ਕੰਗਨਾ ਨੇ ਸੋਨੀਆ ਨੂੰ ਪੁੱਛਿਆ, ਤੁਹਾਨੂੰ ਪੀੜ ਨਹੀਂ ਹੋਈ

ਮੁੰਬਈ : ਆਪਣੇ ਦਫ਼ਤਰ ‘ਚ ਹੋਈ ਭੰਨਤੋੜ ਤੋਂ ਨਾਰਾਜ਼ ਕੰਗਨਾ ਰਣੌਤ ਨੇ ਹੁਣ ਆਪਣੇ ਨਿਸ਼ਾਨੇ ‘ਤੇ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨੂੰ ਲੈ ਲਿਆ ਹੈ। ਉੱਥੇ ਹੀ ਸ਼ਿਵਸੈਨਾ ਖ਼ਿਲਾਫ਼ ਲਗਾਤਾਰ ਮੋਰਚਾ ਖੋਲਿ੍ਹਆ ਹੋਇਆ ਹੈ। ਉਹ ਟਵਿਟਰ ‘ਤੇ ਲਗਾਤਾਰ ਕੰਗਨਾ ਬਨਾਮ ਊਧਵ ਹੈਸ਼ਟੈਗ ਰਾਹੀਂ ਸ਼ਿਵ ਸੈਨਾ ‘ਤੇ ਹਮਲਾ ਕਰ ਰਹੀ ਹੈ। ਉੱਥੇ ਹੀ ਕੇਂਦਰੀ ਮੰਤਰੀ ਤੇ ਆਰਪੀਆਈ ਪ੍ਰਧਾਨ ਰਾਮਦਾਸ ਅਠਾਵਲੇ ਨੇ ਸ਼ੁੱਕਰਵਾਰ ਨੂੰ ਰਾਜਪਾਲ ਭਗਤ ਸਿੰਘ ਕੋਸ਼ਿਆਰੀ ਨਾਲ ਮੁਲਾਕਾਤ ਕਰਕੇ ਕੰਗਨਾ ਨੂੰ ਮੁਆਵਜ਼ਾ ਦਿੱਤੇ ਜਾਣ ਦੀ ਮੰਗ ਕੀਤੀ। ਸੋਨੀਆ ਗਾਂਧੀ ਦੀ ਚੁੱਪ ‘ਤੇ ਨਿਸ਼ਾਨਾ ਲਾਉਂਦਿਆਂ ਕੰਗਨਾ ਨੇ ਟਵਿਟਰ ‘ਤੇ ਲਿਖਿਆ, ਸਤਿਕਾਰਯੋਗ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਜੀ, ਕੀ ਇਕ ਮਹਿਲਾ ਹੋਣ ਦੇ ਨਾਤੇ ਮਹਾਰਾਸ਼ਟਰ ‘ਚ ਤੁਹਾਡੀ ਸਰਕਾਰ ਵੱਲੋਂ ਮੇਰੇ ਨਾਲ ਕੀਤੇ ਜਾ ਰਹੇ ਸਲੂਕ ‘ਤੇ ਤੁਹਾਨੂੰ ਤਕਲੀਫ਼ ਨਹੀਂ ਹੋਈ? ਕੀ ਤੁਸੀਂ ਆਪਣੀ ਪਾਰਟੀ ਨੂੰ ਕਹਿ ਨਹੀਂ ਸਕਦੇ ਕਿ ਉਹ ਸੰਵਿਧਾਨ ਦੇ ਸਿਧਾਂਤਾਂ ਕਾਇਮ ਰੱਖਣ, ਜਿਹੜੇ ਸਾਨੂੰ ਡਾ. ਅੰਬੇਡਕਰ ਨੇ ਦਿੱਤੇ ਸਨ। ਆਪਣੇ ਅਗਲੇ ਟਵੀਟ ‘ਚ ਉਨ੍ਹਾਂ ਨੇ ਸੋਨੀਆ ਦੀ ਚੁੱਪ ‘ਤੇ ਸਵਾਲ ਉਠਾਉਂਦਿਆਂ ਲਿਖਿਆ, ਤੁਸੀਂ ਪੱਛਮ ‘ਚ ਪਲੇ-ਵਧੇ ਹੋ। ਤੁਸੀਂ ਭਾਰਤ ‘ਚ ਰਹਿੰਦੇ ਹੋ। ਤੁਸੀਂ ਅੌਰਤਾਂ ਦੇ ਸੰਘਰਸ਼ ਤੋਂ ਜਾਣੂ ਹੋ। ਤੁਹਾਡੀ ਚੁੱਪ ਤੇ ਅਣਦੇਖੀ ਨੂੰ ਇਤਿਹਾਸ ਜੱਜ ਕਰੇਗਾ। ਤੁਹਾਡੀ ਆਪਣੀ ਸਰਕਾ ਅੌਰਤਾਂ ‘ਤੇ ਅੱਤਿਆਚਾਰ ਕਰ ਰਹੀ ਹੈ ਤੇ ਕਾਨੂੰਨ ਵਿਵਸਥਾ ਦਾ ਮਜ਼ਾਕ ਬਣਾ ਰਹੀ ਹੈ। ਮੈਨੂੰ ਆਸ ਹੈ ਕਿ ਤੁਸੀਂ ਦਖ਼ਲ ਦਿਓਗੇ।