ਕੋਲਕਾਤਾ:-ਨੋਟਬੰਦੀ ਦੇ ਇਕ ਮਹੀਨੇ ਬਾਅਦ ਦੇਸ਼ ਦੇ ਲੋਕਾਂ ਵਿੱਚ ਵਿੱਤੀ ਅਸੁਰੱਖਿਆ ਦੀ ਭਾਵਨਾ ਪੈਦਾ ਹੋਣ ਦਾ ਦਾਅਵਾ ਕਰਦਿਆਂ ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੇ ਅੱਜ ਕਿਹਾ ਕਿ ਪ੍ਰਧਾਨ ਮੰਤਰੀ ਨੂੰ ਦੇਸ਼ ਸਾਹਮਣੇ ਸਥਿਤੀ ਜ਼ਰੂਰ ਸਪੱਸ਼ਟ ਕਰਨੀ ਚਾਹੀਦੀ ਹੈ ਅਤੇ ਇਸ ਦੀ ਪੂਰੀ ਜ਼ਿੰਮੇਵਾਰੀ ਲੈਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਇਕ ਮਹੀਨਾ ਪ੍ਰੇਸ਼ਾਨੀ, ਦਰਦ, ਨਾਉਮੀਦੀ, ਵਿੱਤੀ ਅਸੁਰੱਖਿਆ ਅਤੇ ਅਫਰਾ-ਤਫਰੀ ਵਾਲਾ ਰਿਹਾ ਹੈ।
ਨੋਟਬੰਦੀ ਵਿਰੁੱਧ ਖੁੱਲ੍ਹ ਕੇ ਖੜ੍ਹੀ ਮਮਤਾ ਬੈਨਰਜੀ ਨੇ ਕਿਹਾ ਕਿ ਇਕ ਮਹੀਨੇ ਪਹਿਲਾਂ ਅੱਠ ਨਵੰਬਰ ਨੂੰ ਨੋਟਬੰਦੀ ਦੇ ਹੋਏ ਸਿਆਹ ਫੈਸਲੇ ਨਾਲ ਆਮ ਲੋਕਾਂ ਨੂੰ ਹੀ ਪ੍ਰੇਸ਼ਾਨੀ ਹੋ ਰਹੀ ਹੈ। ਇਸ ਨਾਲ ਕੋਈ ਵੀ ਕਾਲਾ ਧਨ ਬਰਾਮਦ ਨਾ ਹੋਣ ਦਾ ਦਾਅਵਾ ਕਰਦਿਆਂ ਤ੍ਰਿਣਮੂਲ ਕਾਂਗਰਸ ਸੁਪਰੀਮੋ ਨੇ ਕਿਹਾ ਕਿ ਆਮ ਲੋਕਾਂ ਦੀ ਹੱਕ ਸੱਚ ਦੀ ਕਮਾਈ ਹੀ ਉਨ੍ਹਾਂ ਤੋਂ ਖੋਹ ਲਈ ਗਈ। ਵਿਦੇਸ਼ਾਂ ਤੋਂ ਕੋਈ ਕਾਲਾ ਧਨ ਨਹੀਂ ਮਿਲਿਆ। ਕਾਲੇ ਧਨ ਦੀ ਬਰਾਮਦਗੀ ਦੇ ਨਾਂ ਉਤੇ ਕੇਂਦਰ ਵਿੱਚ ਸੱਤਾ ਧਿਰ ਨੇ ਜ਼ਮੀਨ, ਬੈਂਕ ਜਮ੍ਹਾਂ ਰਾਸ਼ੀਆਂ, ਸੋਨੇ ਤੇ ਹੀਰਿਆਂ ਦੀ ਸ਼ਕਲ ਵਿੱਚ ਅਸਾਸੇ ਬਣਾ ਲਏ ਹਨ ਅਤੇ ਉਹ ਬਹੁਤ ਵੱਡੇ ਪੂੰਜੀਪਤੀ ਬਣ ਗਏ ਹਨ।ਮੁੱਖ ਮੰਤਰੀ ਨੇ ਟਵਿੱਟਰ ‘ਤੇ ਕਿਹਾ ਕਿ ਨੋਟਬੰਦੀ ਦੇ ਐਲਾਨ ਤੋਂ ਇਕ ਮਹੀਨੇ ਵਿੱਚ 90 ਜਾਨਾਂ ਚਲੀਆਂ ਗਈਆਂ। ਮੋਦੀ ਬਾਬੂ ਹੋਰ ਕਿੰਨੀਆਂ ਮੌਤਾਂ ਚਾਹੁੰਦੇ ਹੋ? ਉਨ੍ਹਾਂ ਕਿਹਾ ਕਿ ਉਤਪਾਦਨ ਗਰਾਫ ਗੋਤਾ ਖਾ ਗਿਆ ਹੈ, ਖੇਤੀਬਾੜੀ ਗਤੀਵਿਧੀਆਂ ਠੱਪ ਹਨ, ਖ਼ਰੀਦ ਤੇ ਵੇਚ ਵਿੱਚ ਗਿਰਾਵਟ ਹੈ ਅਤੇ ਅਰਥਚਾਰਾ ਲੜਖੜਾ ਗਿਆ ਹੈ। ਸਾਰਾ ਦੇਸ਼ ਵਿੱਤੀ ਐਮਰਜੈਂਸੀ ਵਿੱਚੋਂ ਲੰਘ ਰਿਹਾ ਹੈ।
