ਕੋਟਕਪੂਰਾ, (ਗੁਰਿੰਦਰ ਸਿੰਘ): ਸੌਦਾ ਸਾਧ ਵਲੋਂ ਦਸਮ ਪਿਤਾ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦਾ ਸਵਾਂਗ ਰਚਾਉਣ ਦੀ ਹਰਕਤ ਨੇ ਪੰਜਾਬ ਨੂੰ ਲਾਂਬੂ ਲਾ ਕੇ ਰੱਖ ਦਿਤਾ ਤੇ ਅਜੇ ਤਕ ਸਕੇ ਭਰਾਵਾਂ ‘ਚ ਵੰਡੀਆਂ ਪੈਣ ਵਾਲੀਆਂ ਖ਼ਬਰਾਂ ਪੜ੍ਹਨ-ਸੁਨਣ ਨੂੰ ਮਿਲ ਰਹੀਆਂ ਹਨ। ਹੁਣ ਬਰਨਾਲਾ ਜ਼ਿਲ੍ਹੇ ਦੇ ਪਿੰਡ ਛੀਨੀਵਾਲ ਕਲਾਂ ਦੇ ਵਸਨੀਕ ਇਕ ਵਿਅਕਤੀ ਨੇ ਖ਼ੁਦ ਨੂੰ ਗੁਰੂ ਗੋਬਿੰਦ ਸਿੰਘ ਜੀ ਦਾ ਪੁਨਰ ਜਨਮ ਦਰਸਾ ਕੇ ਨਵਾਂ ਵਿਵਾਦ ਖੜਾ ਕਰ ਦਿਤਾ ਹੈ।
ਅਮਰਜੀਤ ਸਿੰਘ ਜੀਤਾ ਮੌੜ ਨਾਂਅ ਦੇ ਵਿਅਕਤੀ ਨੇ ਅਪਣੇ ਨਾਲ ਸੰਪਰਕ ਕਰਨ ਲਈ 98881-89771 ਅਤੇ 98881-89441 ਮੋਬਾਈਲ ਨੰਬਰ ਵੀ ਜਾਰੀ ਕੀਤੇ ਹਨ ਪਰ ਉਹ ਬੰਦ ਆ ਰਹੇ ਹਨ। ਜੀਤਾ ਮੌੜ ਵਲੋਂ ਵੰਡੇ ਗਏ ਇਸ਼ਤਿਹਾਰ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੇ ਹਨ ਜਿਸ ‘ਚ ਉਹ ਲਿਖਦਾ ਹੈ, ‘ਪਿਛਲੇ ਸਾਲ 28 ਦਸੰਬਰ 2015 ਨੂੰ ਛੋਟੇ ਸਾਹਿਬਜ਼ਾਦਿਆਂ ਦੀ ਸ਼ਹੀਦੀ ਸ਼ਹਾਦਤ ਦੇ ਦਿਨ ਮੇਰੇ ਮਨ ‘ਚ ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੇ ਅਪਣੀ ਜੋਤ ਜਗਾਈ ਤੇ ਮੈਨੂੰ ਗੁਰੂ ਗੋਬਿੰਦ ਸਿੰਘ ਜੀ ਦਾ ਪੁਨਰ ਜਨਮ ਦਸਿਆ। ਉਸ ਦਿਨ ਤੋਂ ਲੈ ਕੇ ਹੁਣ ਤਕ ਗੁਰੂ ਜੀ ਮੇਰੇ ਨਾਲ ਗੱਲਾਂ ਕਰ ਰਹੇ ਹਨ ਤੇ ਸੱਭ ਕੁੱਝ ਦੱਸ ਰਹੇ ਹਨ। ਮੈਨੂੰ ਗੁਰੂ ਜੀ ਦੀ ਹਰ ਗੱਲ ਸਮਝ ਆ ਗਈ ਹੈ। ਗੁਰੂ ਨਾਨਕ ਦੇਵ ਜੀ ਨੇ ਕਿਹਾ ਕਿ ਮੈਂ ਹਮੇਸ਼ਾ ਤੇਰੇ ਨਾਲ ਰਹਾਂਗਾ। ਮੈਂ ਕੋਈ ਧਰਮ ਦਾ ਠੇਕੇਦਾਰ ਜਾਂ ਸਾਧੂ-ਸੰਤ ਪਖੰਡੀ ਨਹੀਂ ਬਣਨਾ ਚਾਹੁੰਦਾ, ਮੈਂ ਗੱਦੀ ‘ਤੇ ਗੁਰੂ ਜੀ ਦੇ ਹੁਕਮ ਨਾਲ ਬੈਠ ਰਿਹਾ ਹਾਂ ਜਿਸ ਕਿਸੇ ਦੇ ਮਨ ‘ਚ ਇਸ ਗੱਲ ਨੂੰ ਲੈ ਕੇ ਕੋਈ ਵਹਿਮ ਜਾਂ ਭੁਲੇਖਾ ਹੋਵੇ ਤਾਂ ਉਹ ਮੇਰੇ ਨਾਲ ਸਿੱਧੀ ਗੱਲ ਕਰ ਸਕਦਾ ਹੈ।’ ਉਕਤ ਪਰਚੇ ‘ਚ ਹੋਰ ਵੀ ਬਹੁਤ ਕੁੱਝ ਲਿਖਿਆ ਗਿਆ ਹੈ ਜਿਸ ‘ਤੇ ਵਿਸ਼ਵਾਸ ਕਰਨਾ ਮੁਸ਼ਕਲ ਹੈ। ਇਸ ਦੇ ਪ੍ਰਤੀਕਰਮ ਵਜੋਂ ਕਈ ਇਨਕਲਾਬੀ ਪੁਸਤਕਾਂ ਦੇ ਰਚੇਤਾ ਪ੍ਰੋ. ਇੰਦਰ ਸਿੰਘ ਘੱਗਾ ਨੇ ਕਿਹਾ ਕਿ ਸ਼੍ਰੋਮਣੀ ਕਮੇਟੀ ਅਤੇ ਪੁਲੀਸ ਪ੍ਰਸ਼ਾਸਨ ਇਸ ਸਮੱਸਿਆ ਨੂੰ ਸੁਲਝਾਉਣ ਲਈ ਸੂਝਬੂਝ ਤੋਂ ਕੰਮ ਲਵੇ ਤਾਕਿ ਕੋਈ ਵਿਵਾਦ ਖੜਾ ਨਾ ਹੋਵੇ।
