ਫ਼ਰੀਦਕੋਟ ( ਜਗਦੀਸ਼ ਬਾਂਬਾ ) ਇਸਤਰੀ ਜਾਤੀ ਦੇ ਸਨਮਾਨ ਨੂੰ ਲੈ ਕੇ ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਆਗੂਆਂ ਨੇ ਗੰਭੀਰਤਾ ਦਿਖਾਉਂਦਿਆਂ ਦੇਸ਼ ਦੇ ਪ੍ਰਧਾਨ ਮੰਤਰੀ ਮੋਦੀ ਵਿਰੁੱਧ ਸੁਪਰੀਮ ਕੋਰਟ ‘ਚ ਜਨ ਹਿੱਤ ਪਟੀਸ਼ਨ ਪਾਉਣ ਦਾ ਐਲਾਨ ਕੀਤਾ ਹੈ। ਇਹ ਜਾਣਕਾਰੀ ਦਿੰਦਿਆਂ ਪਾਰਟੀ ਦੇ ਸੂਬਾਈ ਸਪੋਕਸਮੈਨ ਜਸਵਿੰਦਰ ਸਿੰਘ ਸਿੱਖਾਂਵਾਲਾ ਨੇ ਕਿਹਾ ਕਿ ਨੇਤਾ ‘ਤੇ ਖਾਸ ਕਰ ਕੇ ਦੇਸ਼ ‘ਤੇ ਰਾਜ ਦੇ ਪ੍ਰਮੁੱਖ ਅਹੁਦਿਆਂ ‘ਤੇ ਬੈਠੇ ਵਿਅਕਤੀ ਨੌਜਵਾਨ ਪੀੜੀ ਲਈ ਆਦਰਸ਼ ਰੋਲ ਮਾਡਲ ਹੁੰਦੇ ਹਨ,ਇਸ ਸਮੇਂ ਉਨਾਂ ਨਾਲ ਡਬਲਜੀਤ ਸਿੰਘ ਧੌਂਸੀ, ਸਤਿੰਦਰ ਸਿੰਘ ਸੱਤਾ ਤੇ ਜਸਪਾਲ ਸਿੰਘ ਭੱਟੀ ਮੌਜੂਦ ਸਨ।
ਜਸਵਿੰਦਰ ਸਿੱਖਾਂਵਾਲਾ ਨੇ ਕਿਹਾ ਕਿ ਨੌਜਵਾਨ ਦੇਸ਼ ਦੇ ਆਗੂਆਂ ਤੋਂ ਸੇਧ ਲੈ ਕੇ ਆਪਣੀ ਜ਼ਿੰਦਗੀ ਵਿਚ ਉਨਾਂ ਦੀ ਰੀਸ ਕਰਦੇ ਹਨ ਪਰ ਦੇਸ਼ ਦੇ ਪ੍ਰਧਾਨ ਮੰਤਰੀ ਤੋਂ ਨੌਜਵਾਨ ਜੇ ਸੇਧ ਲੈਣਗੇ, ਉਹ ਔਰਤ ਜਾਤੀ ਦੇ ਸਨਮਾਨ ਨੂੰ ਠੇਸ ਪਹੁੰਚਾਉਣ ਵਾਲੀ ਹੋਵੇਗੀ ਕਿਉਂਕਿ ਉਨਾਂ ਯਸ਼ੋਦਾਬੇਨ ਨਾਲ ਵਿਆਹ ਕਰਵਾ ਕੇ ਨਾ ਉਸ ਨੂੰ ਰਵਾਇਤ ਅਨੁਸਾਰ ਅਪਣਾਇਆ ਤੇ ਨਾ ਹੀ ਕਾਨੂੰਨੀ ਤੌਰ ‘ਤੇ ਤਲਾਕ ਦਿੱਤਾ ਹੈ,ਉਨਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਵਰਗੇ ਉੱਚ ਅਹੁਦੇ ‘ਤੇ ਬੈਠੇ ਵਿਅਕਤੀ ਤੋਂ ਨੌਜਵਾਨ ਪੀੜੀ ਕਿਸ ਤਰਾਂ ਦੀ ਆਸ ਰੱਖ ਸਕਦੀ ਹੈ,ਉਨਾਂ ਪ੍ਰਧਾਨ ਮੰਤਰੀ ਮੋਦੀ ਨੂੰ ਅਪੀਲ ਕੀਤੀ ਕਿ ਉਹ 15 ਦਿਨਾਂ ਦੇ ਅੰਦਰ-ਅੰਦਰ ਭਾਰਤੀ ਸੰਸਕ੍ਰਿਤੀ ਨੂੰ ਅਪਣਾਉਂਦਿਆਂ ਸਤਿਕਾਰ ਸਹਿਤ ਆਪਣੀ ਪਤਨੀ ਨੂੰ ਘਰ ਲੈ ਕੇ ਆਉਣ ਜਾਂ ਫ਼ਿਰ ਕਾਨੂੰਨੀ ਤੌਰ ‘ਤੇ ਤਲਾਕ ਲਈ ਚਾਰਾਜੋਈ ਸ਼ੁਰੂ ਕਰ ਦੇਣ,ਉਨਾਂ ਚਿਤਾਵਨੀ ਦਿੱਤੀ ਕਿ ਅਜਿਹਾ ਨਾ ਹੋਣ ਦੀ ਸੂਰਤ ਵਿਚ ਉਹ ਇਸਤਰੀ ਜਾਤੀ ਦੇ ਸਨਮਾਨ ਲਈ ਸੁਪਰੀਮ ਕੋਰਟ ਦਾ ਸਹਾਰਾ ਲੈਣਗੇ।