ਸਾਲ ਦੀ ਉਮਰ ‘ਚ ਐਮ ਜਾਨ ਹੈਰੀਸਨ ਨੇ ਜਿੱਤਿਆ 2026 ਦਾ ਬੁੱਕਰ ਪੁਰਸਕਾਰ, ਰਚਿਆ ਨਵਾਂ ਇਤਿਹਾਸ
ਲੰਡਨ: ਬ੍ਰਿਟਿਸ਼ ਲੇਖਕ ਐਮ ਜਾਨ ਹੈਰੀਸਨ ਨੇ ਸਾਹਿਤ ਦੀ ਦੁਨੀਆ ਵਿੱਚ ਇੱਕ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। 81 ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਨੇ ਆਪਣੇ ਨਾਵਲ 'ਦਿ ਐਂਡ ਆਫ਼ ਐਵਰੀਥਿੰਗ' (The End of Everything) ਲਈ ਸਾਲ 2026 ਦਾ ਵੱਕਾਰੀ ਬੁੱਕਰ ਪੁਰਸਕਾਰ ਜਿੱਤ ਲਿਆ ਹੈ। ਇਸ ਪ੍ਰਾਪਤੀ ਨਾਲ ਹੈਰੀਸਨ ਬੁੱਕਰ ਪੁਰਸਕਾਰ ਜਿੱਤਣ ਵਾਲੇ ਦੁਨੀਆ ਦੇ ਸਭ ਤੋਂ ਵੱਡੀ ਉਮਰ ਦੇ ਲੇਖਕ ਬਣ ਗਏ ਹਨ। ਦਿਲਚਸਪ ਗੱਲ ਇਹ ਹੈ ਕਿ ਅੰਤਿਮ ਸੂਚੀ ਵਿੱਚ ਸ਼ਾਮਲ ਛੇ ਕਿਤਾਬਾਂ ਵਿੱਚੋਂ ਉਨ੍ਹਾਂ ਦਾ ਇਹ ਨਾਵਲ ਸਭ ਤੋਂ ਛੋਟਾ ਸੀ, ਜਿਸ ਵਿੱਚ ਮਹਿਜ਼ 198 ਪੰਨੇ ਹਨ, ਪਰ ਫਿਰ ਵੀ ਜੱਜਾਂ ਨੇ ਸਰਬਸੰਮਤੀ ਨਾਲ ਇਸ ਨੂੰ ਜੇਤੂ ਐਲਾਨਿਆ।
ਲੰਡਨ ਵਿੱਚ ਆਯੋਜਿਤ ਇੱਕ ਸਮਾਗਮ ਦੌਰਾਨ ਹੈਰੀਸਨ ਨੂੰ ਇਹ ਸਨਮਾਨ ਭੇਟ ਕੀਤਾ ਗਿਆ। ਉਨ੍ਹਾਂ ਦਾ ਇਹ ਨਾਵਲ ਭਵਿੱਖ ਦੀ ਇੱਕ ਅਜਿਹੀ ਦੁਨੀਆ ਦੀ ਕਹਾਣੀ ਬਿਆਨ ਕਰਦਾ ਹੈ ਜੋ ਇੱਕ ਰਹੱਸਮਈ ਤਬਾਹੀ ਤੋਂ ਬਾਅਦ ਪੂਰੀ ਤਰ੍ਹਾਂ ਬਦਲ ਚੁੱਕੀ ਹੈ। ਕਹਾਣੀ ਫਿਲਿਪ ਟੈਨੈਂਟ ਅਤੇ ਉਸਦੀ ਬਜ਼ੁਰਗ ਚਾਚੀ ਮਾਰਨੀ ਦੇ ਦੁਆਲੇ ਘੁੰਮਦੀ ਹੈ, ਜੋ 'ਆਈਘੇਟੀ' ਨਾਮਕ ਲੋਕਾਂ ਦੇ ਹਮਲੇ ਤੋਂ ਬਾਅਦ ਦੇ ਹਾਲਾਤਾਂ ਦਾ ਸਾਹਮਣਾ ਕਰ ਰਹੇ ਹਨ। ਜੱਜਾਂ ਮੁਤਾਬਕ, ਇਹ ਕਿਤਾਬ ਨਿਰਾਸ਼ਾਜਨਕ ਹਾਲਾਤਾਂ ਦੇ ਬਾਵਜੂਦ ਪਾਠਕ ਦੇ ਮਨ ਵਿੱਚ ਉਮੀਦ ਦੀ ਇੱਕ ਕਿਰਨ ਜਗਾਉਂਦੀ ਹੈ ਅਤੇ ਚਿਹਰੇ 'ਤੇ ਮੁਸਕਾਨ ਲਿਆਉਂਦੀ ਹੈ।
ਬੁੱਕਰ ਪੁਰਸਕਾਰ 2026 ਦੇ ਜਿਊਰੀ ਮੈਂਬਰਾਂ ਦੀ ਮੁਖੀ, ਲੇਖਿਕਾ ਮੈਰੀ ਬੀਅਰਡ ਨੇ ਦੱਸਿਆ ਕਿ ਜੱਜਾਂ ਨੇ ਪੂਰਾ ਦਿਨ ਵਿਚਾਰ-ਵਟਾਂਦਰਾ ਕਰਨ ਤੋਂ ਬਾਅਦ ਹੈਰੀਸਨ ਦੀ ਕਿਤਾਬ ਨੂੰ ਸਭ ਤੋਂ ਵਧੀਆ ਮੰਨਿਆ। ਇਸ ਸਾਲ ਮੁਕਾਬਲੇ ਵਿੱਚ ਡਗਲਸ ਸਟੂਅਰਟ, ਮਾਰਲਨ ਜੇਮਸ, ਐਲਿਜ਼ਾਬੈਥ ਸਟਰਾਊਟ ਅਤੇ ਰੇਬੇਕਾ ਪੈਰੀ ਵਰਗੇ ਦਿੱਗਜ ਲੇਖਕ ਵੀ ਸ਼ਾਮਲ ਸਨ, ਪਰ ਹੈਰੀਸਨ ਨੇ ਸਾਰਿਆਂ ਨੂੰ ਪਛਾੜ ਦਿੱਤਾ।
ਪੁਰਸਕਾਰ ਜਿੱਤਣ ਤੋਂ ਬਾਅਦ ਭਾਵੁਕ ਹੋਏ ਹੈਰੀਸਨ ਨੇ ਕਿਹਾ ਕਿ ਲਗਭਗ 60 ਸਾਲਾਂ ਦੇ ਲਿਖਣ ਸਫ਼ਰ ਤੋਂ ਬਾਅਦ ਹੁਣ ਜਾ ਕੇ ਉਨ੍ਹਾਂ ਨੂੰ ਮਹਿਸੂਸ ਹੋਇਆ ਹੈ ਕਿ ਉਹ ਇੱਕ ਅਸਲੀ ਲੇਖਕ ਬਣ ਗਏ ਹਨ। ਉਨ੍ਹਾਂ ਦੀ ਇਸ ਜਿੱਤ ਨੇ ਸਾਬਤ ਕਰ ਦਿੱਤਾ ਹੈ ਕਿ ਕਿਤਾਬ ਦੀ ਅਹਿਮੀਅਤ ਉਸਦੇ ਪੰਨਿਆਂ ਦੀ ਗਿਣਤੀ ਨਾਲ ਨਹੀਂ, ਸਗੋਂ ਉਸਦੀ ਕਹਾਣੀ ਦੀ ਡੂੰਘਾਈ ਨਾਲ ਤੈਅ ਹੁੰਦੀ ਹੈ।
