ਟਰਾਂਟੋ:- ਕੰਸਰਵੇਟਿਵ ਪਾਰਟੀ ਦੀ ਅੰਤਿਰਿਮ ਲੀਡਰ ਸਤਿਕਾਰਯੋਗ ਰੌਨਾ ਐੰਬਰੋਜ਼ ਨੂੰ ਇਕ ਪੱਤਰ ਲਿਖ ਕੇ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਕੈਨੇਡਾ ਦੇ ਪ੍ਰਧਾਨ ਸੁਖਮਿੰਦਰ ਸਿੰਘ ਹੰਸਰਾ ਨੇ ਐਮ ਪੀ ਦੀਪਕ ਓਬਰਾਇ ਵਲੋਂ ਸਿੱਖ ਜੈਨੋਸਾਈਡ ਦੇ ਮੋਸ਼ਨ ਦੀ ਕੀਤੀ ਅਲੋਚਨਾ ਤੇ ਕਾਰਵਾਈ ਦੀ ਮੰਗ ਕੀਤੀ ਹੈ। ਹੰਸਰਾ ਨੇ ਬੀਬੀ ਐਂਬਰੋਜ਼ ਕੋਲ ਟਰਾਂਟੋ ਨਗਰ ਕੀਰਤਨ ਦੌਰਾਨ ਇਹ ਮੁੱਦਾ ਉਠਾਇਆ ਸੀ, ਜਿਸ ਤੇ ਆਗੂ ਬੀਬੀ ਨੇ ਇਸ ਬਾਰੇ ਚਿੱਠੀ ਰਾਹੀਂ ਜਾਣਕਾਰੀ ਦੀ ਮੰਗ ਕੀਤੀ ਸੀ। ਬੀਬੀ ਆਗੂ ਨੇ ਇਹ ਵੀ ਕਿਹਾ ਸੀ ਉਸ ਕੋਲ ਪਹਿਲਾਂ ਵੀ ਇਸ ਬਾਰੇ ਇਤਰਾਜ਼ ਆ ਚੱੁਕੇ ਹਨ।
ਇੱਕ ਮਈ ਨੂੰ ਲਿਖੀ ਚਿੱਠੀ ਵਿੱਚ ਹੰਸਰਾ ਨੇ ਦੱਸਿਆ ਕਿ ਸੂਬੇ ਦੀ ਅਸੰਬਲੀ ਵਿੱਚ ਫਰੀ ਵੋਟ ਰਾਹੀਂ ਪਾਸ ਹੋਇਆ ਮਤਾ ਇੱਕ ਕਨੇਡੀਅਨ ਐਮ ਪੀ ਮਸਲਾ ਕਿਉਂ ਬਣ ਗਿਆ ਹੈ। ਐਮ ਪੀ ਦੀਪਕ ਉਬਰਾਇ ਨੇ ਉਨਟਾਰੀਓ ਅਸੰਬਲੀ ਵਿੱਚ ਪਾਸ ਹੋਏ ਮੋਸ਼ਨ (ਐਮ 46) ਖਿਲਾਫ ਪ੍ਰੈਸ ਰੀਲੀਜ਼ ਜਾਰੀ ਕਰਕੇ ਇਸਦਾ ਵਿਰੋਧ ਕਰਦਿਆਂ ਕਿਹਾ ਕਿ ਇਸ ਨਾਲ ਖਾਲਿਸਤਾਨੀ ਤੱਤਾਂ ਨੂੰ ਬੜਾਵਾ ਮਿਲੇਗਾ। ਹੰਸਰਾ ਨੇ ਕਿਹਾ ਕਿ ਇੱਕ ਕਨੇਡੀਅਨ ਐਮ ਪੀ ਨੇ ਕੈਨੇਡਾ ਦੀ ਲੋਕਤੰਤਰੀ ਕਦਰਾਂ ਕੀਮਤਾਂ ਨੂੰ ਛਿੱਕੇ ਟੰਗਦਿਆਂ ਭਾਰਤ ਸਰਕਾਰ ਨਾਲ ਆਪਣੇ ਮੋਹ ਦਾ ਪ੍ਰਗਟਾਵਾ ਕੀਤਾ ਹੈ। ਕਿਸੇ ਵੀ ਕਨੇਡੀਅਨ ਐਮ ਪੀ ਨੂੰ ਕਿਸੇ ਬਾਹਰਲੇ ਦੇਸ਼ ਦਾ ਪਿਆਰ ਆਪਣੇ ਤੱਕ ਸੀਮਤ ਰੱਖਣਾ ਚਾਹੀਦਾ ਹੈ। ਇਹ ਕੈਨੇਡਾ ਹੈ ਇਥੇ ਐਮ ਪੀ ਜਾਂ ਆਮ ਆਦਮੀ ਦੇ ਅਧਿਕਾਰ ਬਰਾਬਰ ਹਨ। ਜਦਕਿ ਇੱਕ ਕਨੇਡੀਅਨ ਐਮ ਪੀ ਵਾਸਤੇ ਕਦਰਾਂ ਕੀਮਤਾਂ ਦੇ ਪਹਿਰਾਂ ਦੇਣਾ ਉਸਦਾ ਮੁੱਢਲਾ ਕਰਮ ਖੇਤਰ ਹੈ। ਹੰਸਰਾ ਨੇ ਕੰਸਰਵੇਟਿਵ ਆਗੂ ਤੋਂ ਮੰਗ ਕੀਤੀ ਹੈ ਕਿ ਉਹ ਇਸ ਮਸਲੇ ਨੂੰ ਕਾਕਸ ਮੀਟਿੰਗ ਵਿੱਚ ਵਿਚਾਰੇ ਅਤੇ ਮੈਂਬਰ ਖਿਲਾਫ ਢੱੁਕਵੀਂ ਕਾਰਵਾਈ ਕਰੇ।
