ਵਿਸ਼ਵ ਯੁੱਧਾਂ ਦੇ ਸਿੱਖ ਫ਼ੌਜੀਆਂ ਦੀ ਯਾਦਗਾਰ ਉਸਾਰੀ ਦੀ ਮੰਗ ਨੂੰ ਲੈ ਕੇ ਐਮ. ਪੀ. ਢੇਸੀ ਨੇ ਸੰਸਦ ‘ਚ ਲਿਆਂਦਾ ਮਤਾ

ਲੰਡਨ, (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਬਰਤਾਨੀਆ ਵਿਚ ਵਿਸ਼ਵ ਯੁੱਧਾਂ ਦੌਰਾਨ ਸ਼ਹੀਦ ਹੋਣ ਵਾਲੇ ਸਿੱਖ ਫ਼ੌਜੀਆਂ ਦੀ ਯਾਦਗਾਰ ਉਸਾਰਨ ਦੀ ਮੰਗ ਨੂੰ ਲੈ ਕੇ ਐਮ. ਪੀ. ਤਨਮਨਜੀਤ ਸਿੰਘ ਢੇਸੀ ਨੇ 19 ਦਸੰਬਰ ਨੂੰ ਅਰਲੀ ਡੇਅ ਮੋਸ਼ਨ ਦੇ ਮਤਾ ਨੰਬਰ 708 ਲਿਆਂਦਾ ਹੈ, ਜਿਸ ‘ਤੇ ਹੁਣ ਤੱਕ 113 ਸੰਸਦ ਮੈਂਬਰਾਂ ਨੇ ਹਮਾਇਤ ਵਜੋਂ ਦਸਤਖ਼ਤ ਕੀਤੇ ਹਨ।ਐਮ. ਪੀ. ਢੇਸੀ ਨੇ ਮਤੇ ਵਿਚ ਲਿਖਿਆ ਕਿ ਦੋਵੇਂ ਵਿਸ਼ਵ ਜੰਗਾਂ ਦੌਰਾਨ ਸਿੱਖ ਸਿਪਾਹੀਆਂ ਨੇ ਬਰਤਾਨੀਆ ਲਈ ਬਹਾਦਰੀ ਦਾ ਪ੍ਰਗਟਾਵਾ ਕਰਦਿਆਂ ਕੁਰਬਾਨੀਆਂ ਦਿੱਤੀਆਂ ਹਨ। ਇਨ੍ਹਾਂ ਸੂਰਬੀਰ ਯੋਧਿਆਂ ਦੀ ਯਾਦ ਵਿਚ ਕੇਂਦਰੀ ਲੰਡਨ ਵਿਚ ਕਿਸੇ ਥਾਂ ਰਾਸ਼ਟਰੀ ਯਾਦਗਾਰ ਉਸਾਰਨ ਲਈ ਇਕ ਦਹਾਕੇ ਤੋਂ ਵੱਧ ਸਮੇਂ ਤੋਂ ਮੰਗ ਕੀਤੀ ਜਾ ਰਹੀ ਹੈ। ਐਮ. ਪੀ. ਢੇਸੀ ਨੇ ਇਸ ਮਤੇ ਵਿਚ ਲੰਡਨ ਮੇਅਰ ਸਦੀਕ ਖ਼ਾਨ ਵਲੋਂ ਇਸ ਯਾਦਗਾਰ ਦੇ ਹੱਕ ਵਿਚ ਦਿੱਤੇ ਬਿਆਨ ਦਾ ਵੀ ਸਵਾਗਤ ਕੀਤਾ ਹੈ। ਭਾਰਤ ਵਿਚ ਬਿ੍ਟਿਸ਼ ਰਾਜ ਵੇਲੇ ਸਿੱਖਾਂ ਦੀ ਆਬਾਦੀ ਸਿਰਫ਼ 2 ਫ਼ੀਸਦੀ ਸੀ, ਜਦਕਿ ਫ਼ੌਜ ਵਿਚ ਸਿੱਖਾਂ ਦੀ ਗਿਣਤੀ 20 ਫ਼ੀਸਦੀ ਸੀ। ਇਨ੍ਹਾਂ ਵਿਸ਼ਵ ਯੁੱਧਾਂ ਦੌਰਾਨ 83,000 ਦਸਤਾਰਧਾਰੀ ਸਿੱਖ ਸ਼ਹੀਦ ਹੋਏ ਅਤੇ ਇਕ ਲੱਖ ਤੋਂ ਵੱਧ ਜ਼ਖ਼ਮੀ ਹੋਏ ਸਨ ḩ ਦੇਸ਼ ਦੀ ਆਜ਼ਾਦੀ ਲਈ ਸ਼ਹੀਦ ਹੋਏ ਇਨ੍ਹਾਂ ਯੋਧਿਆਂ ਦੀ ਯਾਦਗਾਰ ਸਥਾਪਤ ਕਰਨ ਲਈ ਸਰਕਾਰ ਕੋਲੋਂ ਮਦਦ ਦੀ ਮੰਗ ਕੀਤੀ ਹੈ ḩ ਇਸ ਸਬੰਧੀ ਗੱਲ ਕਰਦਿਆਂ ਢੇਸੀ ਨੇ ਕਿਹਾ ਕਿ ਇਸ ਮਤੇ ‘ਤੇ ਪਹਿਲੇ ਦਿਨ ਹੀ ਵੱਡੀ ਗਿਣਤੀ ਵਿਚ ਵੱਖ-ਵੱਖ ਪਾਰਟੀਆਂ ਦੇ ਸਾਥੀ ਸੰਸਦ ਮੈਂਬਰਾਂ ਵਲੋਂ ਦਸਤਖ਼ਤ ਕਰਕੇ ਸਹਿਯੋਗ ਦਿੱਤਾ ਗਿਆ ਹੈ। ਜਿਨ੍ਹਾਂ ਵਿਚ ਐਮ. ਪੀ. ਪ੍ਰੀਤ ਕੌਰ ਗਿੱਲ, ਐਮ. ਪੀ. ਸੀਮਾ ਮਲਹੋਤਰਾ, ਲੇਬਰ ਦੇ ਡਿਪਟੀ ਲੀਡਰ ਟੌਮ ਵਾਟਸਨ, ਜੌਹਨ ਮੈਕਡਾਨਲ ਸ਼ੈਡੋ ਖਜ਼ਾਨਾ ਮੰਤਰੀ, ਕਿੰਨ ਕਲਾਰਕ, ਡੌਮਨਿਕ ਗਰੀਵ, ਈਅਨ ਬਲੈਕ ਫੋਰਡ, ਨਾਈਜ਼ਲ ਡੋਡਸ, ਲੇਡੀ ਹਾਰਮਨ, ਕਾਰਲੋਲਾਈਨ ਲੂਕਾ, ਲਿਜ਼ ਸਵੇਲੇ ਰੌਬਰਟਸ, ਟਿੰਮ ਫਾਰੋਨ ਸ਼ਾਮਿਲ ਹਨ।