ਜੇ ਮੋਦੀ ਚਾਹੇ ਤਾਂ ਇੱਕ ਮਿੰਟ ਵਿੱਚ ਹੋ ਸਕਦਾ ਹੈ ਕਾਲੇ ਧਨ ਦਾ ਖਾਤਮਾ
ਅਮਰਾਵਤੀ :-ਆਂਧਰਾ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਚੰਦਰ ਬਾਬੂ ਨਾਇਡੂ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਪੱਤਰ ਲਿਖ ਕੇ ਕਿਹਾ ਹੈ ਕਿ ਦੇਸ਼ ਵਿੱਚੋਂ ਕਾਲਾ ਧਨ ਖਤਮ ਕਰਨਾ ਇੱਕ ਮਿੰਟ ਦਾ ਕੰਮ ਹੈ। ਉਨ੍ਹਾਂ ਕਿਹਾ ਕਿ ਕੇਂਦਰ ਸਰਕਾਰ ਦੇਸ਼ ਵਿੱਚ 500 ਅਤੇ ਇੱਕ ਹਜਾਰ ਵਾਲੇ ਨੋਟਾਂ ਉੱਤੇ ਪਾਬੰਦੀ ਲਗਾਏ ਤਾਂ ਕੁੱਝ ਸਮੇਂ ਵਿੱਚ ਹੀ ਸਾਰਾ ਕਾਲਾ ਧਨ ਬਾਹਰ ਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਜਿਨ੍ਹਾਂ ਲੋਕਾਂ ਤੋਂ ਸਰਕਾਰ ਕਾਲਾ ਧਨ ਬਾਹਰ ਕੱਢਣ ਦੀ ਆਸ ਲਗਾਈ ਬੈਠੀ ਹੈ, ਉਹ ਕਦੇ ਵੀ ਆਪਣੇ ਕਾਲੇ ਧਨ ਦੇ ਜਖੀਰੇ ਬਾਹਰ ਨਹੀਂ ਕੱਢਣਗੇ। ਉਨ੍ਹਾਂ ਕਿਹਾ ਕਿ ਅਸੀਂ ਕਾਨੂੰਨ ਦੇ ਰਸਤੇ ਵੀ ਇਹ ਧਨ ਜਨਤਕ ਨਹੀਂ ਕਰਵਾ ਸਕਦੇ। ਉਨ੍ਹਾਂ ਕਿਹਾ ਕਿ ਰਾਜਨੀਤੀ ਅੱਜ ਭਰਿਸ਼ਟ ਅਤੇ ਕਾਲੇ ਧਨ ਰੱਖਣ ਵਾਲੇ ਲੋਕਾਂ ਲਈ ਅਰਾਮਦਾਇਕ ਪਨਾਹਗਾਹ ਬਣ ਚੁੱਕੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਲੋਕ ਹੀ ਰਾਜਨੀਤੀ ਵਿੱਚ ਭਾਰੀ ਹਨ ਅਤੇ ਲੋਕ ਫਤਵੇ ਦਾ ਦੁਰਉਪਯੋਗ ਕਰ ਰਹੇ ਹਨ। ਨਾਇਡੂ ਨੇ ਕਿਹਾ ਹੈ ਕਿ ਇਹ ਕਾਲਾ ਧਨ ਅਤੇ ਵੱਡੇ ਨੋਟ ਖਤਮ ਹੋਣਗੇ ਤਾਂ ਇਨ੍ਹਾਂ ਨੋਟਾਂ ਨਾਲ ਵੋਟਾਂ ਖਰੀਦਣੀਆਂ ਵੀ ਬੰਦ ਹੋ ਜਾਣਗੀਆਂ ਅਤੇ ਲੋਕ ਰਾਜ ਸਹੀ ਅਰਥਾਂ ਵਿੱਚ ਸ਼ੁਰੂ ਹੋ ਜਾਵੇਗਾ।
