ਕੈਨੇਡਾ : ਕਾਰ ‘ਚੋਂ ਮ੍ਰਿਤਕ ਮਿਲਿਆ 3 ਸਾਲਾ ਮੁੰਡਾ, ਜਾਂਚ ‘ਚ ਜੁੱਟੀ ਪੁਲਸ

ਬਰਲਿੰਗਟਨ— ਕੈਨੇਡਾ ਦੇ ਸ਼ਹਿਰ ਬਰਲਿੰਗਟਨ ‘ਚ ਬੁੱਧਵਾਰ ਦੀ ਸ਼ਾਮ ਨੂੰ ਪੁਲਸ ਨੂੰ ਇਕ ਕਾਰ ‘ਚੋਂ 3 ਸਾਲਾ ਮੁੰਡਾ ਮ੍ਰਿਤਕ ਮਿਲਿਆ। ਇਕ ਪੁਲਸ ਅਧਿਕਾਰੀ ਨੇ ਦੱਸਿਆ ਕਿ ਸਥਾਨਕ ਨੌਰਥ ਸਰਵਿਸ ਰੋਡ ਨੇੜੇ ਹਾਈਵੇਅ-407, ਕਰਾਸਰੋਡਸ ਕ੍ਰਿਸ਼ਚੀਅਨ ਕਮਿਊਨੀਕੇਸ਼ਨਜ਼ ਸੈਂਟਰ ਦੇ ਪਾਰਕਿੰਗ ਏਰੀਏ ‘ਚੋਂ ਤਕਰੀਬਨ 5.30 ਵਜੇ ਫੋਨ ‘ਤੇ ਪੁਲਸ ਅਤੇ ਪੈਰਾ-ਮੈਡੀਕਲ ਅਧਿਕਾਰੀਆਂ ਨੂੰ ਇਸ ਘਟਨਾ ਬਾਰੇ ਸੂਚਨਾ ਮਿਲੀ। ਉਨ੍ਹਾਂ ਦੱਸਿਆ ਕਿ ਘਟਨਾ ਵਾਲੀ ਥਾਂ ‘ਤੇ ਪੁੱਜੇ ਐਮਰਜੈਂਸੀ ਅਤੇ ਪੈਰਾ-ਮੈਡੀਕਲ ਅਧਿਕਾਰੀਆਂ ਨੇ ਮੁੰਡੇ ਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ। ਪੁਲਸ ਨੇ ਇਸ ਘਟਨਾ ਦੇ ਸੰਬੰਧ ‘ਚ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਫੋਰੈਂਸਿਕ ਅਧਿਕਾਰੀਆਂ ਨੂੰ ਮਦਦ ਲਈ ਬੁਲਾਇਆ ਹੈ। ਪੁਲਸ ਤੁਰੰਤ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕਰ ਸਕੀ ਕਿ ਮੁੰਡੇ ਦੀ ਮੌਤ ਕਿਵੇਂ ਹੋਈ।