ਫੈਡਰਲ ਸਰਕਾਰ ਕੈਨੇਡਾ ਦੀ ਕ੍ਰਿਮੀਨਲ ਕੋਡ ਬੁੱਕ ਵਿੱਚੋਂ ਸਮਾਂ ਵਿਹਾਅ ਚੁੱਕੇ ਕਾਨੂੰਨ ਹਟਾਉਣ ਦੀ ਤਿਆਰੀ ‘ਚ
ਫੈਡਰਲ ਸਰਕਾਰ ਕੈਨੇਡਾ ਦੀ ਕ੍ਰਿਮੀਨਲ ਕੋਡ ਬੁੱਕ ਵਿੱਚੋਂ ਪੁਰਾਣੇ ਤੇ ਸਮਾਂ ਵਿਹਾਅ ਚੁੱਕੇ ਤਥਾ ਕਥਿਤ ਜੌਂਬੀ ਲਾਅਜ਼ ਨੂੰ ਹਟਾਉਣ ਦੀ ਤਿਆਰੀ ਕਰ ਰਹੀ ਹੈ।
ਕ੍ਰਿਮੀਨਲ ਜੱਜਾਂ ਤੇ ਮਾਹਿਰਾਂ ਵੱਲੋਂ ਨਿਆਂ ਮੰਤਰੀ ਜੋਡੀ ਵਿਲਸਨ ਰੇਅਬੋਲਡ ਤੋਂ ਇਨ੍ਹਾਂ ਕੋਡਜ਼ ਵਿੱਚ ਸੁਧਾਰ ਕੀਤੇ ਜਾਣ ਦੀ ਮੰਗ ਕੀਤੀ ਜਾ ਰਹੀ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਕੈਨੇਡਾ ਦੀ ਕ੍ਰਿਮੀਨਲ ਕੋਡ ਬੁੱਕ ਵਿੱਚ ਸਮਾਂ ਪੁਗਾਅ ਚੁੱਕੇ ਕਾਨੂੰਨ, ਡੁਪਲੀਕੇਸ਼ਨ ਤੇ ਅੜਕਣ ਵਾਲੀ ਭਾਸ਼ਾ ਦੀ ਵਰਤੋਂ ਕਾਰਨ ਇਸ ਦੀ ਸਾਰਥਕਤਾ ਉੱਤੇ ਸਵਾਲ ਲੱਗ ਰਹੇ ਹਨ। ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਰੇਅਬੋਲਡ ਕੋਡ ਵਿੱਚ ਸੋਧ ਕਰਨ ਲਈ ਬੁੱਧਵਾਰ ਨੂੰ ਪਾਰਲੀਆਮੈਂਟ ਹਿੱਲ ਉੱਤੇ ਦੁਪਹਿਰੇ 3:30 ਵਜੇ ਐਲਾਨ ਕਰ ਸਕਦੀ ਹੈ।ਮੁਜਰਮਾਨਾਂ ਜੁਰਮਾਂ ਦੀ ਵਿਆਖਿਆ, ਸਜ਼ਾਵਾਂ ਨਿਰਧਾਰਤ ਕਰਨ ਤੇ ਤਰੀਕਿਆਂ ਲਈ ਇਹ ਕੋਡ 1892 ਵਿੱਚ ਤਿਆਰ ਕੀਤਾ ਗਿਆ ਸੀ। ਇਸ ਵਿੱਚ ਹੁਣ ਤੱਕ ਇੱਕੋ ਵਾਰੀ 1950 ਵਿਆਂ ਵਿੱਚ ਸੁਧਾਰ ਹੋਇਆ ਤੇ ਫਿਰ 1970 ਵਿੱਚ ਇੱਕ ਵਾਰੀ ਫਿਰ ਇਸ ਦਾ ਮੁਲਾਂਕਣ ਕੀਤਾ ਗਿਆ। ਹੈਲੀਫੈਕਸ ਵਿੱਚ ਡਲਹੌਜ਼ੀ ਯੂਨੀਵਰਸਿਟੀ ਦੇ ਸ਼ੂਲਿਚ ਸਕੂਲ ਆਫ ਲਾਅ ਦੇ ਪ੍ਰੋਫੈਸਰ ਸਟੀਫਨ ਕਫਲੈਨ ਦਾ ਕਹਿਣਾ ਹੈ ਕਿ ਰੂਲ ਆਫ ਲਾਅ ਦਾ ਮੁੱਖ ਆਧਾਰ ਇਹ ਹੈ ਕਿ ਅਸਲ ਕਾਨੂੰਨ ਸਾਰਿਆਂ ਨੂੰ ਸਮਝ ਆ ਸਕਣ ਤੇ ਹਰ ਕਿਸੇ ਦੀ ਉਨ੍ਹਾਂ ਤੱਕ ਪਹੁੰਚ ਹੋਵੇ।
ਉਨ੍ਹਾਂ ਆਖਿਆ ਕਿ ਗਰਭਪਾਤ ਨੂੰ ਗੈਰ ਕਾਨੂੰਨੀ ਠਹਿਰਾਉਣਾ ਤੇ ਕ੍ਰਾਈਮ ਕੌਮਿਕਸ ਉੱਤੇ ਬੈਨ ਲਾਉਣ ਵਰਗੇ ਕਾਨੂੰਨ ਅਜੇ ਵੀ ਸਾਡੀ ਕਾਨੂੰਨ ਦੀ ਕਿਤਾਬ ਵਿੱਚ ਮੌਜੂਦ ਹਨ ਜਦਕਿ ਅਦਾਲਤ ਵੱਲੋਂ ਕਦੋਂ ਦਾ ਇਨ੍ਹਾਂ ਨੂੰ ਖ਼ਤਮ ਕੀਤਾ ਜਾ ਚੁੱਕਿਆ ਹੈ ਤੇ ਇਨ੍ਹਾਂ ਨੂੰ ਹੁਣ ਲਾਗੂ ਵੀ ਨਹੀਂ ਕੀਤਾ ਜਾ ਸਕਦਾ। ਪਰ ਹਕੀਕਤ ਇਹ ਹੈ ਕਿ ਸੰਸਦ ਵੱਲੋਂ ਇਨ੍ਹਾਂ ਕਾਨੂੰਨਾਂ ਨੂੰ ਕ੍ਰਿਮੀਨਲ ਕੋਡ ਬੁੱਕ ਵਿੱਚੋਂ ਕੱਟਿਆ ਹੀ ਨਹੀਂ ਗਿਆ ਇਸ ਲਈ ਇਹ ਬੇਕਾਰ ਵਿੱਚ ਉੱਥੇ ਹੀ ਦਰਜ ਪਏ ਹਨ।
