ਜੈਪੁਰ (ਏਜੰਸੀਆਂ) ਇਥੋਂ ਦੀ ਨੈਸ਼ਨਲ ਇੰਵੈਸਟੀਗੇਸ਼ਨ ਏਜੰਸੀ (ਐਨ. ਆਈ. ਏ.) ਦੀ ਸਪੈਸ਼ਲ ਕੋਰਟ ਨੇ ਅਜਮੇਰ ਦਰਗਾਹ ਧਮਾਕਾ ਮਾਮਲੇ ‘ਚ ਆਪਣਾ ਫੈਸਲਾ ਸੁਣਾ ਦਿੱਤਾ ਹੈ। ਕੋਰਟ ਨੇ ਇਸ ਮਾਮਲੇ ‘ਚ 3 ਨੂੰ ਦੋਸ਼ੀ ਕਰਾਰ ਦਿੱਤਾ ਹੈ, ਜਦੋਂ ਕਿ 5 ਨੂੰ ਬਰੀ ਕਰ ਦਿੱਤਾ ਗਿਆ ਹੈ। ਕੋਰਟ ਤੋਂ ਆਰ. ਐਸ. ਐਸ. ਨੇਤਾ ਇੰਦਰੇਸ਼ ਕੁਮਾਰ ਨੂੰ ਕਲੀਨ ਚਿਟ ਮਿਲ ਗਈ ਹੈ। ਸਵਾਮੀ ਅਸੀਮਾਨੰਦ ਨੂੰ ਵੀ ਬਰੀ ਕਰ ਦਿੱਤਾ ਗਿਆ ਹੈ। ਭਾਵੇਸ਼ ਅਤੇ ਦੇਵੇਂਦਰ ਗੁਪਤਾ ਨੂੰ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ। ਮ੍ਰਿਤਕ ਸੁਨੀਲ ਜੋਸ਼ੀ ਨੂੰ ਵੀ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ।
ਸਵਾਮੀ ਅਸੀਮਾਨੰਦ, ਦੇਵੇਂਦਰ ਗੁਪਤਾ, ਚੰਦਰਸ਼ੇਖਰ ਲੇਵੇ, ਮੁਕੇਸ਼ ਵਾਸਨਾਨੀ, ਲੋਕੇਸ਼ ਸ਼ਰਮਾ, ਹਰਸ਼ਦ ਭਾਰਤ, ਮੋਹਨ ਰਾਦਿਸ਼ਵਰ, ਸੰਦੀਪ ਡਾਂਗੇ, ਰਾਮਚੰਦ ਕਲਸਾਰਾ, ਭਾਵੇਸ਼ ਪਟੇਲ, ਸੁਰੇਸ਼ ਨਾਇਰ ਅਤੇ ਮੋਹੁਲ ਇਸ ਧਮਾਕੇ ਮਾਮਲੇ ‘ਚ ਦੋਸ਼ੀ ਸਨ। ਇਕ ਦੋਸ਼ੀ ਸੁਨੀਲ ਜੋਸ਼ੀ ਦਾ ਕਤਲ ਹੋ ਚੁੱਕਾ ਹੈ। ਉਥੇ ਦੋਸ਼ੀਆਂ ‘ਚੋਂ ਸੰਦੀਪ ਡਾਂਗੇ ਅਤੇ ਰਾਮਚੰਦ ਕਲਸਾਰਾ ਅਜੇ ਤੱਕ ਗਾਇਬ ਹਨ। ਜ਼ਿਕਰਯੋਗ ਹੈ ਕਿ 11 ਅਕਤੂਬਰ 2007 ਦੀ ਸ਼ਾਮ ਤਕਰੀਬਨ ਸਵਾ 6 ਵਜੇ ਅਜਮੇਰ ਦਰਗਾਹ ਧਮਾਕਾ ਹੋਇਆ ਸੀ। ਇਸ ਧਮਾਕੇ ‘ਚ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਸੀ, ਜਦੋਂ ਕਿ 15 ਲੋਕ ਜ਼ਖਮੀ ਹੋਏ ਸਨ। ਇਸ ਮਾਮਲੇ ‘ਚ ਕੁਲ 184 ਲੋਕਾਂ ਦੇ ਬਿਆਨ ਦਰਜ ਕੀਤੇ ਗਏ, ਜਿਸ ‘ਚ 26 ਮਹੱਤਵਪੂਰਨ ਗਵਾਹ ਆਪਣੇ ਬਿਆਨਾਂ ਤੋਂ ਪਲਟ ਗਏ ਸਨ।