ਸਰਕਾਰੀ ਐਂਬੂਲੈਂਸ ਤੋਂ ਨਾਂਹ ਹੋਣ ‘ਤੇ ਪਤਨੀ ਦੀ ਲਾਸ਼ ਚੁੱਕ ਕੇ ਦਸ ਕਿਲੋਮੀਟਰ ਤਕ ਚਲਿਆ ਦਲਿਤ ਆਦਿਵਾਸੀ

ਭਵਾਨੀਪਟਨਾ (ਉੜੀਸਾ): ਕਰੋੜਾਂ ਦੀਆਂ ਸਰਕਾਰੀ ਯੋਜਨਾਵਾਂ ਉਸ ਸਮੇਂ ਧਰੀਆਂ-ਧਰਾਈਆਂ ਰਹਿ ਗਈਆਂ ਜਦੋਂ ਇਕ ਆਦਿਵਾਸੀ ਅਪਣੀ ਪਤਨੀ ਦੀ ਲਾਸ਼ ਮੋਢੇ ‘ਤੇ ਚੁੱਕ ਕੇ ਦਸ ਕਿਲੋਮੀਟਰ ਤਕ ਚਲਦਾ ਰਿਹਾ, ਕਿਉਂਕਿ ਭਵਾਨੀਪਟਨਾ ਦੇ ਸਰਕਾਰੀ ਹਸਪਤਾਲ ਨੇ ਉਸ ਨੂੰ ਐਂਬੂਲੈਂਸ ਦੇਣ ਤੋਂ ਇਨਕਾਰ ਕਰ ਦਿਤਾ। ਇਸ ਸਮੇਂ ਉਸ ਦੀ 12 ਸਾਲਾ ਲੜਕੀ ਵੀ ਨਾਲ ਸੀ। ਉੜੀਸਾ ਦੇ ਸ਼ਹਿਰੀ ਵਿਕਾਸ ਮੰਤਰੀ ਪੁਸ਼ਪੇਂਦਰ ਸਿੰਘਦੇਊ ਨੇ ਕਿਹਾ ਕਿ ਕਾਲਾਹਾਂਡੀ ਦੇ ਕੁਲਕੈਟਰ ਨੂੰ ਇਸ ਘਟਨਾ ਦੀ ਜਾਂਚ ਦੇ ਹੁਕਮ ਦੇ ਦਿਤੇ ਹਨ ਕਿ ਉਨ੍ਹਾਂ ਨੂੰ ਐਂਬੂਲੈਂਸ ਕਿਉਂ ਨਹੀਂ ਮੁਹਈਆ ਕਰਵਾਈ ਅਤੇ ਭਪਾਨੀਪਟਨਾ ਦੇ ਸਬ ਕੁਲੈਕਟਰ ਨੂੰ ਛੇਤੀ ਤੋਂ ਛੇਤੀ ਰੀਪੋਰਟ ਦੇਣ ਨੂੰ ਕਿਹਾ ਹੈ।

ਇਹ ਮਾਮਲਾ ਕਲ ਉਸ ਸਮੇਂ ਸਾਹਮਣੇ ਆਇਆ ਸੀ ਜਦੋਂ ਦਾਨਾ ਮਾਝੀ ਅਪਣੀ ਪਤਨੀ ਅਮੰਗ ਦੇਈ ਦੀ ਲਾਸ਼ ਨੂੰ ਅਪਣੀ 12 ਸਾਲਾ ਬੇਟੀ ਨਾਲ ਲੈ ਕੇ ਜਾ ਰਿਹਾ ਸੀ। ਇਸ 42 ਸਾਲਾ ਔਰਤ ਦੀ ਭਾਵਨੀਪਟਨਾ ਦੇ ਜ਼ਿਲ੍ਹਾ ਹਸਪਤਾਲ ਵਿਚ ਟੀ.ਬੀ. ਕਾਰਨ ਮੌਤ ਹੋ ਗਈ ਸੀ। ਮਾਝੀ ਨੇ ਦੋਸ਼ ਲਾਇਆ ਕਿ ਵਾਰ-ਵਾਰ ਮਿੰਨਤਾਂ ਕਰਨ ਦੇ ਬਾਵਜੂਦ ਹਸਪਤਾਲ ਅਧਿਕਾਰੀਆਂ ਵਲੋਂ ਐਂਬੂਲੈਂਸ ਮੁਹਈਆ ਨਾ ਕਰਵਾਉਣ ਤੋਂ ਬਾਅਦ ਉਸ ਨੇ ਲਾਸ਼ ਨੂੰ ਕਪੜੇ ਵਿਚ ਲਪੇਟਿਆ ਅਤੇ ਮੋਢੇ ‘ਤੇ ਰੱਖ ਕੇ ਭਵਾਨੀਪਟਨਾ ਤੋਂ 60 ਕਿਲੋਮੀਟਰ ਦੂਰ ਰਾਮਪੁਰਾ ਬਲਾਕ ਵਿਚ ਪੈਂਦੇ ਅਪਣੇ ਪਿੰਡ ਮੇਲਘਾੜਾ ਵਲ ਚੱਲ ਪਿਆ। ਦਸ ਕਿਲੋਮੀਟਰ ਚੱਲਣ ਤੋਂ ਬਾਅਦ ਜਦੋਂ ਇਹ ਮਾਮਲਾ ਲੋਕਾਂ ਦੇ ਧਿਆਨ ਵਿਚ ਆਇਆ ਤਾਂ ਡੀ.ਸੀ. ਨੂੰ ਕਹਿ ਕੇ ਬਾਕੀ 50 ਕਿਲੋਮੀਟਰ ਸਫ਼ਰ ਲਈ ਐਂਬੂਲੈਂਸ ਮੁਹਈਆ ਕਰਵਾਈ ਗਈ।