ਰਾਜਾ ਵੜਿੰਗ ਦੇ ਸਾਥੀਆਂ ਦੀ ਗੁੰਡਾਗਰਦੀ, ਪੀੜਤ ਨੇ ਅੱਕ ਕੇ ਲਾਈ ਅੱਗ, ਜਾਂਚ ਦੇ ਹੁਕਮ

ਗਿੱਦੜਬਾਹਾ: ਇੱਥੋਂ ਦੇ ਇੱਕ ਸਬਜ਼ੀ ਵਿਕਰੇਤਾ ਵੱਲੋਂ ਕਾਂਗਰਸੀ ਆਗੂਆਂ ਨਾਲ ਜ਼ਮੀਨੀ ਵਿਵਾਦ ਕਾਰਨ ਪ੍ਰੇਸ਼ਾਨ ਹੋ ਕੇ ਖ਼ੁਦਕੁਸ਼ੀ ਦੀ ਕੋਸ਼ਿਸ਼ ਦੇ ਮਾਮਲੇ ਦੀ ਪੰਜਾਬ ਸਰਕਾਰ ਨੇ ਮੈਜਿਸਟ੍ਰੇਟ ਜਾਂਚ ਦੇ ਹੁਕਮ ਦਿੱਤੇ ਹਨ। ਯਾਦ ਰਹੇ ਕਿ ਇੱਥੋਂ ਦੇ ਲੰਬੀ ਰੋਡ ‘ਤੇ ਸਥਿਤ ਸਬਜ਼ੀ ਮੰਡੀ ‘ਚ ਸਬਜ਼ੀ ਦਾ ਅੱਡਾ ਲਾਉਣ ਵਾਲੇ ਮਨੀਸ਼ ਕੁਮਾਰ ਨਾਮਕ ਨੌਜਵਾਨ ਨੇ ਸੋਮਵਾਰ ਸ਼ਾਮ ਆਪਣੇ ਆਪ ਨੂੰ ਅੱਗ ਲੱਗਾ ਲਈ ਗਈ ਸੀ।
ਇਸ ਘਟਨਾ ਵਿੱਚ ਮੁਨੀਸ਼ ਕੁਮਾਰ 50 ਫ਼ੀਸਦੀ ਝੁਲਸ ਗਿਆ ਸੀ। ਇਸ ਸਮੇਂ ਉਹ ਹਸਪਤਾਲ ਵਿੱਚ ਇਲਾਜ ਅਧੀਨ ਹੈ। ਪੁਲਿਸ ਨੇ ਮੁਨੀਸ਼ ਦੇ ਬਿਆਨਾਂ ਦੇ ਆਧਾਰ ਉੱਤੇ ਸਥਾਨਕ ਕਾਂਗਰਸੀ ਵਰਕਰ, ਉਸ ਦੇ ਪੁੱਤਰ ਤੇ ਤਿੰਨ ਹੋਰਨਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਇਸ ਮਾਮਲੇ ਵਿੱਚ ਪੁਲਿਸ ਨੇ ਕਾਂਗਰਸੀ ਵਰਕਰ, ਉਸ ਦੇ ਪੁੱਤਰ ਤੇ ਤਿੰਨ ਹੋਰਨਾਂ ਖ਼ਿਲਾਫ਼ ਲੁੱਟ-ਖਸੁੱਟ, ਸੰਪਤੀ ਨੂੰ ਨੁਕਸਾਨ ਤੇ ਲੁੱਟਮਾਰ ਕਰਨ ਦੇ ਇਲਜ਼ਾਮ ਤਹਿਤ ਕੇਸ ਦਰਜ ਕੀਤਾ ਹੈ। ਮੁਨੀਸ਼ ਕੁਮਾਰ ਨੇ ਇਲਜ਼ਾਮ ਲਾਇਆ ਕਿ ਹਮਲਾਵਰ ਕਾਂਗਰਸੀ ਆਗੂ ਸਥਾਨਕ ਵਿਧਾਇਕ ਰਾਜ ਵੜਿੰਗ ਦੇ ਸਾਥੀ ਹਨ।
ਮੁਨੀਸ਼ ਨੇ ਸਥਾਨਕ ਕਾਂਗਰਸੀ ਆਗੂ ਰਾਜੇਸ਼ ਕੁਮਾਰ ‘ਬਿੱਟੂ’ (ਸਥਾਨਕ ਕੌਂਸਲਰ ਦਾ ਪਤੀ) ਰਾਧੇ ਸ਼ਿਆਮ ਛਾਬੜਾ, ਜਸਪ੍ਰੀਤ ਸਿੰਗ (ਰਾਜਾ ਵੜਿੰਗ ਦਾ ਨਿੱਜੀ ਪੀਏ) ਖ਼ਿਲਾਫ਼ ਬਿਆਨ ਦਿੱਤੇ ਹਨ। ਇਸ ਤੋਂ ਬਾਅਦ ਪੁਲਿਸ ਨੇ ਕਾਰਵਾਈ ਕੀਤੀ ਤੇ ਇਨ੍ਹਾਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਮੁਨੀਸ਼ ਨੇ ਦਿੱਤੇ ਆਪਣੇ ਬਿਆਨ ਵਿੱਚ ਦੋਸ਼ ਲਾਇਆ ਹੈ ਕਿ ਸਥਾਨਕ ਕਾਂਗਰਸੀ ਵਰਕਰ ਉਸ ਨੂੰ ਕਾਫ਼ੀ ਸਮੇਂ ਤੋਂ ਤੰਗ-ਪ੍ਰੇਸ਼ਾਨ ਕਰ ਰਹੇ ਸਨ। ਪੁਲਿਸ ਕੋਲ ਸ਼ਿਕਾਇਤ ਕੀਤੇ ਜਾਣ ਦੇ ਬਾਵਜੂਦ ਉਸ ਦੀ ਸੁਣਵਾਈ ਨਹੀਂ ਹੋ ਰਹੀ। ਯਾਦ ਰਹੇ ਕਿ ਸਥਾਨਕ ਪੱਤਰਕਾਰ ਦੀ ਕੁੱਟਮਾਰ ਦੇ ਮਾਮਲੇ ਵਿੱਚ ਰਾਜਾ ਵੜਿੰਗ ਦੇ ਸਾਥੀਆਂ ਦਾ ਨਾਮ ਆਉਣ ਤੋਂ ਪਹਿਲਾਂ ਹੀ ਵਿਵਾਦ ਗਰਮਾਇਆ ਹੋਇਆ ਸੀ।