ਮੋਬਾਈਲ ਗੇਮ PUBG ਦੀ ਆਦਤ ਕਾਰਨ ਮੰਗਲਵਾਰ ਨੂੰ ਇਕ ਨੌਜਵਾਨ ਦੀ ਮੌਤ ਹੋ ਗਈ। ਪੁਲਿਸ ਦੀ ਛਾਣਬੀਨ ਚ ਉਕਤ ਨੌਜਵਾਨ ਦੀ ਪਛਾਣ 20 ਸਾਲਾ ਸੌਰਵ ਵਾਸੀ ਗਵਾਲੀਅਰ ਵਜੋਂ ਹੋਈ। ਸੌਰਵ ਚਾਂਦੀ ਦੇ ਗਹਿਣਿਆਂ ਨੂੰ ਪਾਲਿਸ਼ ਕਰਨ ਦਾ ਕੰਮ ਕਰਦਾ ਸੀ। ਰੇਲਵੇ ਪੁਲਿਸ ਨੇ ਲਾਸ਼ ਕਬਜ਼ੇ ਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ।
ਜਾਣਕਾਰੀ ਮੁਤਾਬਕ ਸੌਰਵ ਆਪਣੇ ਗੁਆਂਢੀ ਦੋਸਤ ਸੰਤੋਸ਼ ਨਾਲ ਰੇਲ ਚ ਸਫਰ ਕਰਦਾ ਹੋਇਆ ਆਗਰਾ ਆ ਰਿਹਾ ਸੀ। ਇਸ ਦੌਰਾਨ ਉਹ ਆਪਣੇ ਕੰਨਾਂ ਚ ਹੈੱਡਫ਼ੋਨ ਲਗਾ ਕੇ ਮੋਬਾਈਲ ਚ ਪਬਜੀ ਗੇਮ ਖੇਡਣ ਲੱਗ ਪਿਆ। ਇਸ ਦੌਰਾਨ ਉਸਦਾ ਦੋਸਤ ਸੰਤੋਸ਼ ਵੀ ਬੇਧਿਆਨੀ ਹੋ ਗਿਆ।
ਮੋਬਾਈਲ ਚ ਪਬਜੀ ਗੇਮ ਖੇਡਦੇ-ਖੇਡਦੇ ਸੌਰਵ ਇੰਨਾ ਖੁੱਬ ਗਿਆ ਕਿ ਉਸ ਨੇ ਪਿਆਸ ਲੱਗਣ ਤੇ ਬਿਨਾਂ ਦੇਖੇ ਹੀ ਆਪਣੇ ਬੈਗ ਚ ਰੱਖੀ ਪਾਣੀ ਦੀ ਬੌਤਲ ਦੀ ਥਾਂ ਬੈਗ ਚ ਇਕ ਹੋਰ ਰੱਖੀ ਗਹਿਣਿਆਂ ਨੂੰ ਪਾਲਸ਼ ਕਰਨ ਵਾਲੇ ਕੈਮੀਕਲ ਦੀ ਬੌਤਲ ਪਾਣੀ ਸਮਝ ਕੇ ਪੀ ਲਈ।
ਗਲੇ ਚ ਕੈਮੀਕਲ ਉਤਰਦੇ ਹੀ ਸੌਰਵ ਦੀ ਹਾਲਾਤ ਖਰਾਬ ਹੋ ਗਈ। ਨੇੜੇ ਬੈਠੇ ਲੋਕ ਵੀ ਸੌਰਵ ਦੀ ਵਿਗੜੀ ਹਾਲਤ ਦੇਖ ਕੇ ਘਬਰਾ ਗਏ। ਤੇਜ਼ ਰਫਤਾਰ ਚ ਜਾ ਰਹੀ ਰੇਲ ਚ ਸੌਰਵ ਨੂੰ ਮੌਕੇ ਤੇ ਤੁਰੰਤ ਇਲਾਜ ਨਾ ਮਿਲ ਸਕਣ ਕਾਰਨ ਉਸ ਦੀ ਤੜਪ-ਤੜਪ ਕੇ ਮੌਤ ਹੋ ਗਈ। ਰੇਲ ਆਗਰਾ ਕੈਂਟ ਪੁੱਜੀ ਜਿਸ ਤੋਂ ਬਾਅਦ ਉਸਦੀ ਲਾਸ਼ ਨੂੰ ਰੇਲ ਚੋਂ ਉਤਾਰਿਆ ਗਿਆ।