ਟੋਰਾਂਟੋ/ਕੋਲੰਬੋ – ਸ਼੍ਰੀਲੰਕਾ ਸਰਕਾਰ ਦਾ ਆਖਣਾ ਹੈ ਕਿ ਰਾਜਾ ਰਾਵਣ ਦੁਨੀਆ ਦੇ ਪਹਿਲੇ ਜਹਾਜ਼ ਚਾਲਕ (ਪਾਇਲਟ) ਸਨ ਅਤੇ ਉਨ੍ਹਾਂ 5,000 ਸਾਲ ਪਹਿਲਾਂ ਉਡਾਣ ਭਰੀ ਸੀ। ਸ਼੍ਰੀਲੰਕਾ ਦੇ ਸਿਵਲ ਐਵੀਏਸ਼ਨ ਅਥਾਰਟੀ ਨੇ ਹੁਣ ਪ੍ਰਾਚੀਨ ਕਾਲ ‘ਚ ਉਡਾਣ ਭਰਨ ਲਈ ਰਾਵਣ ਵਲੋਂ ਇਸਤੇਮਾਲ ਕੀਤੇ ਜਾਣ ਵਾਲੇ ਤਰੀਕਿਆਂ ਨੂੰ ਸਮਝਣ ਲਈ ਪਹਿਲ ਸ਼ੁਰੂ ਕੀਤੀ ਹੈ।
ਸਿਵਲ ਐਵੀਏਸ਼ਨ ਅਥਾਰਟੀ ਦੇ ਉਪ-ਪ੍ਰਧਾਨ ਸ਼ਸ਼ੀ ਦਾਨਤੁਨਗੇ ਨੇ ਆਖਿਆ ਕਿ ਉਨ੍ਹਾਂ ਕੋਲ ਇਹ ਸਾਬਤ ਕਰਨ ਲਈ ਫੈਕਟ ਹੈ ਕਿ ਰਾਵਣ ਜਹਾਜ਼ ਦਾ ਇਸਤੇਮਾਲ ਕਰਨ ਵਾਲੇ ਅਤੇ ਉਡਾਣ ਭਰਨ ਵਾਲੇ ਪਹਿਲਾਂ ਵਿਅਕਤੀ ਸਨ। ਦਾਨਤੁਨਗੇ ਨੇ ਆਖਿਆ ਕਿ ਰਾਜਾ ਰਾਵਣ ਇਕ ਪ੍ਰਤੀਭਾਸ਼ਾਲੀ ਵਿਅਕਤੀ ਸੀ। ਉਹ ਉਡਾਣ ਭਰਨ ਵਾਲੇ ਅਤੇ ਪਹਿਲੇ ਜਹਾਜ਼-ਚਾਲਕ ਸਨ। ਇਹ ਮਿਥਿਹਾਸਕ ਕਥਾ ਨਹੀਂ ਹੈ, ਇਹ ਇਕ ਤੱਥ ਹੈ। ਇਸ ‘ਤੇ ਇਕ ਸੋਧ ਕੀਤੇ ਜਾਣ ਦੀ ਲੋੜ ਹੈ। ਅਗਲੇ 5 ਸਾਲਾਂ ‘ਚ ਅਸੀਂ ਇਹ ਸਾਬਤ ਕਰਾਂਗੇ।
ਸ਼੍ਰੀਲੰਕਾ ‘ਚ ਹੋਈ ਬੈਠਕ
ਕਾਟੁਨਾਇਕੇ ‘ਚ ਸਿਵਲ ਉਡਾਣ ਮਾਹਿਰਾਂ, ਇਤਿਹਾਸਕਾਰਾਂ, ਵਿਗਿਆਨਕਾਂ ਅਤੇ ਭੂ-ਵਿਗਿਆਨਕਾਂ ਦਾ ਇਕ ਸੰਮੇਲਨ ਆਯੋਜਿਤ ਕੀਤਾ ਗਿਆ ਸੀ, ਜਿੱਥੇ ਬੁੱਧਵਾਰ ਨੂੰ ਸ਼੍ਰੀਲੰਕਾ ਦਾ ਸਭ ਤੋਂ ਵੱਡਾ ਅੰਤਰਰਾਸ਼ਟਰੀ ਹਵਾਈ ਅੱਡਾ ਬੰਦਰਾਨਾਇਕ ਸਥਿਤ ਹੈ। ਸੰਮੇਲਨ ‘ਚ ਸਿੱਟਾ ਕੱਢਿਆ ਗਿਆ ਕਿ ਰਾਵਣ ਨੇ 5,000 ਸਾਲ ਪਹਿਲਾਂ ਸ਼੍ਰੀਲੰਕਾ ਤੋਂ ਅੱਜ ਦੇ ਭਾਰਤ ਲਈ ਉਡਾਣ ਭਰੀ ਸੀ ਅਤੇ ਵਾਪਸ ਆ ਗਏ ਸਨ। ਹਾਲਾਂਕਿ ਕਈ ਲੋਕਾਂ ਨੇ ਇਨਾਂ ਕਹਾਣੀਆਂ ਨੂੰ ਖਾਰਿਜ ਕਰ ਦਿੱਤਾ ਕਿ ਰਾਵਣ ਨੇ ਭਗਵਾਨ ਰਾਮ ਦੀ ਪਤਨੀ ਸੀਤਾ ਨੂੰ ਅਗਵਾਹ ਕੀਤਾ ਸੀ। ਉਨ੍ਹਾਂ ਦਾ ਦਾਅਵਾ ਸੀ ਕਿ ਇਹ ਇਕ ਭਾਰਤੀ ਕਹਾਣੀ ਹੈ ਅਤੇ ਰਾਵਣ ਇਕ ਮਹਾਨ ਰਾਜਾ ਸੀ।
ਪੁਲਾੜ ‘ਚ ਭੇਜਿਆ ‘ਰਾਵਣ’
ਸ਼੍ਰੀਲੰਕਾ ‘ਚ ਪ੍ਰਾਚੀਨ ਲੰਕਾ ਦੇ ਰਾਜੇ ਦੇ ਬਾਰੇ ‘ਚ ਇਨੀਂ ਦਿਨੀਂ ਰੂਚੀ ਹੈ। ਸ਼੍ਰੀਲੰਕਾ ਨੇ ਹਾਲ ਹੀ ‘ਚ ‘ਰਾਵਣ’ ਨਾਂ ਦੇ ਉਪ-ਗ੍ਰਹਿ ਨੂੰ ਪੁਲਾੜ ਦੇ ਮਿਸ਼ਨ ਲਈ ਭੇਜਿਆ ਹੈ। ਸ਼੍ਰੀਲੰਕਾ ਦੇ ਕਈ ਲੋਕ ਮੰਨਦੇ ਹਨ ਕਿ ਰਾਵਣ ਇਕ ਪਰੋਪਕਾਰੀ ਰਾਜਾ ਅਤੇ ਵਿਦਵਾਨ ਸੀ। ਇਥੋਂ ਤੱਕ ਕਿ ਕੁਝ ਭਾਰਤੀ ਧਰਮ ਗ੍ਰੰਥ ਉਨ੍ਹਾਂ ‘ਮਹਾ ਬ੍ਰਾਹਮਣ’ ਦੇ ਰੂਪ ‘ਚ ਦੱਸਦੇ ਹਨ, ਜਿਸ ਦਾ ਅਰਥ ਹੈ ਇਕ ਮਹਾਨ ਬ੍ਰਾਹਮਣ ਜਾਂ ਇਕ ਮਹਾਨ ਵਿਦਵਾਨ।
