ਭਾਰਤੀ-ਅਮਰੀਕੀ ਸੈਨੇਟ ਉਮੀਦਵਾਰ ਦੇ ਮੂੰਹ ‘ਤੇ ਮੁੱਕਾ ਮਾਰਿਆ

ਨਿਊਯਾਰਕ,- ਅਮਰੀਕਾ ‘ਚ ਇਕ ਭਾਰਤੀ ਸੈਨੇਟ ਉਮੀਦਵਾਰ ਦੇ ਮੁੱਕਾ ਮਾਰਨ ਦੀ ਖ਼ਬਰ ਸਾਹਮਣੇ ਆਈ ਹੈ। ਮੀਡੀਆ ‘ਚ ਆਈਆਂ ਖ਼ਬਰਾਂ ਅਨੁਸਾਰ ਸੈਨੇਟ ਦੇ ਭਾਰਤੀ ਮੂਲ ਦੇ ਇਕ ਅਮਰੀਕੀ ਉਮੀਦਵਾਰ ‘ਤੇ ਵਿਰੋਧੀ ਉਮੀਦਵਾਰ ਦੇ ਨਸਲਵਾਦੀ ਸਮਰਥਕ ਨੇ ਮੈਸਾਚੁਸਿਟਸ ਦੇ ਇਕ ਟਾਊਨ ਹਾਲ ‘ਚ ਹਮਲਾ ਕਰਦਿਆਂ ਉਸ ਦੇ ਮੂੰਹ ‘ਤੇ ਮੁੱਕਾ ਮਾਰ ਦਿੱਤਾ, ਜਿਸ ਕਾਰਨ ਉਸ ਦੇ ਨੱਕ ‘ਚੋਂ ਖੂਨ ਨਿੱਕਲਣ ਲੱਗ ਗਿਆ। ‘ਬੋਸਟਨਡਾਟਕਾਮ’ ਦੀ ਇਕ ਖ਼ਬਰ ਦੇ ਅਨੁਸਾਰ 54 ਸਾਲਾ ਸ਼ਿਵਾ ਅਯਾਦੁਰਈ ਡੈਮੋਕ੍ਰੇਟਿਕ ਪਾਰਟੀ ਦੀ ਸ਼ਕਤੀਸ਼ਾਲੀ ਉਮੀਦਵਾਰ ਐਲਿਜ਼ਾਬੈੱਥ ਵਾਰੇਨ ਿਖ਼ਲਾਫ਼ ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਲੜ ਰਹੇ ਹਨ ਤੇ ਵਾਰੇਨ ਦੇ ਨਸਲਵਾਦੀ ਸਮਰਥਕ ਜਿਸ ਦਾ ਨਾਂਅ ਪੌਲ ਸੋਲੋਵੇ ਹੈ, ਨੇ ਉਸ ‘ਤੇ ਹਮਲਾ ਕਰ ਦਿੱਤਾ। ਅਯਾਦੁਰਈ ਉਚ ਕੋਟੀ ਦੇ ਵਿਗਿਆਨਕ ਤੇ ਆਲੋਚਕ ਹਨ। ਉਨ੍ਹਾਂ ਟਵੀਟ ਕਰਦਿਆਂ ਲਿਖਿਆ ਕਿ ਵਾਰੇਨ ਦੇ ਇਕ ਨਸਲਵਾਦੀ ਸਮਰਥਕ ਨੇ ਹੁਣੇ ਉਸ ਨੂੰ ਮੁੱਕਾ ਮਾਰ ਦਿੱਤਾ ਹੈ। ਉਨ੍ਹਾਂ ਲਿਖਿਆ ਕਿ ਇਹ ਵਿਸ਼ੇਸ਼ ਅਧਿਕਾਰ ਪਾਉਣ ਵਾਲੇ ਗੋਰੇ ਲੋਕ ਕਾਲੇ ਲੋਕਾਂ ਨਾਲ ਅਜਿਹਾ ਕਰਦੇ ਹਨ। ਇਕ ਵੀਡੀਓ ‘ਚ ਦੇਖਿਆ ਗਿਆ ਕਿ ਜਦ ਦੋਵੇਂ ਆਹਮੋ-ਸਾਹਮਣੇ ਆਉਂਦੇ ਹਨ ਤਾਂ ਅਯਾਦੁਰਈ ਨੂੰ ਧੱਕਾ ਵੱਜਣ ਤੋਂ ਪਹਿਲਾਂ ਉਹ ਸੋਲੋਵੇ ਨੂੰ ਸਪੀਕਰ ਰਾਹੀਂ ਵਾਰ-ਵਾਰ ਨਸਲਵਾਦੀ ਕਹਿੰਦਾ ਹੈ। ਸੋਲੋਵੇ ਜਿਸ ‘ਤੇ ਕੁੱਟਮਾਰ ਤੇ ਹੋਰ ਦੋਸ਼ ਲਗਾਏ ਗਏ ਸਨ, ਨੂੰ ਦੱਖਣੀ ਬਿਰਕਸ਼ਾਇਰ ਜ਼ਿਲ੍ਹਾ ਅਦਾਲਤ ‘ਚ ਦੋਸ਼ੀ ਨਹੀਂ ਪਾਇਆ ਗਿਆ ਅਤੇ ਉਸ ਨੂੰ ਵਿਅਕਤੀਗਤ ਪਹਿਚਾਣ ‘ਤੇ ਰਿਹਾਅ ਕਰ ਦਿੱਤਾ ਗਿਆ।