ਅਹਿਮਦਾਬਾਦ— ਰਾਜਕੋਟ ਦੇ ਉਨਾ ਤਹਿਸੀਲ ਦੇ ਸਮੇਠੀਆਣਾ ਪਿੰਡ ‘ਚ ਮ੍ਰਿਤਕ ਪਸ਼ੂਆਂ ਦਾ ਚਮੜਾ ਕੱਢ ਰਹੇ ਦਲਿਤ ਨੌਜਵਾਨਾਂ ਨਾਲ ਗਲਤ ਵਿਵਹਾਰ ਤੋਂ ਬਾਅਦ ਪੂਰੇ ਦੇਸ਼ ‘ਚ ਹੰਗਾਮਾ ਮਚ ਗਿਆ ਸੀ। ਗੁਜਰਾਤ ਦੇ ਜ਼ਿਆਦਾਤਰ ਦਲਿਤਾਂ ਨੇ ਮ੍ਰਿਤਕ ਪਸ਼ੂਆਂ ਨੂੰ ਨਾ ਚੁੱਕਣ ਦਾ ਵਚਨ ਦੇ ਕੇ ਬੁੱਧ ਧਰਮ ਨੂੰ ਮੰਨਣ ਦਾ ਫੈਸਲਾ ਲਿਆ ਹੈ। ਦੁਸਹਿਰੇ ਦੇ ਦਿਨ ਅਹਿਮਦਾਬਾਦ, ਕਲੋਲ, ਸੁਰਿੰਦਰ ਨਗਰ ਅਤੇ ਬਨਾਸਕਾਂਠਾ ਦੇ ਲਗਭਗ 450 ਦਲਿਤਾਂ ਨੇ ਬੁੱਧ ਧਰਮ ਨੂੰ ਅਪਣਾਇਆ। ਗੁਜਰਾਤ ਬੋਧੀ ਅਕੈਡਮੀ ਸਮੇਤ ਹੋਰ 8 ਸੰਸਥਾਵਾਂ ਦੀ ਅਗਵਾਈ ‘ਚ ਅਹਿਮਦਾਬਾਦ ਦੇ ਦਾਣੀਲੀਮੜਾ ਸਥਿਤ ਅੰਬੇਦਕਰ ਹਾਲ ‘ਚ 140 ਹਿੰਦੂਆਂ ਨੇ ਹਿੰਦੂ ਧਰਮ ਦਾ ਤਿਆਗ ਕਰਕੇ ਬੁੱਧ ਧਰਮ ਨੂੰ ਮੰਨ ਲਿਆ।
ਬੋਧੀ ਅਕੈਡਮੀ ਦੇ ਪ੍ਰਧਾਨ ਰਮੇਸ਼ ਬੇਂਕਰ ਨੇ ਜਾਣਕਾਰੀ ਦਿੰਦੇ ਹੋਏ ਕਿਹਾ ਕਿ ਦਲਿਤਾਂ ਨੇ ਜਾਤੀਵਾਦ, ਅਸਮਾਨਤਾ ਅਤੇ ਅੱਤਿਆਚਾਰ ਦੇ ਕਾਰਨ ਬੁੱਧ ਧਰਮ ਅਪਣਾਇਆ ਹੈ। ਕਲੋਲ ਰੇਲਵੇ ਸਟੇਸ਼ਨ ਨੇੜੇ ਭਾਰਤੀ ਬੁੱਧ ਮਹਾਸਭਾ ਵਲੋਂ 61 ਹਿੰਦੂਆਂ ਨੇ ਬੁੱਧ ਧਰਮ ਨੂੰ ਅਪਣਾਇਆ ਹੈ। ਇਸ ਤਰ੍ਹਾਂ ਸੁਰਿੰਦਰ ਨਗਰ ‘ਚ ਅਮਰ ਬੁੱਧ ਬੌਧਿਕ ਵਿਹਾਰ ਨਾਂ ਦੀ ਸੰਸਥਾ ਦੇ ਤਹਿਤ 11 ਦਲਿਤਾਂ ਨੇ ਆਪਣੇ ਧਰਮ ਦਾ ਤਿਆਗ ਕੀਤਾ ਹੈ। ਬਨਾਸਕਾਂਠਾ ‘ਚ 200 ਤੋਂ ਜ਼ਿਆਦਾ ਦਲਿਤਾਂ ਨੇ ਬੁੱਧ ਧਰਮ ਅਪਣਾਇਆ ਹੈ। ਜ਼ਿਕਰਯੋਗ ਹੈ ਕਿ ਉਨਾ ਕਾਂਡ ਤੋਂ ਬਾਅਦ ਦਲਿਤਾਂ ਵਲੋਂ ਬੁੱਧ ਧਰਮ ਅਪਣਾਉਣ ਦਾ ਸਿਲਸਿਲਾ ਜਾਰੀ ਹੈ। ਇਕ ਦਿਨ ‘ਚ ਗੁਜਰਾਤ ਦੇ 450 ਦਲਿਤਾਂ ਵਲੋਂ ਬੁੱਧ ਧਰਮ ਅਪਣਾਉਣ ਨਾਲ ਸਨਸਨੀ ਮਚ ਗਈ ਹੈ।
