ਦਰਸ਼ਕ ਬਣਿਆ ਰਿਹਾ ਅਤੇ ਪਰਿਵਾਰ ਨੂੰ ਰੋਕਿਆ ਤਕ ਨਹੀਂ। ਇਕ ਟੀਵੀ ਚੈਨਲ ਨੇ ਆਕਾਂਸ਼ਾ ਦੇ ਹਵਾਲੇ ਨਾਲ ਕਿਹਾ ਹੈ ਕਿ ਸਹੁਰੇ ਘਰ ‘ਚ ਉਸ ਦਾ ਕਦੇ ਵੀ ਅਜਿਹਾ ਦਿਨ ਨਹੀਂ ਗੁਜ਼ਰਿਆ ਜਦੋਂ ਉਹ ਰੌਂਦੇ ਹੋਏ ਬਿਸਤਰ ‘ਤੇ ਨਾ ਪੈਂਦੀ ਹੋਵੇ। ਇਸ ਮਾਮਲੇ ਦੀ ਜਾਂਚ ਐਸਡੀਐਮ ਜਾਂ ਮਹਿਲਾ ਪੁਲੀਸ ਅਧਿਕਾਰੀ ਵੱਲੋਂ ਕੀਤੀ ਜਾਵੇਗੀ ਜੋ ਅਦਾਲਤ ਮੂਹਰੇ ਰਿਪੋਰਟ ਜਮ੍ਹਾ ਕਰਾਉਣਗੇ। ਆਕਾਂਸ਼ਾ ਦੀ ਵਕੀਲ ਸਵਾਤੀ ਸਿੰਘ ਨੇ ਇਕ ਵੈੱਬਸਾਈਟ ਨੂੰ ਦੱਸਿਆ ਕਿ ਜਦੋਂ ਯੁਵਰਾਜ ਅਤੇ ਜ਼ੋਰਾਵਰ ਦੀ ਮਾਂ ਵੱਲੋਂ ਆਕਾਂਸ਼ਾ ‘ਤੇ ਬੱਚਾ ਪੈਦਾ ਕਰਨ ਲਈ ਦਬਾਅ ਬਣਾਇਆ ਜਾ ਰਿਹਾ ਸੀ ਤਾਂ ਯੁਵਰਾਜ ਨੇ ਵੀ ਆਪਣੀ ਮਾਂ ਦੀ ਹਾਂ ਨਾਲ ਹਾਂ ਮਿਲਾਈ।