ਕਠੁਆ ਗੈਂਗਰੇਪ ਮਾਮਲਾ: ਹੇਠਲੀ ਅਦਾਲਤ ਦੀ ਕਾਰਵਾਈ ’ਤੇ ਸੁਪਰੀਮ ਕੋਰਟ ਦੀ ਰੋਕ
ਇਹ ਸਣਵਾਈ ਪੀੜਤਾ ਦੇ ਪਿਤਾ ਦੀ ਅਰਜ਼ੀ ’ਤੇ ਸੀ। ਉਨ੍ਹਾਂ ਨੇ ਕਠੂਆ ਤੇ ਜੰਮੂ ਦੇ ਮਾਹੌਲ ਨੂੰ ਸੁਣਵਾਈ ਲਈ ਠੀਕ ਨੇ ਦੱਸਦਿਆਂ ਕੇਸ ਨੂੰ ਚੰਡੀਗੜ੍ਹ ਟਰਾਂਸਫਰ ਕਰਨ ਦੀ ਮੰਗ ਕੀਤੀ ਹੈ। ਸੁਣਵਾਈ ਦੌਰਾਨ ਵਿਰੋਧੀ ਪੱਖ ਦੇ ਵਕੀਲ ਨੇ ਇਸ ਮੰਗ ਦਾ ਵਿਰੋਧ ਕਰਨਾ ਸ਼ੁਰੂ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਸੁਪਰੀਮ ਕੋਰਟ ਕੋਈ ਵੀ ਫ਼ੈਸਲਾ ਲੈਣ ਤੋਂ ਪਹਿਲਾਂ ਸਾਰੇ ਮੁਲਜ਼ਮਾਂ ਦੀਆਂ ਦਲੀਲਾਂ ਸੁਣੇ। ਅਦਾਲਤ ਨੇ ਇਸ ਨੂੰ ਮੰਨਦਿਆਂ ਸਾਰੇ 8 ਮੁਲਜ਼ਮਾਂ ਨੂੰ ਜਵਾਬ ਦਾਖ਼ਲ ਕਰਨ ਦੀ ਇਜਾਜ਼ਤ ਦੇ ਦਿੱਤੀ।
ਇਸ ਦੇ ਨਾਲ ਹੀ ਦੋ ਮੁਲਜ਼ਮਾਂ ਦੀ ਵਕੀਲ ਹਰਵਿੰਦਰ ਚੌਧਰੀ ਨੇ ਸੂਬਾ ਪੁਲਿਸ ਦੀ ਜਾਂਚ ਵਿੱਚ ਕਮੀਆਂ ਗਿਣਾਉਂਦਿਆਂ ਮਾਮਲਾ CBI ਨੂੰ ਸੌਂਪਣ ਦੀ ਮੰਗ ਰੱਖ ਦਿੱਤੀ। ਜਨਹਿੱਤ ਪਟੀਸ਼ਨਕਰਤਾ ਵਜੋਂ ਖੜ੍ਹੀ ਵਕੀਲ ਅਨੁਜਾ ਕਪੂਰ ਨੇ ਵੀ ਇਸ ਮੰਗ ਦਾ ਸਮਰਥਨ ਕੀਤਾ।
ਸੁਣਵਾਈ ਦੌਰਾਨ ਸੂਬਾ ਸਰਕਾਰ ਦੇ ਵਕੀਲ ਸ਼ੋਏਬ ਆਲਮ ਨੇ ਕਿਹਾ ਕਿ ਕੇਸ ਨੂੰ ਚੰਡੀਗੜ੍ਹ ਟਰਾਂਸਫਰ ਕਰਨ ਨਾਲ ਉਸ ਦੀ ਸੁਣਵਾਈ ਵਿੱਚ ਵਿਵਹਾਰਿਕ ਮੁਸ਼ਕਲਾਂ ਆਉਣਗੀਆਂ। ਉਨ੍ਹਾਂ ਕਿਹਾ ਕਿ ਜੰਮੂ-ਕਸ਼ਮੀਰ ਵਿੱਚ ਅਪਰਾਧਿਕ ਕਾਨੂੰਨ ਬਾਕੀ ਦੇਸ਼ ਨਾਲੋਂ ਵੱਖਰਾ ਹੈ। ਉਨ੍ਹਾਂ ਸੂਬਾ ਪੁਲਿਸ ਵੱਲੋਂ ਕੀਤੀ ਜਾਂਚ ਦਾ ਸਮਰਥਨ ਕਰਦਿਆਂ ਕਿਹਾ ਕਿ ਜੰਮੂ-ਕਸ਼ਮੀਰ ਇਸ ਕੇਸ ਦੀ ਨਿਗਰਾਨੀ ਕਰ ਰਿਹਾ ਹੈ।
