ਨਵੀਂ ਦਿੱਲੀ,: ਨੋਟਬੰਦੀ ਕਾਰਨ ਖੇਤੀਬਾੜੀ ਨੂੰ ਤਕੜੀ ਮਾਰ ਸਹਿਣੀ ਪਈ ਹੈ ਅਤੇ ਉਹ ਹੁਣ ਤਕ ਇਸ ਤੋਂ ਉਭਰ ਨਹੀਂ ਸਕੀ। ਖੇਤੀਬਾੜੀ ਸੰਗਠਨਾਂ ਨਾਲ ਜੁੜੇ ਆਗੂਆਂ ਦਾ ਕਹਿਣਾ ਹੈ ਕਿ ਫਲ ਅਤੇ ਸਬਜ਼ੀ ਪੈਦਾ ਕਰਨ ਵਾਲੇ ਕਿਸਾਨਾਂ ਨੂੰ ਸੱਭ ਤੋਂ ਵੱਧ ਮਾਰ ਝੱਲਣੀ ਪਈ ਹੈ। ਮੰਗ ਕੀਤੀ ਜਾ ਰਹੀ ਹੈ ਕਿ ਆਗਾਮੀ ਬਜਟ ‘ਚ ਕਿਸਾਨਾਂ ਨੂੰ ਨੁਕਸਾਨ ਦੀ ਭਰਪਾਈ ਲਈ ਯੋਜਨਾ ਦਾ ਐਲਾਨ ਕੀਤਾ ਜਾਵੇ।
ਭਾਰਤੀ ਕ੍ਰਿਸ਼ੀ ਸਮਾਜ ਦੇ ਚੇਅਰਮੈਨ ਅਜੈ ਵੀਰ ਜਾਖੜ ਨੇ ਕਿਹਾ ਕਿ ਜਿਹੜਾ ਕਿਸਾਨ ਫ਼ਲ ਅਤੇ ਸਬਜ਼ੀਆਂ ਦੀ ਕਾਸ਼ਤ ਕਰਦੇ ਹਨ ਉਨ੍ਹਾਂ ਨੂੰ ਔਸਤਨ 20 ਤੋਂ 50 ਹਜ਼ਾਰ ਰੁਪਏ ਪ੍ਰਤੀ ਏਕੜ ਦਾ ਨੁਕਸਾਨ ਝੱਲਣਾ ਪਿਆ ਹੈ। ਇਹ ਨੁਕਸਾਨ ਬਹੁਤ ਜ਼ਿਆਦਾ ਹੈ। ਜ਼ਿਕਰਯੋਗ ਹੈ ਕਿ ਕਈ ਸੂਬਿਆਂ ਤੋਂ ਖ਼ਬਰਾਂ ਆਈਆਂ ਸਨ ਕਿ ਢੁਕਵਾਂ ਭਾਅ ਨਾ ਮਿਲਣ ‘ਤੇ ਕਿਸਾਨਾਂ ਨੇ ਟਮਾਟਰ ਅਤੇ ਮਟਰ ਸਮੇਤ ਕਈ ਸਬਜ਼ੀਆਂ ਨੂੰ ਸੜਕਾਂ ‘ਤੇ ਸੁੱਟ ਦਿਤਾ ਅਤੇ ਕਈ ਥਾਈਂ ਮੁਫ਼ਤ ਵੰਡਿਆ।
