ਚੀਨੀ ਵਿਗਿਆਨੀਆਂ ਦਾ ਦਾਅਵਾ – ਹਰ ਸਾਲ ਵਾਪਸ ਆ ਸਕਦੈ ਵਾਇਰਸ

ਬਲੂਮਬਰਗ ਨਿਊਜ਼ ਦੇ ਅਨੁਸਾਰ ਚੀਨ ਦੇ ਟਾਪ ਮੈਡੀਕਲ ਰਿਸਰਚ ਇੰਸਟੀਚਿਊਟ ਚਾਈਨੀਜ਼ ਅਕੈਡਮੀ ‘ਚ ਪੈਥੋਜ਼ਨ ਬਾਇਓਲੋਜੀ ਸੰਸਥਾਨ ਦੇ ਡਾਇਰੈਕਟਰ ਜਿਨ ਕਿਊਈ ਨੇ ਕਿਹਾ ਕਿ ਇਹ ਇੱਕ ਮਹਾਂਮਾਰੀ ਹੋ ਸਕਦੀ ਹੈ ਜੋ ਮਨੁੱਖੀ ਸਰੀਰ ‘ਚ ਲੰਮੇ ਸਮੇਂ ਤਕ ਰਹਿੰਦੀ ਹੈ। ਇਹ ਮੌਸਮੀ ਹੋ ਸਕਦੀ ਹੈ, ਜੋ ਸਰੀਰ ਦੇ ਅੰਦਰ ਮੌਜੂਦ ਰਹਿੰਦੀ ਹੈ। ਅਮਰੀਕਾ ਦੇ ਨੈਸ਼ਨਲ ਇੰਸਟੀਚਿਊਟ ਆਫ਼ ਐਲਰਜ਼ੀ ਐਂਡ ਇੰਫੈਕਸਿਸ ਡਿਸੀਜ਼ ਦੇ ਡਾਇਰੈਕਟਰ ਐਂਥਨੀ ਫੌਸੀ ਸਮੇਤ ਕਈ ਵਿਗਿਆਨੀਆਂ ਨੇ ਕਿਹਾ ਹੈ ਕਿ ਨਵਾਂ ਕੋਰੋਨਾ ਵਾਇਰਸ ਸਰਦੀਆਂ ਦੇ ਮੌਸਮ ਵਿੱਚ ਸਭ ਤੋਂ ਵੱਧ ਨੁਕਸਾਨਦੇਹ ਹੋਵੇਗਾ।
ਉੱਧਰ ਭਾਰਤ ‘ਚ ਵੀ ਜਨਤਕ ਸਿਹਤ ਮਾਹਿਰਾਂ ਦਾ ਮੰਨਣਾ ਹੈ ਕਿ ਸਾਰਸ-ਕੋਵ-2 ਲੰਮੇ ਸਮੇਂ ਤਕ ਰਹਿਣ ਵਾਲਾ ਹੈ। ਇੰਡੀਅਨ ਇੰਸਟੀਚਿ ਆਫ਼ ਪਬਲਿਕ ਹੈਲਥ (ਗਾਂਧੀਨਗਰ) ਦੇ ਡਾਇਰੈਕਟਰ ਡਾ. ਦਿਲੀਪ ਮਾਵਲੰਕਰ ਨੇ ਕਿਹਾ, “ਵਾਇਰਸ ਦਾ ਸਾਡੇ ਆਸਪਾਸ ਬਣੇ ਰਹਿਣਾ ਪੱਕਾ ਹੈ, ਕਿਉਂਕਿ ਇਸ ਦੇ ਫੈਲਣ ਦੀ ਦਰ ਬਹੁਤ ਜ਼ਿਆਦਾ ਹੈ ਅਤੇ ਜੇਕਰ ਕੁਝ ਲੋਕਾਂ ‘ਚ ਇਹ ਵਾਇਰਸ ਥੋੜਾ ਬਹੁਤ ਵੀ ਹੋਵੇਗਾ ਤਾਂ ਵੀ ਇਹ ਵਾਇਰਸ ਵੱਧ ਲੋਕਾਂ ਨੂੰ ਆਪਣੀ ਲਪੇਟ ‘ਚ ਲੈ ਲਵੇਗਾ। ਲਾਗ ਕਾਰਨ ਫੈਲਣ ਵਾਲੀਆਂ ਬਿਮਾਰੀਆਂ ਨੂੰ ਰੋਕਣਾ ਬਹੁਤ ਮੁਸ਼ਕਲ ਹੈ, ਕਿਉਂਕਿ ਹਰ ਕਿਸੇ ਨੂੰ ਸੁਰੱਖਿਆ ਦੀ ਵਰਤੋਂ ਕਰਨੀ ਪੈਂਦੀ ਹੈ, ਜੋ ਇੰਨੇ ਲੰਮੇ ਸਮੇਂ ਲਈ ਬਣਾਈ ਰੱਖਣਾ ਆਸਾਨ ਨਹੀਂ ਹੈ।
ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ ‘ਚ ਮਹਾਂਮਾਰੀ ਵਿਗਿਆਨ ਅਤੇ ਸੰਚਾਰ ਰੋਗਾਂ ਦੇ ਸਾਬਕਾ ਮੁਖੀ ਡਾ. ਲਲਿਤ ਕਾਂਤ ਦਾ ਕਹਿਣਾ ਹੈ ਕਿ ਇਸ ਦੀ ਉੱਚ ਲਾਗ ਲੱਗਣਾ ਇਸ ਦਾ ਹਿੱਸਾ ਹੈ ਪਰ ਇਹ ਮੌਸਮੀ ਹੋਵੇਗਾ, ਕਿਉਂਕਿ ਇਹ ਉਨ੍ਹਾਂ ਲੋਕਾਂ ਨੂੰ ਸੰਕਰਮਿਤ ਕਰਨਾ ਜਾਰੀ ਰੱਖੇਗਾ, ਜਿਨ੍ਹਾਂ ਕੋਲ ਇਸ ਵਿਰੁੱਧ ਲੜਾਈ ਲਈ ਸਮਰੱਥਾ ਮੌਜੂਦ ਨਹੀਂ ਹੈ। ਇਹ ਵਾਇਰਸ ਕਿਵੇਂ ਵਿਵਹਾਰ ਕਰੇਗਾ,ਇਸ ਦਾ ਅੰਦਾਜਾ ਲਗਾਉਣਾ ਮੁਸ਼ਕਲ ਹੈ ਕਿਉਂਕਿ ਸਾਰੇ ਵਾਇਰਸ ਵੱਖ-ਵੱਖ ਹੁੰਦੇ ਹਨ।