ਆਜ਼ਾਦੀ ਦਿਹਾੜੇ ਮੌਕੇ ਸੰਬੋਧਨ ਵਿੱਚ ਛੋਹਿਆ ਕਸ਼ਮੀਰ ਮਸਲਾ
ਨਵੀਂ ਦਿੱਲੀ:-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਆਜ਼ਾਦੀ ਦਿਹਾੜੇ ਮੌਕੇ ਦਿੱਤੇ ਆਪਣੇ ਬਹੁ-ਪਸਾਰੀ ਭਾਸ਼ਣ ਵਿੱਚ ਆਪਣੀ ਸਰਕਾਰ ਦੇ ਆਰਥਿਕ ਸੁਧਾਰਾਂ ਦੀ ਸ਼ਲਾਘਾ ਕਰਦਿਆਂ ਸੰਕਟ ਨਾਲ ਜੂਝ ਰਹੇ ਕਸ਼ਮੀਰੀਆਂ ਦੀ ਗੱਲ ਕੀਤੀ।ਰਾਸ਼ਟਰ ਨੂੰ ਹੁਣ ਤੱਕ ਚਾਰ ਵਾਰ ਕੀਤੇ ਸੰਬੋਧਨਾਂ ਵਿੱਚੋਂ ਸਭ ਤੋਂ ਛੋਟੇ ਇਸ 56 ਮਿੰਟ ਦੇ ਭਾਸ਼ਣ ਵਿੱਚ ਪ੍ਰਧਾਨ ਮੰਤਰੀ ਨੇ ਧਰਮ ਦੇ ਨਾਂ ਉਤੇ ਹਿੰਸਾ ਭੜਕਾਉਣ ਵਾਲਿਆਂ ਨੂੰ ਘੁਰਕੀ ਮਾਰਦਿਆਂ ਕਿਹਾ ਕਿ ਜਾਤੀਵਾਦ ਅਤੇ ਫਿਰਕੂਵਾਦ ਜ਼ਹਿਰ ਵਾਂਗ ਹੈ। ਆਪਣੀ ਵਿਲੱਖਣ ਪਛਾਣ ਅੱਧੀਆਂ ਬਾਹਾਂ ਵਾਲੇ ਕੁੜਤੇ, ਚੂੜੀਦਾਰ ਪਜਾਮੇ ਅਤੇ ਰਾਜਸਥਾਨੀ ਪਗੜੀ ਵਿੱਚ ਸਜੇ ਸ੍ਰੀ ਮੋਦੀ ਨੇ ਲਾਲ ਕਿਲੇ ਦੀ ਫਸੀਲ ਤੋਂ ਸੰਬੋਧਨ ਕੀਤਾ।
ਕਸ਼ਮੀਰ ਵਾਦੀ ਵਿੱਚ ਚੱਲ ਰਹੀ ਹਿੰਸਾ ਦਾ ਜ਼ਿਕਰ ਕਰਦਿਆਂ ਸ੍ਰੀ ਮੋਦੀ ਨੇ ਕਿਹਾ ਕਿ ”ਨਾ ਗਾਲੀ ਸੀ, ਨਾ ਗੋਲੀ ਸੀ, ਪਰਿਵਰਤਨ ਹੋਗਾ ਗਲੇ ਲਗਾਨੇ ਸੇ….ਸਮੱਸਿਆ ਸੁਲਝੇਗੀ ਹਰ ਕਸ਼ਮੀਰੀ ਕੋ ਗਲੇ ਲਗਾਨੇ ਸੇ।” ਉਨ੍ਹਾਂ ਕਿਹਾ ਕਿ ਕੁਝ ਕੁ ਵੱਖਵਾਦੀਆਂ ਵੱਲੋਂ ਰਾਜ ਵਿੱਚ ਸਮੱਸਿਆਵਾਂ ਪੈਦਾ ਕਰਨ ਲਈ ਤਰ੍ਹਾਂ ਤਰ੍ਹਾਂ ਦੇ ਹਥਕੰਡੇ ਅਪਣਾਏ ਜਾ ਰਹੇ ਹਨ ਪਰ ਸਰਕਾਰ ਕਸ਼ਮੀਰ ਨੂੰ ਮੁੜ ਜੰਨਤ ਬਣਾਉਣ ਲਈ ਵਚਨਬੱਧ ਹੈ। ਪ੍ਰਧਾਨ ਮੰਤਰੀ ਨੇ ਉੱਤਰ ਪ੍ਰਦੇਸ਼ ਦੇ ਇਕ ਹਸਪਤਾਲ ਵਿੱਚ ਬੱਚਿਆਂ ਦੀਆਂ ਮੌਤਾਂ ਉਤੇ ਦੁੱਖ ਪ੍ਰਗਟਾਇਆ।