ਹਾਸ-ਵਿਅੰਗ: ਚਿੜੀਆ ਘਰ

ਇਕ ਵਾਰ ਇਕ ਵਿਅਕਤੀ ਨੇ ਚਿੜੀਆ ਘਰ ਬਣਾ ਕੇ ਉਸ ਦਾ ਟਿਕਟ 200 ਰੁਪਏ ਪ੍ਰਤੀ ਵਿਅਕਤੀ ਰੱਖ ਦਿੱਤਾ। ਪ੍ਰੰਤੂ ਚਿੜੀਆ ਘਰ ਵੇਖਣ ਲਈ ਮਹੀਨੇ ਵਿਚ 1-2 ਲੋਕ ਹੀ ਆਏ। ਉਸ ਨੇ ਟਿਕਟ ਘਟਾ ਕੇ 100 ਰੁਪਏ ਕਰ ਦਿੱਤੀ ਅਤੇ ਚਿੜੀਆ ਘਰ ਵੇਖਣ ਲਈ ਮਹੀਨੇ ਵਿਚ 4-5 ਲੋਕ ਹੀ ਆਏ। ਉਸ ਨੇ ਫਿਰ ਟਿਕਟ 50 ਰੁਪਏ ਦੀ ਕਰ ਦਿੱਤੀ ਅਤੇ ਕੇਵਲ 5-6 ਲੋਕ ਹੀ ਮਹੀਨੇ ਵਿਚ ਉਥੇ ਆਏ। ਬਾਅਦ ਵਿਚ ਉਸ ਨੇ ਟਿਕਟ ਘਟਾ ਕੇ 25 ਰੁਪਏ ਕਰ ਦਿੱਤੀ, ਪ੍ਰੰਤੂ ਫਿਰ ਵੀ ਲੋਕਾਂ ਦੀ ਆਮਦ ਵਿਚ ਜ਼ਿਆਦਾ ਵਾਧਾ ਨਾ ਹੋਇਆ। ਅਖੀਰ ਵਿਚ ਉਸ ਨੇ ਤੰਗ ਆ ਕੇ ਚਿੜੀਆ ਘਰ ਵਿਚ ਆਉਣ ਨੂੰ ਮੁਫ਼ਤ ਕਰ ਦਿੱਤਾ ਅਤੇ ਪਹਿਲੇ ਦਿਨ ਹੀ ਲੋਕਾਂ ਦੀ ਏਨੀ ਭੀੜ ਹੋਈ ਕਿ ਪੈਰ ਰੱਖਣ ਨੂੰ ਥਾਂ ਨਹੀਂ ਸੀ। ਜਦੋਂ ਚਿੜੀਆ ਘਰ ਨੱਕੋ-ਨੱਕ ਭਰ ਗਿਆ ਤਾਂ ਉਸ ਨੇ ਚਿੜੀਆ ਘਰ ਦਾ ਗੇਟ ਬੰਦ ਕਰ ਕੇ ਤਾਲਾ ਲਗਾ ਦਿੱਤਾ ਅਤੇ ਨਾਲ ਹੀ ਅਨਾਊਂਸ ਕਰ ਦਿੱਤਾ ਕਿ ਚਿੜੀਆ ਘਰ ਵਿਚ ਸ਼ਾਮਿਲ 10 ਸ਼ੇਰ ਥੋੜ੍ਹੇ ਹੀ ਸਮੇਂ ਬਾਅਦ ਬਾਹਰ ਛੱਡੇ ਜਾਣਗੇ ਅਤੇ ਜਿਸ ਨੇ ਬਾਹਰ ਜਾਣਾ ਹੈ ਉਹ 300 ਰੁਪਏ ਦੀ ਟਿਕਟ ਲੈ ਕੇ ਬਾਹਰ ਜਾ ਸਕਦਾ ਹੈ। ਲੋਕਾਂ ਨੇ ਘਬਰਾਉਂਦੇ ਹੋਏ 300 ਰੁਪਏ ਦੀ ਟਿਕਟ ਲੈ ਕੇ ਬਾਹਰ ਜਾਣ ਨੂੰ ਵਧੇਰੇ ਤਰਜੀਹ ਦਿੱਤੀ ਅਤੇ ਘੰਟਿਆਂ ਵਿਚ ਹੀ ਚਿੜੀਆ ਘਰ ਪੂਰੀ ਤਰ੍ਹਾਂ ਨਾਲ ਖਾਲੀ ਹੋ ਗਿਆ। ਇਸ ਤਰ੍ਹਾਂ ਚਿੜੀਆ ਘਰ ਦੇ ਮਾਲਕ ਨੇ ਅਗਲੀ-ਪਿਛਲੀ ਸਾਰੀ ਰਕਮ ਚਲਾਕੀ ਨਾਲ ਵਸੂਲ ਕਰ ਲਈ।