ਚੰਡੀਗੜ੍ਹ,- ਪੰਜਾਬ ਦੇ ਲੋਕਲ ਬਾਡੀਜ਼ ਮੰਤਰੀ ਨਵਜੋਤ ਸਿੰਘ ਸਿੱਧੂ ਨੇ ਕੱਲ੍ਹ ਕਿਹਾ ਕਿ ਭਾਰਤ ਸਰਕਾਰ ਅਤੇ ਸਬੰਧਤ ਅਧਿਕਾਰੀਆਂ ਨੇ ਅੰਮ੍ਰਿਤਸਰ ਹਵਾਈ ਅੱਡੇ ਦੀ ਕਮਾਈ ਖੋਹ ਕੇ ਦਿੱਲੀ ਹਵਾਈ ਅੱਡੇ ਉੱਤੇ ਇਕ ਨਿੱਜੀ ਕੰਪਨੀ ਕੋਲ ਪਹੁੰਚਾ ਦਿੱਤੀ ਹੈ।
ਤਿੱਖੇ ਤੇਵਰ ਦਿਖਾਉਂਦੇ ਹੋਏ ਨਵਜੋਤ ਸਿੰਘ ਸਿੱਧੂ ਨੇ ਕਿਹਾ ਕਿ ਉਡਾਣ ਜਿਸ ਹਵਾਈ ਅੱਡੇ ਤੋਂ ਸ਼ੁਰੂ ਹੁੰਦੀ ਹੈ, ਕਾਰਗੋ ਵੀ ਉਥੋਂ ਹੀ ਆਉਂਦਾ ਹੁੰਦਾ ਹੈ। ਅੰਮ੍ਰਿਤਸਰ ਏਅਰਪੋਰਟ ਤੋਂ ਜਦੋਂ ਬਰਮਿੰਘਮ ਲਈ ਸਿੱਧੀ ਉਡਾਣ ਚੱਲਦੀ ਹੁੰਦੀ ਸੀ ਤਾਂ ਉਸ ਦੀਆਂ 90 ਫੀਸਦੀ ਟਿਕਟਾਂ ਵਿਕ ਜਾਂਦੀਆਂ ਸਨ। ਸਰਕਾਰ ਨੇ ਇਸ ਉਡਾਣ ਨੂੰ ਦਿੱਲੀ ਦੇ ਹਵਾਈ ਅੱਡੇ ਤੋਂ ਸ਼ੁਰੂ ਕਰਵਾ ਦਿੱਤਾ। ਇਸ ਨਾਲ ਅੰਮ੍ਰਿਤਸਰ ਦੇ ਹਿੱਸੇ ਦਾ ਕਾਰਗੋ ਵੀ ਦਿੱਲੀ ਸ਼ਿਫਟ ਹੋ ਗਿਆ। ਪੰਜਾਬ ਦੇ ਲੋਕਾਂ ਨੂੰ ਉਡਾਣ ਲੈਣ ਦਿੱਲੀ ਜਾਣਾ ਪੈਂਦਾ ਹੈ, ਬਰਮਿੰਘਮ ਅੰਮ੍ਰਿਤਸਰ ਤੋਂ ਨੇੜੇ ਤੇ ਕਿਰਾਇਆ ਘੱਟ ਹੈ, ਪਰ ਦਿੱਲੀ ਤੋਂ ਉਡਣ ਨਾਲ ਏਥੋਂ ਪਹਿਲਾਂ ਦਿੱਲੀ ਤੇ ਫਿਰ ਓਥੋਂ ਦੀ ਬਰਮਿੰਘਮ ਯਾਤਰਾ ਲੰਬੀ ਹੋ ਜਾਂਦੀ ਤੇ ਕਿਰਾਇਆ ਜ਼ਿਆਦਾ ਬਣ ਜਾਂਦਾ ਹੈ। ਅੰਮ੍ਰਿਤਸਰ ਬਚਾਓ ਮੰਚ ਦੇ ਸਰਪ੍ਰਸਤ ਅੰਕੁਰ ਨੇ ਦੱਸਿਆ ਕਿ ਪਹਿਲਾਂ ਅੰਮ੍ਰਿਤਸਰ ਦੇ ਕਿਸਾਨ ਰੋਜ਼ ਚਾਰ ਟਨ ਸਬਜ਼ੀਆਂ ਬਾਹਰ ਭੇਜਦੇ ਸਨ, ਹੁਣ ਉਹ ਕਾਰੋਬਾਰ ਬੰਦ ਹੋ ਗਿਆ ਹੈ। ਕਿਸੇ ਵੀ ਸ਼ਹਿਰ ਵਿੱਚ ਜੀ ਡੀ ਪੀ ਉਸ ਸ਼ਹਿਰ ਦੇ ਏਅਰਪੋਰਟ ਨਾਲ ਜੁੜੀ ਹੁੰਦੀ ਹੈ। ਦੋਆਬੇ ਦੇ ਲੋਕਾਂ ਨੂੰ ਅੰਮ੍ਰਿਤਸਰ ਦੀ ਬਜਾਏ ਦਿੱਲੀ ਉਡਾਣ ਫੜਨ ਜਾਣਾ ਪੈਂਦਾ ਹੈ। ਨਵਜੋਤ ਸਿੰਘ ਸਿੱਧੂ ਨੇ ਕਿਹਾ ਕਿ ਕੇਸ ਅਦਾਲਤ ਦੇ ਵਿਚਾਰ ਅਧੀਨ ਹੈ, ਇਸ ਲਈ ਉਹ ਜ਼ਿਆਦਾ ਟਿੱਪਣੀ ਨਹੀਂ ਕਰ ਸਕਦੇ, ਪਰ ਅੰਮ੍ਰਿਤਸਰ ਦੀ ਉਡਾਣ ਅੰਮ੍ਰਿਤਸਰ ਤੋਂ ਹੀ ਸ਼ੁਰੂ ਹੋਵੇ ਤਾਂ ਹਵਾਈ ਅੱਡੇ ਨੂੰ ਸਾਲ ‘ਚ 10 ਕਰੋੜ ਦਾ ਫਾਇਦਾ ਹੋਵੇਗਾ। ਅਜੇ ਏਅਰਪੋਰਟ 15 ਕਰੋੜ ਦੇ ਘਾਟੇ ‘ਚ ਚੱਲ ਰਿਹਾ ਹੈ। ਲੋਕਾਂ ਨੂੰ ਸਿੱਧਾ ਫਾਇਦਾ ਹੋਵੇਗਾ ਕਿ ਉਹ ਦਿੱਲੀ ਦੀ ਦੌੜ ਤੋਂ ਬਚਣਗੇ।
