ਕਬੱਡੀ ਤੇ ਹਾਕੀ ਖੇਡਾਂ ‘ਤੇ ਆਧਾਰਤ ਫ਼ਿਲਮਾਂ ਵਿਚ ਕੰਮ ਕਰਨ ਦੀ ਇੱਛਾ : ਦਿਲਜੀਤ ਦੁਸਾਂਝ

ਨਵੀਂ ਦਿੱਲੀ, 15 ਜੁਲਾਈ : ਪੰਜਾਬੀ ਅਦਾਕਾਰ ਦਿਲਜੀਤ ਦੁਸਾਂਝ ਦਾ ਕਹਿਣਾ ਹੈ ਕਿ ਉਹ ‘ਦੇਸੀ’ ਖੇਡਾਂ ਕਬੱਡੀ ਅਤੇ ਹਾਕੀ ‘ਤੇ ਆਧਾਰਤ ਫ਼ਿਲਮਾਂ ਵਿਚ ਕੰਮ ਕਰਨਾ ਚਾਹੁੰਦੇ ਹਨ। ਦਿਲਜੀਤ ਨੇ ਦਸਿਆ, ”ਅਪਣੇ ਦੇਸੀ ਖੇਡ ਕਬੱਡੀ ਅਤੇ ਹਾਕੀ ‘ਤੇ ਆਧਾਰਤ ਕਿਸੇ ਫ਼ਿਲਮ ਵਿਚ ਮੈਂ ਕੰਮ ਕਰਨਾ ਚਾਹੁੰਦਾ ਹਾਂ। ਮੈਨੂੰ ਲਗਦਾ ਹੈ ਕਿ ਮੈਂ ਇਹ ਖੇਡ ਖੇਡ ਸਕਦਾ ਹਾਂ ਅਤੇ ਇਨ੍ਹਾਂ ਨਾਲ ਨਿਆਂ ਕਰ ਸਕਦਾ ਹਾਂ। ਜੇਕਰ ਇਕ ਚੰਗੀ ਕਹਾਣੀ ਮਿਲਦੀ ਹੈ ਤਾਂ ਯਕੀਨਨ ਮੈਂ ਇਸ ਵਿਚ ਕੰਮ ਕਰਾਂਗਾ। ਮੈਨੂੰ ਪਤਾ ਹੈ ਕਿ ਅਜਿਹੀ ਫ਼ਿਲਮ ਵਿਚ ਕੰਮ ਕਰਨ ਵਿਚ ਮੈਨੂੰ ਮਜ਼ਾ ਆਵੇਗਾ।” ‘ਉੜਤਾ ਪੰਜਾਬ’ ਵਿਚ ਅਪਣੀ ਭੂਮਿਕਾ ਨਾਲ ਹਿੰਦੀ ਦਰਸ਼ਕਾਂ ਵਿਚ ਅਪਣੀ ਥਾਂ ਬਣਾਉਣ ਵਾਲੇ 32 ਸਾਲਾ ਅਦਾਕਾਰ ਸਟਾਰ ਸਪੋਰਟਸ ਪ੍ਰੋ ਕਬੱਡੀ ਦੇ ਬਰਾਂਡ ਅੰਬੈਸਡਰ ਵੀ ਹਨ। ‘ਸਰਦਾਰ ਜੀ 2’ ਫ਼ਿਲਮ ਦੇ ਸਟਾਰ ਦਾ ਮੰਨਣਾ ਹੈ ਕਿ ਭਾਰਤੀ ਖੇਡ ਨੂੰ ਵੱਡੇ ਪੱਧਰ ‘ਤੇ ਉਤਸ਼ਾਹਤ ਕਰਨ ਦੀ ਲੋੜ ਹੈ ਅਤੇ ਅਜਿਹੇ ਵਿਚ ਉਹ ਖੇਡ ਦਾ ਚਿਹਰਾ ਬਣ ਕੇ ਸਾਹਮਣੇ ਆਏ ਹਨ।