ਪੁਲਿਸ ਨੇ ਤਿੰਨ ਔਰਤਾਂ ਸਮੇਤ ਸੱਤ ਵਿਅਕਤੀਆਂ ਖ਼ਿਲਾਫ਼ ਕੀਤਾ ਮਾਮਲਾ ਦਰਜ
ਡੇਰਾਬੱਸੀ,: ਡੇਰਾਬੱਸੀ ਨਗਰ ਕੌਂਸਲ ਤਹਿਤ ਪੈਂਦੇ ਪਿੰਡ ਮੀਰਪੁਰ ਦੇ ਗਧੀਲੇ ਬਿਰਾਦਰੀ ਵਾਲੇ ਮਹੁੱਲੇ ‘ਚ ਦਲਿਤ ਪਰਿਵਾਰ ਨਾਲ ਮਾਰਕੁੱਟ ਤੇ ਪਰਿਵਾਰ ਦੀ 50 ਸਾਲਾ ਔਰਤ ਨੂੰ ਕੱਪੜੇ ਉਤਾਰ ਪਿੰਡ ‘ਚ ਘੁਮਾਉਣ ਤੇ ਉਸ ਦੀ ਵੀਡੀਓ ਬਣਾਉਣ ਦਾ ਮੰਦਭਾਗਾ ਮਾਮਲਾ ਸਾਹਮਣੇ ਆਇਆ ਹੈ।ਪੁਲਿਸ ਨੇ ਵੀਡੀਓ ਆਪਣੇ ਕਬਜ਼ੇ ‘ਚ ਲੈ ਕੇ ਤਿੰਨ ਔਰਤਾਂ ਸਣੇ ਸੱਤ ਵਿਅਕਤੀਆਂ ਵਿਰੁੱਧ ਮਾਮਲਾ ਦਰਜ ਕਰ ਲਿਆ ਹੈ।ਦਰਅਸਲ ਪੀੜਤਾ ਪਰਿਵਾਰ ਦਾ ਪੁੱਤਰ ਇਕ ਨਾਬਾਲਿਗ ਕੁੜੀ ਨੂੰ ਭਜਾ ਕੇ ਲੈ ਗਿਆ ਸੀ। ਲੜਕੀ ਪਰਿਵਾਰ ਨੇ ਲੜਕੇ ਦੇ ਮਾਪਿਆਂ ਅਤੇ ਭਰਾ ਨੂੰ ਬੰਦੀ ਬਣਾ ਕੇ ਮਾਰਕੁੱਟ ਕੀਤੀ। ਤਿੰਨਾਂ ਨੂੰ ਡੇਰਾਬੱਸੀ ਦੇ ਸਿਵਲ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ। ਥਾਣਾ ਮੁਖੀ ਦੀਪਇੰਦਰ ਸਿੰਘ ਨੇ ਦੱਸਿਆ ਕਿ ਪੀੜਤਾਂ ਦੇ ਬਿਆਨ ‘ਚ ਨਾਮਜ਼ਦ ਤਿੰਨ ਔਰਤਾਂ ਸਮੇਤ ਸੱਤ ਵਿਅਕਤੀਆਂ ਖ਼ਿਲਾਫ਼ ਆਈਪੀਸੀ ਦੀ ਧਾਰਾ 354, 354ਬੀ, 341, 323 ਅਤੇ 506 ਤਹਿਤ ਮਾਮਲਾ ਦਰਜ ਕਰਕੇ ਵੀਡੀਓ ਜ਼ਬਤ ਕਰ ਲਈ ਹੈ।ਦੂਜੇ ਪਾਸੇ ਕੁੜੀ ਦੇ ਪਰਿਵਾਰ ਵਾਲਿਆਂ ਨੇ ਨਾਬਾਲਿਗ ਲੜਕੀ ਦੇ ਗਹਿਣਿਆਂ ਅਤੇ ਪੈਸੇ ਸਮੇਤ ਭਜਾ ਕੇ ਲੈ ਜਾਣ ਦੀ ਸ਼ਿਕਾਇਤ ਬਾਅਦ ‘ਚ ਦਰਜ ਕਰਵਾਈ ਹੈ।