ਫ਼ੌਜ ਮੁਖੀ ਦੀ ਸਖ਼ਤ ਚਿਤਾਵਨੀ ਦੇ ਕੁੱਝ ਹੀ ਘੰਟੇ ਬਾਅਦ ਸਿੱਖ ਫ਼ੌਜੀ ਦਾ ਵੀਡੀਉ ਵਾਇਰਲ
ਨਵੀਂ ਦਿੱਲੀ: ਫ਼ੌਜ ਮੁਖੀ ਜਨਰਲ ਬਿਪਨ ਰਾਵਤ ਦੀ ਸਖ਼ਤ ਚਿਤਾਵਨੀ ਦੇ ਬਾਅਦ ਵੀ ਫ਼ੌਜ ਦੇ ਜਵਾਨ ਸੋਸ਼ਲ ਮੀਡੀਆ ‘ਤੇ ਵੀਡੀਉ ਪੋਸਟ ਕਰ ਰਹੇ ਹਨ। ਤਾਜ਼ਾ ਵੀਡੀਉ ‘ਚ ਇਕ ਸਿੱਖ ਫ਼ੌਜੀ ਨੇ ਗਾਣਾ ਗਾ ਕੇ ਦਸਿਆ ਹੈ ਕਿ ਸਰਹੱਦ ‘ਤੇ ਫ਼ੌਜੀ ਕਿਸ ਤਰ੍ਹਾਂ ਦੀ ਜ਼ਿੰਦਗੀ ਜਿਊਂਦੇ ਹਨ। ਸਿੱਖ ਫ਼ੌਜੀ ਨੇ ਵੀਡੀਉ ‘ਚ ਦਸਿਆ ਹੈ ਕਿ ਜਵਾਨ 10-10 ਮਹੀਨੇ ਤਕ ਬਿਨਾ ਛੁੱਟੀ ਦੇ ਲਗਾਤਾਰ ਸਰਹੱਦ ‘ਤੇ ਪਹਿਰਾ ਦਿੰਦੇ ਹਨ। ਸ਼ਿਕਾਇਤੀ ਲਹਿਜ਼ੇ ‘ਚ ਜਵਾਨ ਨੇ ਕਿਹਾ ਕਿ ਸਿਆਸੀ ਆਗੂ ਤਾਜ ਹੋਟਲ ‘ਚ ਲੰਚ ਅਤੇ ਡਿਨਰ ਕਰਦੇ ਹਨ, ਉਥੇ ਹੀ ਫ਼ੌਜੀ ਰੋਟੀ ਅਤੇ ਅਚਾਰ ਖਾਣ ਨੂੰ ਮਜਬੂਰ ਹਨ।
ਸਿੱਖ ਫ਼ੌਜੀਆਂ ਦਾ ਇਹ ਵੀਡੀਉ ਵਾਇਰਲ ਹੋ ਗਿਆ ਹੈ। ਪੰਜਾਬੀ ਗਾਣੇ ਵਾਲੇ ਇਸ ਵੀਡੀਉ ‘ਚ ਸਿੱਖ ਜਵਾਨ ਗਾਣਾ ਗਾ ਰਿਹਾ ਹੈ ਕਿ ਲੋਕ ਰਾਤ ਭਰ ਸਰਦੀ ਅਤੇ ਗਰਮੀ ਦੇ ਮੌਸਮ ‘ਚ ਸਰਹੱਦ ‘ਤੇ ਸਰਹੱਦ ਦੀ ਰਖਵਾਲੀ ਕਰਦੇ ਹਨ ਅਤੇ ਦੇਸ਼ ਦੇ ਸਿਆਸੀ ਲੋਕ ਚੈਨ ਦੀ ਨੀਂਦ ਸੌਂਦੇ ਹਨ। ਵੀਡੀਉ ‘ਚ ਦਿਖ ਰਿਹਾ ਹੈ ਕਿ ਉਸ ਦੇ ਸਾਥੀ ਫ਼ੌਜੀ ਉਸ ਦੇ ਗਾਣੇ ‘ਤੇ ਤਾੜੀਆਂ ਮਾਰ ਰਹੇ ਹਨ। ਫ਼ੌਜੀ ਜਵਾਨ ਦਾ ਦਰਦ ਇਥੇ ਤਕ ਨਹੀਂ ਰੁਕਿਆ, ਉਸ ਨੇ ਗੀਤ ‘ਚ ਹੀ ਕਿਹਾ ਕਿ ਜਿਸ ਕੁੜੀ ਨਾਲ ਉਸ ਦਾ ਵਿਆਹ ਹੋਇਆ ਹੈ, ਉਹ ਵੀ ਪਰੇਸ਼ਾਨ ਹੈ, ਉਹ ਸਮਝ ਨਹੀਂ ਸਕਦੀ ਕਿ ਉਹ ਸ਼ਾਦੀਸ਼ੁਦਾ ਹੈ ਜਾਂ ਬਿਨ੍ਹਾਂ ਵਿਆਹ ਦੇ।
