ਕੋਟਕਪੂਰਾ, (ਗੁਰਿੰਦਰ ਸਿੰਘ) : ਖ਼ੁਦ ਨੂੰ ਗੋਲੀਆਂ ਨਾਲ ਖ਼ਤਮ ਕਰਨ ਵਾਲੇ ਤਿੰਨ ਗੈਂਗਸਟਰਾਂ ‘ਚੋਂ ਫ਼ਰੀਦਕੋਟ ਜ਼ਿਲ੍ਹੇ ਦੇ ਪਿੰਡ ਰੋੜੀਕਪੂਰਾ ਦੇ ਵਸਨੀਕ ਜਸਪ੍ਰੀਤ ਸਿੰਘ ਦੀ ਕਹਾਣੀ ਵਖਰੀ ਹੈ। ਉਸ ਦੇ ਰਿਸ਼ਤੇਦਾਰ ਦਸਦੇ ਹਨ ਕਿ ਉਹ ਸ਼ੌਕ ਨਾਲ ਨਹੀਂ ਸਗੋਂ ਪੁਲਿਸ ਦੇ ਤਸ਼ੱਦਦ ਕਾਰਨ ਗੈਂਗਸਟਰ ਬਣਨ ਲਈ ਮਜਬੂਰ ਹੋਇਆ। ਗਿਆਰਵੀਂ ਜਮਾਤ ‘ਚ ਪੜ੍ਹਦੇ ਜਸਪ੍ਰੀਤ ਸਿੰਘ ਨੂੰ ਕਿਸੇ ਮਾਮਲੇ ‘ਚ ਜੈਤੋ ਥਾਣੇ ਦੇ ਤਤਕਾਲੀਨ ਐਸਐਚਓ ਨੇ ਬੇਤਹਾਸ਼ਾ ਕੁਟਿਆ ਤੇ ਕੁੱਟ ਤੋਂ ਦੁਖੀ ਹੋਇਆ ਜਸਪ੍ਰੀਤ ਗੈਂਗਸਟਰਾਂ ਨਾਲ ਰਲ ਗਿਆ।
ਜਸਪ੍ਰੀਤ ਸਿੰਘ ਆਪਣੇ ਮਾਤਾ-ਪਿਤਾ ਦਾ ਇਕਲੌਤਾ ਪੁੱਤਰ ਸੀ ਤੇ ਉਸ ਦੇ ਮਾਤਾ-ਪਿਤਾ ਦੀ ਮੌਤ ਕਾਘੀ ਸਮਾਂ ਪਹਿਲਾਂ ਹੋ ਚੁੱਕੀ ਹੈ। ਜ਼ਮੀਨ ਦੇ ਰਿਸ਼ਤੇਦਾਰਾਂ ਮੁਤਾਬਕ ਜ਼ਮੀਨ ਦੇ ਝਗੜੇ ‘ਚ ਜਸਪ੍ਰੀਤ ਤੇ ਹੋਰਾਂ ਵਿਰੁਧ ਪਰਚਾ ਦਰਜ ਹੋਇਆ ਤੇ ਉਸ ਨੂੰ ਥਾਣੇ ਲਿਜਾ ਕੇ ਕੁੱਟਿਆ ਗਿਆ। ਉਦੋਂ ਉਹ 18 ਸਾਲ ਦਾ ਸੀ ਤੇ ਗਿਆਰਵੀਂ ਜਮਾਤ ਦਾ ਵਿਦਿਆਰਥੀ ਸੀ। ਦੂਜਾ ਗੈਂਗਸਟਰ ਕਮਲਜੀਤ ਸਿੰਘ ਵੀ ਜੈਤੋ ਦੀ ਹਿੰਮਤਪੁਰਾ ਬਸਤੀ ਦਾ ਵਸਨੀਕ ਸੀ। ਰਣਜੀਤ ਸਿੰਘ ਸੇਵੇਵਾਲਾ ਦੇ ਸੰਪਰਕ ‘ਚ ਆਉਣ ਤੋਂ ਬਾਅਦ ਕਮਲਜੀਤ 2011 ‘ਚ ਗੈਂਗਸਟਰ ਬਣਿਆ। ਕਮਲਜੀਤ ਦੇ ਮਾਤਾ-ਪਿਤਾ ਡੱਬਵਾਲੀ ਵਿਖੇ ਰਹਿੰਦੇ ਹਨ। ਪੁਲਿਸ ਨੇ ਕਮਲਜੀਤ ਤੇ ਜਸਪ੍ਰੀਤ ਨੂੰ ਭਗੌੜਾ ਕਰਾਰ ਦਿਤਾ ਹੋਇਆ ਹੈ ਅਤੇ ਕਮਲਜੀਤ ਦੇ ਘਰ ਦੇ ਬਾਹਰ ਪੁਲਿਸ ਦਾ ਨੋਟਿਸ ਵੀ ਲੱਗਾ ਹੋਇਆ ਹੈ। ਉਥੋਂ ਦੇ ਵਸਨੀਕਾਂ ਅਨੁਸਾਰ ਕਮਲਜੀਤ ਤੇ ਜਸਪ੍ਰੀਤ ਸ਼ਰੀਫ਼ ਪਰਵਾਰਾਂ ਵਿਚ ਪੈਦਾ ਹੋਏ ਪਰ ਪੁਲਿਸ ਨੇ ਉਨ੍ਹਾਂ ਨੂੰ ਗੈਂਗਸਟਰ ਬਣਨ ਲਈ ਮਜਬੂਰ ਕਰ ਦਿਤਾ। ਸੀਆਈਏ ਸਟਾਫ਼ ਫਰੀਦਕੋਟ ਦੇ ਇੰਚਾਰਜ ਅਮਰਿਤਪਾਲ ਸਿੰਘ ਭਾਟੀ ਅਨੁਸਾਰ ਤਿੰਨੇ ਗੈਂਗਸਟਰ ਭਗੌੜੇ ਸਨ ਅਤੇ ਉਨ੍ਹਾਂ ਵਿਰੁਧ ਵੱਖ-ਵੱਖ ਥਾਣਿਆਂ ‘ਚ ਮਾਮਲੇ ਦਰਜ ਸਨ।