ਸਰੀ, ਬੀ.ਸੀ.- ਸੋਮਵਾਰ ਨੂੰ ਕੌਂਸਿਲ ਦੀ ਮੀਟਿੰਗ ਵਿੱਚ ਮੇਅਰ ਬਰੈਂਡਾ ਲੌਕ ਨੇ ਸਿਟੀ ਦੇ ਸਟਾਫ਼ ਨੂੰ ਉਸ ਪਾਇਲਟ ਪ੍ਰੋਗਰਾਮ ਦੀ ਪੜਚੋਲ ਕਰਨ ਦਾ ਨਿਰਦੇਸ਼ ਦਿੱਤਾ ਹੈ, ਜਿਹੜਾ ਇਨ੍ਹਾਂ ਗਰਮੀਆਂ ਵਿੱਚ ਸਤੰਬਰ ਤੱਕ ਕਰੈਸੈਂਟ ਬੀਚ ‘ਤੇ ਹਫ਼ਤੇ ਦੇ ਦਿਨਾਂ ਦੌਰਾਨ ਸਵੇਰ ਤੋਂ ਸ਼ਾਮ ਤੱਕ ਪਟੇ ਵਾਲੇ ਕੁੱਤਿਆਂ ਨੂੰ ਆਉਣ ਦੀ ਇਜਾਜ਼ਤ ਦੇਵੇ । ਜੇ ਇਸ ਨੂੰ ਮਨਜ਼ੂਰੀ ਮਿਲ ਗਈ ਤਾਂ ਇਸ ਵਿੱਚ ਵੀਕਐਂਡ ਜਾਂ ਕਾਨੂੰਨੀ ਛੁੱਟੀਆਂ ਸ਼ਾਮਲ ਨਹੀਂ ਹੋਣਗੀਆਂ।
ਮੇਅਰ ਬਰੈਂਡਾ ਲੌਕ ਨੇ ਕਿਹਾ, “ਮੈਂ ਬਹੁਤ ਸਾਰੇ ਵਸਨੀਕਾਂ ਨੂੰ ਇਹ ਸਵਾਲ ਪੁੱਛਦਿਆਂ ਸੁਣਿਆ ਹੈ ਕਿ ਕੀ ਕਰੈਸੈਂਟ ਬੀਚ ਦੇ ਸਾਹਮਣੇ ਵਾਲੇ ਰਸਤੇ ’ਤੇ ਪਟੇ ਵਾਲੇ ਕੁੱਤਿਆਂ ਨੂੰ ਇਜਾਜ਼ਤ ਦਿੱਤੀ ਜਾ ਸਕਦੀ ਹੈ? ਇਸ ਵੇਲੇ ਸਥਾਨਕ ਨਿਵਾਸ ਸਥਾਨਾਂ ਦੇ ਬਚਾਅ ਅਤੇ ਗਰਮੀਆਂ ਦੀ ਅਤਿਅੰਤ ਭੀੜ ਦੇ ਪ੍ਰਬੰਧਨ ਲਈ 15 ਮਈ ਤੋਂ 15 ਸਤੰਬਰ ਤੱਕ ਕੁੱਤਿਆਂ ਨੂੰ ਇਸ ਇਲਾਕੇ ਵਿੱਚ ਲਿਆਉਣ ‘ਤੇ ਪਾਬੰਦੀ ਹੈ। ਮੇਰਾ ਵਿਸ਼ਵਾਸ ਹੈ ਕਿ ਅਸੀਂ ਨਿਵਾਸ ਸਥਾਨਾਂ ਅਤੇ ਜਨਤਕ ਥਾਵਾਂ, ਦੋਵਾਂ ਦਾ ਖ਼ਿਆਲ ਰੱਖਦੇ ਹੋਏ ਇੱਕ ਸੰਤੁਲਨ ਬਣਾ ਸਕਦੇ ਹਾਂ। ਮੈਂ ਇਸ ਸੋਚ-ਸਮਝ ਭਰਪੂਰ ਅਤੇ ਸੰਤੁਲਿਤ ਪਹੁੰਚ ਵਾਲੀ ਪੜਚੋਲ ਦੀ ਆਸ ਕਰਦੀ ਹਾਂ, ਜਿਹੜੀ ਸਾਡੇ ਕੁਦਰਤੀ ਵਾਤਾਵਰਨ ਦਾ ਸਤਿਕਾਰ ਕਰੇ, ਜਨਤਕ ਸੁਰੱਖਿਆ ਨੂੰ ਯਕੀਨੀ ਬਣਾਵੇ ਅਤੇ ਪਾਲਤੂ ਜਾਨਵਰਾਂ ਬਾਰੇ ਜ਼ਿੰਮੇਵਾਰੀ-ਭਰਪੂਰ ਮਾਲਕੀ ਨੂੰ ਉਤਸ਼ਾਹਿਤ ਕਰੇ।”
ਮੇਅਰ ਦੇ ਦਿਸ਼ਾ-ਨਿਰਦੇਸ਼ਾਂ ਮੁਤਾਬਕ ਸਟਾਫ਼ ਹੁਣ ਨਿਵਾਸੀਆਂ ਨਾਲ ਸਲਾਹ ਮਸ਼ਵਰਾ ਕਰੇਗਾ, ਲੋੜੀਂਦੀਆਂ ਜ਼ਰੂਰੀ ਕਾਰਵਾਈਆਂ ਨੂੰ ਲਾਗੂ ਕਰਵਾਉਣ ਸੰਬੰਧੀ ਕਦਮਾਂ ਜਾਂ ਰਿਹਾਇਸ਼ੀ ਸੁਰੱਖਿਆ ‘ਤੇ ਵਿਚਾਰ ਕਰੇਗਾ ਅਤੇ ਸਰੀ ਸਿਟੀ ਕੌਂਸਿਲ ਦੇ ਵਿਚਾਰਨ ਲਈ ਇੱਕ ਰਿਪੋਰਟ ਤਿਆਰ ਕਰੇਗਾ।
ਕਰੈਸੈਂਟ ਬੀਚ ਦੇ ਉੱਤਰ ਵੱਲ ਸਥਿਤ ਬਲ਼ੈਕੀ ਸਪਿੱਟ ਪਾਰਕ ਵਿੱਚ ਕੁੱਤਿਆਂ ਦਾ ਸਵਾਗਤ ਜਾਰੀ ਹੈ। ਪਾਰਕ ਵਿੱਚ ਬਿਨਾਂ ਪਟਿਆਂ (off leash) ਵਾਲੇ ਕੁੱਤਿਆਂ ਲਈ ਦੋ ਖੇਤਰ ਹਨ, ਜਿਸ ਵਿੱਚ ਬਿਨਾਂ ਪਟਿਆਂ ਵਾਲੇ ਕੁੱਤਿਆਂ ਲਈ ਬਣਿਆ ਸਰੀ ਦਾ ਇਕਲੌਤਾ ਤੈਰਾਕੀ ਦਾ ਖੇਤਰ ਵੀ ਸ਼ਾਮਲ ਹੈ।
