ਸਰੀ,(ਬਿਊਰੋ)— ਕੈਨੇਡਾ ਦੇ ਸੂਬੇ ਬ੍ਰਿਟਿਸ਼ ਕੋਲੰਬੀਆ ‘ਚ 30 ਸਾਲਾ ਪੰਜਾਬੀ ਨੌਜਵਾਨ ਨੂੰ ਸੜਕ ਹਾਦਸੇ ‘ਚ ਇਕ 19 ਸਾਲਾ ਕੁੜੀ ਨੂੰ ਜ਼ਖਮੀ ਕਰਕੇ ਦੌੜਨ ਦਾ ਦੋਸ਼ੀ ਠਹਿਰਾਇਆ ਗਿਆ ਹੈ। ਇਸ ਦੀ ਪਛਾਣ ਮਨਜੀਤ ਸਿੰਘ ਦੇ ਨਾਂ ਤੋਂ ਹੋਈ ਹੈ, ਜੋ ਕੈਨੇਡਾ ਦੇ ਸ਼ਹਿਰ ਸਰੀ ਦਾ ਰਹਿਣ ਵਾਲਾ ਹੈ। ਪੁਲਸ ਨੇ ਦੱਸਿਆ ਕਿ ਹਿੱਟ ਐਂਡ ਰਨ ਮਾਮਲੇ ਦਾ ਦੋਸ਼ੀ ਮਨਜੀਤ ਸ਼ੁੱਕਰਵਾਰ ਨੂੰ ਕਿੰਗ ਜੌਰਜ ਬੋਲਵਰਡ ਅਤੇ 96 ਅਵੈਨਿਊ ਤੋਂ ਗੱਡੀ ‘ਚ ਜਾ ਰਿਹਾ ਸੀ। ਰਹਾਇਆ ਗ੍ਰਾਂਟ ਨਾਂ ਦੀ ਕੁੜੀ ਇੱਥੋਂ ਲੰਘ ਰਹੀ ਸੀ। ਲਾਲ ਬੱਤੀ ਹੋਣ ਮਗਰੋਂ ਮਨਜੀਤ ਨੇ ਗੱਡੀ ਕੱਢੀ ਅਤੇ ਉਸ ਦੀ ਗੱਡੀ ਇਸ ਕੁੜੀ ਨਾਲ ਟਕਰਾ ਗਈ। ਕੁੜੀ ਜ਼ਖਮੀ ਹੋ ਕੇ ਹੇਠਾਂ ਡਿੱਗ ਗਈ ਪਰ ਉਸ ਨੂੰ ਬਚਾਉਣ ਦੀ ਥਾਂ ਉਹ ਘਟਨਾ ਵਾਲੀ ਥਾਂ ਤੋਂ ਫਰਾਰ ਹੋ ਗਿਆ।
ਪੁਲਸ ਨੇ ਕਿਹਾ ਸੀ ਕਿ ਉਸ ਨੇ ਇਹ ਗਲਤੀ ਕੀਤੀ ਹੈ ਕਿ ਉਸ ਜ਼ਖਮੀ ਨੂੰ ਦੇਖਣ ਦੀ ਥਾਂ ਉਹ ਦੌੜ ਗਿਆ। ਅਧਿਕਾਰੀਆਂ ਨੇ ਕਿਹਾ ਕਿ ਇਹ ਨਵਾਂ ਮਾਮਲਾ ਨਹੀਂ ਹੈ ਪਹਿਲਾਂ ਵੀ ਕਈ ਲੋਕ ਅਜਿਹਾ ਹੀ ਕਰਦੇ ਰਹੇ ਹਨ ਅਤੇ ਦੁਰਘਟਨਾ ਵਾਪਰਨ ਮਗਰੋਂ ਉਹ ਜ਼ਖਮੀ ਵਿਅਕਤੀਆਂ ਦੀ ਪਰਵਾਹ ਨਹੀਂ ਕਰਦੇ। ਹਰ ਕੋਈ ਆਪਣੀ ਲਾਪਰਵਾਹੀ ਨੂੰ ਲੁਕਾਉਣ ਦੀ ਕੋਸ਼ਿਸ਼ ਕਰਦਾ ਹੈ। ਪਰਿਵਾਰ ਨੇ ਦੱਸਿਆ ਕਿ ਇਸ ਕੁੜੀ ਦੀ ਹਾਲਤ ਨਾਜ਼ੁਕ ਹੈ ਅਤੇ ਇਲਾਜ ਚੱਲ ਰਿਹਾ ਹੈ। ਨਿਊ ਵੈੱਸਟਮਿਨਸਟਰ ਦੇ ਰਾਇਲ ਕੋਲੰਬੀਅਨ ਹਸਪਤਾਲ ‘ਚ ਇਸ ਦਾ ਇਲਾਜ ਚੱਲ ਰਿਹਾ ਹੈ। ਮੰਗਲਵਾਰ ਨੂੰ ਕੁੜੀ ਦੇ ਇਲਾਜ ਲਈ ਮਦਦ ਰਾਸ਼ੀ ਇਕੱਠੀ ਕਰਨ ਲਈ ਇਕ ਪੇਜ਼ ਬਣਾਇਆ ਗਿਆ ਹੈ। ਪਰਿਵਾਰ ਵਾਲਿਆਂ ਨੇ ਅਪੀਲ ਕੀਤੀ ਹੈ ਕਿ ਗੱਡੀਆਂ ਵਾਲਿਆਂ ਨੂੰ ਪੈਦਲ ਚੱਲਣ ਵਾਲਿਆਂ ਦਾ ਵੀ ਧਿਆਨ ਰੱਖਣਾ ਚਾਹੀਦਾ ਹੈ ਤਾਂ ਕਿ ਉਨ੍ਹਾਂ ਦੀ ਧੀ ਵਾਂਗ ਹੋਰ ਕੋਈ ਅਜਿਹੀ ਹਾਲਤ ‘ਚ ਨਾ ਪੁੱਜੇ।
