ਕਰਜ਼ੇ ਦਾ ਦੈਂਤ ਕਿਸਾਨਾਂ ਨੂੰ ਹੌਸਲਾ ਦੇਣ ਵਾਲੇ ਕਿਸਾਨ ਆਗੂ ਨੇ ਜਾਨ ਦਿਤੀ
ਬਨੂੜ, (ਅਵਤਾਰ ਸਿੰਘ) : ਪਿੰਡ ਬਠਲਾਣਾ ਦਾ ਸਰਗਰਮ ਕਿਸਾਨ ਆਗੂ ਰਣਧੀਰ ਸਿੰਘ ਬਠਲਾਣਾ ਅਪਣੇ ਸਿਰ ਚੜ੍ਹੇ ਕਰਜ਼ੇ ਨੂੰ ਲਾਹੁਣ ਦੀ ਜੰਗ ਹਾਰ ਗਿਆ ਤੇ ਖੇਤ ਵਿਚਲੇ ਬਿਜਲੀ ਦੇ ਟਰਾਂਸਫ਼ਾਰਮਰ ਦੀਆਂ ਤਾਰਾਂ ਨੂੰ ਹੱਥ ਪਾ ਕੇ ਜਾਨ ਦੇ ਗਿਆ। 58 ਸਾਲਾਂ ਦਾ ਕਿਸਾਨ ਆਗੂ ਰਣਧੀਰ ਸਿੰਘ ਤਿੰਨ ਧੀਆਂ ਅਤੇ ਇਕ ਪੁੱਤਰ ਦਾ ਪਿਉ ਸੀ।
ਮ੍ਰਿਤਕ ਰਣਧੀਰ ਸਿੰਘ ਦੇ ਸਪੁੱਤਰ ਗੁਰਵੀਰ ਸਿੰਘ ਦੇ ਥਾਣਾ ਸੋਹਾਣਾ ‘ਚ ਲਿਖਾਏ ਬਿਆਨਾਂ ਅਨੁਸਾਰ ਉਸ ਦੇ ਪਿਤਾ ਸਿਰ ਵੱਖ-ਵੱਖ ਬੈਂਕਾਂ ਦਾ 15 ਲੱਖ ਦਾ ਕਰਜ਼ਾ ਚੜ੍ਹਿਆ ਹੋਇਆ ਹੈ। ਉਹ ਕਲ ਸ਼ਾਮੀਂ ਪੰਜ ਵਜੇ ਖੇਤ ਵਿਚ ਝੋਨਾ ਲਾ ਰਹੇ ਮਜ਼ਦੂਰਾਂ ਕੋਲ ਗਿਆ ਸੀ। ਗੁਰਵੀਰ ਅਨੁਸਾਰ ਸ਼ਾਮੀਂ ਸੱਤ ਕੁ ਵਜੇ ਪ੍ਰਵਾਸੀ ਮਜ਼ਦੂਰ ਉਸ ਦੇ ਪਿਉ ਨੂੰ ਬੇਹੋਸ਼ੀ ਦੀ ਹਾਲਤ ਵਿਚ ਚੁੱਕ ਕੇ ਘਰ ਲੈ ਕੇ ਆਏ ਤੇ ਉਹ ਤੁਰਤ ਸੋਹਾਣਾ ਦੇ ਗੁਰੂ ਹਰਕ੍ਰਿਸ਼ਨ ਸਾਹਿਬ ਚੈਰੀਟੇਬਲ ਹਸਪਤਾਲ ਵਿਚ ਲੈ ਕੇ ਗਏ ਜਿਥੇ ਡਾਕਟਰਾਂ ਨੇ ਉਸ ਦੇ ਪਿਉ ਨੂੰ ਮ੍ਰਿਤਕ ਐਲਾਨ ਦਿਤਾ।
ਪਿੰਡ ਦੇ ਨੰਬਰਦਾਰ ਹਰਪਾਲ ਸਿੰਘ ਤੇ ਕਈਂ ਹੋਰ ਵਸਨੀਕਾਂ ਨੇ ਦਸਿਆ ਕਿ ਰਣਧੀਰ ਸਿੰਘ ਬਹੁਤ ਅਗਾਂਹਵਧੂ ਸੋਚ ਦਾ ਮਾਲਕ ਸੀ। ਉਸ ਨੇ ਪਹਿਲਾਂ ਡੇਅਰੀ ਫ਼ਾਰਮਿੰਗ ਦਾ ਧੰਦਾ ਸ਼ੁਰੂ ਕੀਤਾ ਤੇ ਫਿਰ ਸੂਰ ਪਾਲਣ ਦਾ ਧੰਦਾ ਵੀ ਕੀਤਾ ਪਰ ਦੋਹਾਂ ਧੰਦਿਆਂ ਵਿਚ ਸਫ਼ਲਤਾ ਨਾ ਮਿਲਣ ਕਾਰਨ ਉਸ ਦੇ ਸਿਰ ਕਰਜ਼ੇ ਦੀ ਵੱਡੀ ਪੰਡ ਖੜੀ ਹੋ ਗਈ ਜਿਸ ਕਾਰਨ ਮਾਨਸਿਕ ਪ੍ਰੇਸ਼ਾਨੀ ਦੀ ਹਾਲਤ ਵਿਚ ਉਸ ਨੇ ਖ਼ੁਦਕਸ਼ੀ ਕਰ ਲਈ। ਪਿੰਡ ਦੇ ਵਸਨੀਕਾਂ ਨੇ ਦਸਿਆ ਕਿ ਰਣਧੀਰ ਸਿੰਘ ਕਿਸਾਨਾਂ ਤੇ ਹੋਰ ਸਮਾਜਕ ਮਸਲਿਆਂ ਲਈ ਹਮੇਸ਼ਾ ਮੋਹਰੀ ਰਹਿੰਦਾ ਸੀ ਤੇ ਕਿਸਾਨਾਂ ਨੂੰ ਉਨ੍ਹਾਂ ਦੇ ਹੱਕਾਂ ਤੇ ਹਿਤਾਂ ਲਈ ਜਾਗਰੂਕ ਕਰਦਾ ਰਹਿੰਦਾ ਸੀ।
