ਕੋਰੋਨਾ ਦੇ ਮੱਦੇਨਜ਼ਰ ਕੁਝ ਮੁਹੱਲਿਆਂ ਵਿਚ 24 ਘੰਟੇ ਦਾ ਕਰਫਿਊ
ਸੋਮਵਾਰ ਨੂੰ ਜਾਰੀ ਇਨ੍ਹਾਂ ਅੰਕੜਿਆਂ ਮੁਤਾਬਕ ਮੱਕਾ ਵਿਚ 402 ਮਰੀਜ਼ਾਂ ਦੀ ਪੁਸ਼ਟੀ ਹੋਈ ਹੈ, ਜਦਕਿ 200 ਨਵੇਂ ਮਰੀਜ਼ਾਂ ਦੇ ਮਾਮਲੇ ਸਾਹਮਣੇ ਆਉਣ ਤੋਂ ਬਾਅਦ ਰਿਆਦ ਦੂਜੇ ਥਾਂ ‘ਤੇ ਪਹੁੰਚ ਗਿਆ ਹੈ। ਇਸ ਵੇਲੇ ਸਾਊਦੀ ਅਰਬ ਵਿਚ ਕੋਰੋਨਾ ਦੇ ਮਰੀਜ਼ਾਂ ਦੀ ਤਦਾਦ 10,484 ਪਹੁੰਚ ਗਈ ਹੈ, ਜਿਨ੍ਹਾਂ ਵਿਚੋਂ 27 ਫੀਸਦੀ ਸਾਊਦੀ ਦੇ ਨਾਗਰਿਕ ਹਨ ਅਤੇ 73 ਫੀਸਦੀ ਵਿਦੇਸ਼ੀ ਹਨ। ਉਥੇ ਮੱਕਾ ਵਿਚ ਕੋਰੋਨਾ ਦੇ ਪ੍ਰਸਾਰ ਨੂੰ ਰੋਕਣ ਲਈ ਸਰਕਾਰ ਵੱਲੋਂ ਕਈ ਸਾਵਧਾਨੀਆਂ ਭਰੇ ਕਦਮ ਚੁੱਕੇ ਜਾ ਰਹੇ ਹਨ। ਕੋਰੋਨਾ ਦੇ ਖਤਰੇ ਦੇ ਮੱਦੇਨਜ਼ਰ ਜਿਥੇ ਸ਼ਹਿਰ ਪੂਰੀ ਤਰ੍ਹਾਂ ਨਾਲ ਬੰਦ ਕਰ ਦਿੱਤਾ ਗਿਆ ਹੈ, ਉਥੇ ਇਥੇ ਨਾ ਤਾਂ ਕੋਈ ਬਾਹਰ ਜਾ ਸਕਦਾ ਹੈ ਅਤੇ ਨਾ ਹੀ ਕੋਈ ਸ਼ਹਿਰ ਦੇ ਅੰਦਰ ਦਾਖਲ ਹੋ ਸਕਦਾ ਹੈ।
ਇਸ ਤੋਂ ਇਲਾਵਾ ਅੰਦਰੂਨੀ ਮਾਮਲਿਆਂ ਦੇ ਕਈ ਮੁਹੱਲਿਆਂ ਵਿਚ ਸਖਤ ਸੁਰੱਖਿਆ ਉਪਾਅ ਕੀਤੇ ਹਨ। ਇਥੇ ਲੋਕਾਂ ਨੂੰ ਮੁਹੱਲਿਆਂ ਤੋਂ ਬਾਹਰ ਜਾਣ ‘ਤੇ ਸਖਤ ਪਾਬੰਦੀ ਹੈ। ਇਨਾਂ ਮੁਹੱਲਿਆਂ ਵਿਚ 24 ਘੰਟੇ ਕਰਫਿਊ ਲਾ ਦਿੱਤਾ ਗਿਆ ਹੈ। ਸਿਹਤ ਮੰਤਰਾਲੇ ਦੇ ਸੂਤਰਾਂ ਦਾ ਆਖਣਾ ਹੈ ਕਿ ਮੱਕਾ ਮੁਕਰਮਾ ਵਿਚ ਗੁੰਜਾਨਾਬਾਦ ਅਤੇ ਅਸੰਗਠਿਤ ਮੁਹੱਲਿਆਂ ਵਿਚ ਜਿਥੇ ਵੱਡੀ ਤਦਾਦ ਵਿਚ ਪ੍ਰਵਾਸੀ ਰਹਿੰਦੇ ਹਨ, ਇਥੋਂ ਕੋਰੋਨਾਵਾਇਰਸ ਦੇ ਜ਼ਿਆਦਾ ਮਰੀਜ਼ ਸਾਹਮਣੇ ਆ ਰਹੇ ਹਨ।