ਹੁਣ ਭਾਜਪਾ ਵਾਲੇ ਵਿਰੋਧੀ ਮੁੱਖ ਮੰਤਰੀਆਂ ਦੇ ਸਿਰ ਵੱਢਣ ਦਾ ਰੱਖਣ ਲੱਗੇ ਇਨਾਮ
ਮਮਤਾ ਬੈਨਰਜ਼ੀ ਦਾ ਸਿਰ ਵੱਢਣ ਵਾਲੇ ਨੂੰ 11 ਲੱਖ ਇਨਾਮ
ਅਲੀਗੜ (ਏਜੰਸੀਆਂ) ਪੱਛਮੀ ਬੰਗਾਲ ‘ਚ ਭਾਜਪਾ ਦੇ ਇਕ ਨੇਤਾ ਵੱਲੋਂ ਸੂਬੇ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਦੇ ਸਿਰ ‘ਤੇ 11 ਲੱਖ ਰੁਪਏ ਦਾ ਇਨਾਮ ਘੋਸ਼ਿਤ ਕਰਨ ਦਾ ਮਾਮਲਾ ਬੁੱਧਵਾਰ ਨੂੰ ਸੰਸਦ ‘ਚ ਗੂੰਜਿਆ। ਸਰਕਾਰ ਨੇ ਕਿਹਾ ਕਿ ਉਹ ਇਸ ਤਰਾਂ ਦੇ ਬਿਆਨ ਦੀ ਨਿਖੇਧੀ ਕਰਦੀ ਹੈ। ਉਥੇ ਹੀ ਅਲੀਗੜ ਦੇ ਐਸਐਸਪੀ ਰਾਜੇਸ਼ ਕੁਮਾਰ ਪਾਂਡੇ ਨੇ ਦੱਸਿਆ ਕਿ ਮਮਤਾ ਦੇ ਸਿਰ ‘ਤੇ ਇਨਾਮ ਰੱਖਣ ਦੇ ਮੁਲਜ਼ਮ ਭਾਜਪਾ ਯੁਵਾ ਮੋਰਚਾ ਦੇ ਨੇਤਾ ਵਿਰੁੱਧ ਤ੍ਰਿਣਮੂਲ ਦੀ ਸ਼ਿਕਾਇਤ ‘ਤੇ ਕੇਸ ਦਰਜ ਕਰਜ ਲਿਆ ਗਿਆ ਹੈ।
ਲੋਕ ਸਭਾ ‘ਚ ਸਵੇਰੇ ਸਦਨ ਦੀ ਬੈਠਕ ਸ਼ੁਰੂ ਹੋਣ ‘ਤੇ ਤ੍ਰਿਣਮੂਲ ਕਾਂਗਰਸ ਦੇ ਸੌਗਤ ਰਾਏ ਨੇ ਇਹ ਮਾਮਲਾ ਚੁੱਕਿਆ। ਰਾਏ ਨੇ ਕਿਹਾ ਕਿ ਬੀਰਭੂਮ ਜ਼ਿਲੇ ‘ਚ ਭਾਜਪਾ ਕਾਰਜਕਰਤਾਵਾਂ ‘ਤੇ ਪੁਲਿਸ ਨੇ ਲਾਠੀਚਾਰਜ ਕੀਤੀ ਸੀ ਜਿਸ ਮਗਰੋਂ ਭਾਜਪਾ ਦੇ ਇਕ ਨੇਤਾ ਨੇ ਕਿਹਾ ਕਿ ਜਿਹੜਾ ਵੀ ਸੂਬੇ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਦਾ ਸਿਰ ਵੱਢ ਕੇ ਲਿਆਵੇਗਾ ਉਸ ਨੂੰ 11 ਲੱਖ ਰੁਪਏ ਦਾ ਇਨਾਮ ਦਿੱਤਾ ਜਾਵੇਗਾ। ਸੌਗਤ ਰਾਏ ਨੇ ਇਸ ਦੀ ਸਖ਼ਤ ਨਿਖੇਧੀ ਕਰਦਿਆਂ ਕਿਹਾ ਕਿ ਇਕ ਚੁਣੇ ਹੋਏ ਮੁੱਖ ਮੰਤਰੀ ਵਿਰੁੱਧ ਇਸ ਤਰਾਂ ਦਾ ਬਿਆਨ ਦੇਣਾ ਬੇਹੱਦ ਅਣਉਚਿਤ ਹੈ ਜਿਹੜੀ ਸਾਬਕਾ ਕੇਂਦਰੀ ਮੰਤਰੀ ਵੀ ਰਹੀ ਹੈ।
