ਪਹਿਲਾ ਸਿੱਖ ਤਾਮਿਲ ਗਾਇਕ ਬਣਿਆ ਲੁਧਿਆਣਾ ਦਾ ਜਸਕਰਨ ਸਿੰਘ

ਲੁਧਿਆਣਾ : ਸਿੱਖ ਨੌਜਵਾਨ ਜਸਕਰਨ ਸਿੰਘ ਪਹਿਲਾ ਸਿੱਖ ਤਾਮਿਲ ਗਾਇਕ ਬਣ ਗਿਆ ਹੈ। ਜਸਕਰਨ ਦਾ ਕਹਿਣਾ ਹੈ ਕਿ ਗਾਇਕੀ ਉਸ ਦਾ ਸ਼ੌਕ ਹੈ ਅਤੇ ਉਹ ਭਵਿੱਖ ਵਿਚ ਚੰਗਾ ਗਾÎਇਕ ਬਣ ਕੇ ਨਾਮ ਕਮਾਉਣਾ ਚਾਹੁੰਦਾ ਹੈ। ਦਸ ਦਈਏ ਕਿ 18 ਸਾਲਾਂ ਦਾ ਸਿੱਖ ਨੌਜਵਾਨ ਜਸਕਰਨ ਸਿੰਘ ਇਸ ਵਾਰ ਸਾਰੇਗਾਮਾਪਾ ਤਾਮਿਲ ਦਾ ਫਾਈਨਲਿਸਟ ਰਿਹਾ ਹੈ। ਫਾਈਨਲਿਸਟ ਰਹਿੰਦੇ ਹੋਏ ਉਹ ਚੌਥਾ ਸਥਾਨ ਹਾਸਲ ਕਰ ਚੁੱਕਾ ਹੈ। ਇਸ ਫਾਈਨਲ ਰਾਊਂਡ ਵਿਚ ਜਸਕਰਨ ਨੇ ਆਲਾ ਪੋਰਾਣਾ ਅਤੇ ਵੰਦੇ ਮਾਤਰਮ ਤਾਮਿਲ ਵਿਚ ਗਾਇਆ ਸੀ।
ਸਤੰਬਰ 2017 ਵਿਚ ਤਾਮਿਲਨਾਡੂ ਵਿਚ ਸਾਰੇਗਾਮਾਪਾ ਤਾਮਿਲ ਦੇ ਆਡੀਸ਼ਨ ਹੋਏ ਸਨ, ਜਿਸ ਵਿਚ ਜਸਕਰਨ ਦੀ 105 ਭਾਗ ਲੈਣ ਵਾਲਿਆਂ ਵਿਚ ਚੋਣ ਹੋਈ ਸੀ। ਫਿਰ ਮੈਗਾ ਐਡੀਸ਼ਨ ਕਲੀਅਰ ਕਰਦੇ ਹੋਏ ਟਾਪ 25 ਵਿਚ ਪਹੁੰਚਿਆ। ਅਪਣੀ ਬਿਤਹਰੀਨ ਗਾਇਕੀ ਨਾਲ 12 ਰਾਊਂਡ ਕਲੀਅਰ ਕਰਦੇ ਹੋਏ ਜਸਕਰਨ ਟਾਪ 5 ਵਿਚ ਵੀ ਪਹੁੰਚ ਗਿਆ। ਉਸ ਦਾ ਕਹਿਣਾ ਹੈ ਕਿ ਉਸ ਨੇ ਯੂ-ਟਿਊਬ ਤੋਂ ਇਸ ਦੀ ਪ੍ਰੈਕਟਿਸ ਕੀਤੀ ਸੀ। ਚੰਡੀਗੜ੍ਹ ਰੋਡ ਸਥਿਤ ਸੈਕਟਰ-32 ਦਾ ਰਹਿਣ ਵਾਲਾ ਜਸਕਰਨ ਨਾਰਥ ਇੰਡੀਆ ਦਾ ਪਹਿਲਾ ਅਜਿਹਾ ਸਿੱਖ ਗਾÎਇਕ ਬਣ ਗਿਆ ਹੈ, ਜਿਸ ਨੇ ਤਾਮਿਲ ਭਾਸ਼ਾ ਵਿਚ ਲਾਈਵ ਗਾਇਆ।

ਖ਼ਾਸ ਗੱਲ ਇਹ ਰਹੀ ਕਿ ਆਡੀਸ਼ਨ ਦੌਰਾਨ ਹੀ ਜਸਕਰਨ ਨੇ ਤਾਮਿਲ ਸਿੱਖੀ ਹੈ ਅਤੇ ਇਸ ਦੀ ਯੂ-ਟਿਊਬ ਤੋਂ ਪ੍ਰੈਕਟਿਸ ਕੀਤੀ ਹੈ। ਪਿਛਲੇ ਮਹੀਨੇ ਸ੍ਰੀਲੰਕਾ ਅਤੇ ਸਿਡਨੀ ਵਿਚ ਜਸਕਰਨ ਤਾਮਿਲ ਵਿਚ ਗਾਇਕੀ ਕਰ ਚੁੱਕਿਆ ਹੈ। ਜਸਕਰਨ ਸ੍ਰੀਲੰਕਾ ਜਾ ਰਿਹਾ ਹੈ, ਜਿਸ ਵਿਚ ਪੰਜ ਅਗੱਸਤ ਅਤੇ 11 ਅਗੱਸਤ ਨੂੰ ਤਾਮਿਲ ਵਿਚ ਹੋਣ ਜਾ ਰਹੇ ਗਾਇਕੀ ਸ਼ੋਅ ਵਿਚ ਹਿੱਸਾ ਲਵੇਗਾ। ਉਹ ਇਸ ਤੋਂ ਪਹਿਲਾਂ ‘ਦਿ ਵਾਇਸ ਆਫ਼ ਇੰਡੀਆ’ ਵਿਚ ਵੀ ਹਿੱਸਾ ਲੈ ਚੁੱਕਿਆ ਹੈ। ਸਾਲ 2016 ਵਿਚ ਆਏ ‘ਦਿ ਵਾਇਸ ਆਫ਼ ਇੰਡੀਆ’ ਸੀਜ਼ਨ-2 ਵਿਚ ਵੀ ਜਸਕਰਨ ਹਿੱਸਾ ਲੈ ਚੁੱਕਿਆ ਹੈ।
ਇਸ ਦੌਰਾਨ ਉਹ ਟਾਪ 40 ਵਿਚ ਜਗ੍ਹਾ ਬਣਾ ਚੁੱਕਿਆ ਸੀ ਅਤੇ ਬੈਟਲ ਰਾਊਂਡ ਵਿਚ ਐਲੀਮੀਨੇਟ ਹੋ ਗਿਆ ਸੀ। ਲੁਧਿਆਣਾ ਦੇ ਚੰਡੀਗੜ੍ਹ ਰੋਡ ਸਥਿਤ ਸੈਕਟਰ-32 ਬੀਸੀਐਮ ਸਕੂਲ ਤੋਂ ਹੁਣ ਜਸਕਰਨ 12ਵੀਂ ਕਰ ਰਿਹਾ ਹੈ।ਤਾਮਿਲ ਵਿਚ ਉਹ ਸ੍ਰੀ ਨਿਵਾਸ ਅਤੇ ਹਰੀਹਰਨ, ਹਿੰਦੀ ਵਿਚ ਰਾਹਤ ਫਤਿਹ ਅਲੀ ਖ਼ਾਨ ਅਤੇ ਅਰਿਜੀਤ ਸਿੰਘ ਅਤੇ ਪੰਜਾਬੀ ਵਿਚ ਦਿਲਜੀਤ ਦੋਸਾਂਝ ਨੂੰ ਗਾਇਕੀ ਵਿਚ ਅਪਣਾ ਆਦਰਸ਼ ਮੰਨਦਾ ਹੈ। ਜਸਕਰਨ ਗਾਇਕੀ ਦੀ ਸਿਖ਼ਲਾਈ ਹਨੀਤ ਤਨੇਜਾ ਤੋਂ ਲੈ ਰਿਹਾ ਹੈ। ਪਿਤਾ ਬਲਵੀਰ ਸਿੰਘ ਦਾ ਹੌਜ਼ਰੀ ਦਾ ਕਾਰੋਬਾਰ ਹੈ ਜਦਕਿ ਮਾਤਾ ਸਰਬਜੀਤ ਕੌਰ ਘਰੇਲੂ ਹਨ।