ਅਰੁਣਾਂਚਲ ਪ੍ਰਦੇਸ਼ ਦੇ ਸਾਬਕਾ ਮੁੱਖ ਮੰਤਰੀ ਵਲੋਂ ‘ਖ਼ੁਦਕੁਸ਼ੀ’

ਈਟਾਨਗਰ,: ਅਰੁਣਾਂਚਲ ਪ੍ਰਦੇਸ਼ ਦੇ ਸਾਬਕਾ ਮੁੱਖ ਮੰਤਰੀ ਅਤੇ ਕਾਂਗਰਸ ਦੇ ਬਾਗ਼ੀ ਕਲਿਖੋ ਪੁਲ ਨੇ ਅੱਜ ਕਥਿਤ ਤੌਰ ‘ਤੇ ਖ਼ੁਦਕੁਸ਼ੀ ਕਰ ਲਈ। ਪਿਛਲੇ ਮਹੀਨੇ ਸੁਪਰੀਮ ਕੋਰਟ ਵਲੋਂ ਪੁਲ ਦੀ ਸਰਕਾਰ ਨੂੰ ਹਟਾਏ ਜਾਣ ਦਾ ਆਦੇਸ਼ ਦਿਤੇ ਜਾਣ ਤੋਂ ਬਾਅਦ ਉਨ੍ਹਾਂ ਨੇ ਇਹ ਅਹੁਦਾ ਛੱਡ ਦਿਤਾ ਸੀ। ਪੁਲਿਸ ਨੇ ਮੁੱਖ ਮੰਤਰੀ ਵਾਲੇ ਅਪਣੇ ਸਰਕਾਰੀ ਘਰ ‘ਚ ਇਹ ਕਦਮ ਚੁਕਿਆ ਜਿਹੜਾ ਉਸ ਨੇ ਹਾਲੇ ਖ਼ਾਲੀ ਨਹੀਂ ਕੀਤਾ ਸੀ।
ਪੁਲ ਦੀ ਮੌਤ ਦੀ ਖ਼ਬਰ ਫੈਲਦਿਆਂ ਹੀ ਉਨ੍ਹਾਂ ਦੇ ਸਮਰਥਕਾਂ ਨੇ ਮੌਜੂਦਾ ਮੁੱਖ ਮੰਤਰੀ ਪੇਮਾ ਖਾਂਡੂ ਦੇ ਨੀਤੀ ਵਿਹਾਰ ਇਲਾਕੇ ਵਿਚ ਬਣੇ ਬੰਗਲੇ ਦਾ ਘਿਰਾਉ ਕੀਤਾ। ਸਮਰਥਕਾਂ ਨੇ ਪੁਲ ਦੀ ‘ਗ਼ੈਰ-ਕੁਦਰਤੀ’ ਮੌਤ ਦੀ ਜਾਂਚ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਨੇ ਉਪ ਮੁੱਖ ਮੰਤਰੀ ਦੀ ਉਸਾਰੀ ਅਧੀਨ ਇਮਾਰਤ ਨੂੰ ਅੱਗ ਲਾ ਦਿਤੀ ਅਤੇ ਦੋ ਸਰਕਾਰੀ ਬੰਗਲਿਆਂ ਨੂੰ ਨੁਕਸਾਨ ਪਹੁੰਚਾਇਆ। ਪੁਲੀਸ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਕਿਹਾ ਕਿ 47 ਸਾਲਾ ਪੁਲ ਨੇ ਅਪਣੇ ਬੈੱਡਰੂਮ ਵਿਚ ਪੱਖੇ ਨਾਲ ਲਟਕ ਕੇ ਖ਼ੁਦਕੁਸ਼ੀ ਕਰ ਲਈ।