ਸਵਾਮੀ ਅਗਨੀਵੇਸ਼ ਉੱਤੇ ਹਮਲੇ ਖ਼ਿਲਾਫ਼ ਸਰੀ ਵਿੱਚ ਹੋਈ ਰੋਸ ਰੈਲੀ

ਇੱਥੇ ਹੌਲੈਂਡ ਪਾਰਕ ਵਿੱਚ ਦੱਖਣੀ ਏਸ਼ਿਆਈ ਕਾਰਕੁਨਾਂ ਨੇ ਸਵਾਮੀ ਅਗਨੀਵੇਸ਼ ਉੱਤੇ ਹਿੰਦੂਤਵਵਾਦੀਆਂ ਵੱਲੋਂ ਕੀਤੇ ਹਮਲੇ ਖ਼ਿਲਾਫ਼ ਰੋਸ ਰੈਲੀ ਕੀਤੀ ਅਤੇ ਕਿਹਾ ਕਿ ਸਭ ਨੂੰ ਰਲ ਕੇ ਅਜਿਹੀ ਬੁਰਛਾਗਰਦੀ ਖ਼ਿਲਾਫ਼ ਡਟਣਾ ਚਾਹੀਦਾ ਹੈ।ਇੰਡੀਅਨਜ਼ ਐਬਰੌਡ ਫਾਰ ਪਲੂਰਿਲਿਸਟ ਇੰਡੀਆ (ਆਈਏਪੀਆਈ) ਵੱਲੋਂ ਕਰਵਾਈ ਇਸ ਰੈਲੀ ਵਿੱਚ ਵੱਖ ਵੱਖ ਵਿਚਾਰਾਂ ਨਾਲ ਜੁੜੇ ਕਾਰਕੁਨਾਂ ਅਤੇ ਲੋਕਾਂ ਨੇ ਸ਼ਿਰਕਤ ਕੀਤੀ। ਸਾਰਿਆਂ ਨੇ ਧਰਮ ਨਿਰਪੱਖ ਲੋਕਾਂ ਉੱਤੇ ਕੱਟੜਪੰਥੀਆਂ ਦੇ ਹਮਲਿਆਂ ਦੀ ਨਿਖੇਧੀ ਕੀਤੀ ਗਈ ਅਤੇ ਕਿਹਾ ਕਿ ਇਹ ਸਾਰਾ ਕੁਝ ਸੱਤਾਧਾਰੀ ਭਾਜਪਾ ਦੀ ਸ਼ਹਿ ਉੱਤੇ ਕੀਤਾ ਜਾ ਰਿਹਾ ਹੈ। ਸਵਾਮੀ ਅਗਨੀਵੇਸ਼ ਦੇ ਸਾਥੀ ਅਚਾਰੀਆ ਐੱਸਪੀ ਦਿਵੇਦੀ ਜੋ ਖੁਦ ਹਿੰਦੂ ਪ੍ਰਚਾਰਕ ਹਨ, ਨੇ ਕਿਹਾ ਕਿ ਸਵਾਮੀ ਅਗਨੀਵੇਸ਼ ਸਦਾ ਹੀ ਘੱਟ ਗਿਣਤੀਆਂ ਅਤੇ ਨਿਮਾਣਿਆਂ ਦੇ ਹੱਕ ਵਿੱਚ ਡਟਦੇ ਰਹੇ ਹਨ। ਉਨ੍ਹਾਂ ਉੱਤੇ ਹਮਲੇ ਦੇ ਅਰਥ ਹੈ ਕਿ ਤਰਕ ਦੀ ਆਵਾਜ਼ ਨੂੰ ਦਬਾਇਆ ਜਾ ਰਿਹਾ ਹੈ। ਇਸ ਰੋਸ ਰੈਲੀ ਦੀ ਸ਼ੁਰੂਆਤ ਪੱਤਰਕਾਰ ਗੌਰੀ ਲੰਕੇਸ਼ ਜਿਸ ਨੂੰ ਹਿੰਦੂਤਵਵਾਦੀਆਂ ਨੇ ਬੰਗਲੌਰ ਵਿੱਚ ਮਾਰ-ਮੁਕਾਇਆ ਸੀ, ਨੂੰ ਸਮਰਪਿਤ ਕਵਿਤਾ ਨਾਲ ਹੋਈ।ਕਵੀ ਅੰਮ੍ਰਿਤ ਦੀਵਾਨਾ ਨੇ ਕਿਹਾ ਕਿ ਸਵਾਮੀ ਅਗਨੀਵੇਸ਼ ਉਤੇ ਹਮਲਾ ਇਕੱਲਾ-ਇਕਹਿਰਾ ਹਮਲਾ ਨਹੀਂ। ਇਸ ਤੋਂ ਪਹਿਲਾਂ ਤਰਕਸ਼ੀਲਾਂ, ਬੁੱਧੀਜੀਵੀਆਂ ਅਤੇ ਹੋਰ ਕਾਰਕੁਨਾਂ ਉਤੇ ਹਮਲੇ ਲਗਾਤਾਰ ਹੋਏ ਹਨ। ਆਈਏਪੀਆਈ ਵੱਲੋਂ ਗੁਰਪ੍ਰੀਤ ਸਿੰਘ ਨੇ ਸਪਸ਼ਟ ਕੀਤਾ ਕਿ ਜਥੇਬੰਦੀ ਦਾ ਮਕਸਦ ਸਿਰਫ ਭਾਜਪਾ ਦੀ ਨੁਕਤਾਚੀਨੀ ਨਹੀਂ ਹੈ, ਇਹ ਜਥੇਬੰਦੀ ਕਾਂਗਰਸ ਦੀ ਮਾੜੀ ਸਿਆਸਤ ਦਾ ਵੀ ਇੰਨੇ ਹੀ ਜ਼ੋਰ ਨਾਲ ਵਿਰੋਧ ਕਰਦੀ ਰਹੀ ਹੈ।ਇਸ ਮੌਕੇ ਸਈਅਦ ਵਜਾਹਤ, ਇਮਤਿਆਜ਼ ਪੋਪਟ, ਰੂਪ ਲਾਲ ਗੱਡੂ, ਰਸ਼ਪਾਲ ਸਿੰਘ ਭਾਰਦਵਾਜ, ਹਰਪ੍ਰੀਤ ਦੌਧਰੀਆ, ਅਵਤਾਰ ਗਿੱਲ, ਪਰਮਿੰਦਰ ਕੌਰ ਸਵੈਚ, ਭੁਪਿੰਦਰ ਮੱਲ੍ਹੀ ਅਤੇ ਸਿੱਖ ਬਰੌਡਕਾਸਟਰ ਹਰਪ੍ਰੀਤ ਸਿੰਘ ਨੇ ਸੰਬੋਧਨ ਕੀਤਾ।