ਦਾਵਣਗੇਰੇ (ਕਰਨਾਟਕ)-ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਨੇ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ’ਤੇ ਦੋਸ਼ ਲਾਇਆ ਕਿ ਉਨ੍ਹਾਂ ਹਰ ਸਰਕਾਰੀ ਅਦਾਰੇ ਵਿੱਚ ਆਰਐਸਐਸ ਦੇ ਬੰਦੇ ਬਿਠਾ ਕੇ ਇਨ੍ਹਾਂ ਅਦਾਰਿਆਂ ਦੀ ਕਦਰ ਘਟਾ ਦਿੱਤੀ ਹੈ। ਇੱਥੇ ਸ਼ਹਿਰ ਦੇ ਵਪਾਰੀਆਂ ਨਾਲ ਗੱਲਬਾਤ ਕਰਦਿਆਂ ਰਾਹੁਲ ਗਾਂਧੀ ਨੇ ਕਿਹਾ ਕਿ ਆਰਐਸਐਸ ਦੇ ਬੰਦੇ ਹਰੇਕ ਮੰਤਰਾਲੇ ਨੂੰ ਹਦਾਇਤਾਂ ਦੇ ਰਹੇ ਹਨ। ਜੇ ਅਗਲੀਆਂ ਆਮ ਚੋਣਾਂ ਵਿੱਚ ਕਾਂਗਰਸ ਜਿੱਤ ਕੇ ਸੱਤਾ ਵਿੱਚ ਪਰਤੀ ਤਾਂ ਇਨ੍ਹਾਂ ਸੰਸਥਾਵਾਂ ਨੂੰ ਆਰਐਸਐਸ ਦੇ ਕੰਟਰੋਲ ਤੋਂ ਮੁਕਤ ਕਰਾਇਆ ਜਾਵੇਗਾ।
ਕਾਂਗਰਸ ਆਗੂ ਨੇ ਕਿਹਾ ‘‘ ਮੈਂ ਨਹੀਂ ਜਾਣਦਾ ਕਿ ਤੁਹਾਨੂੰ ਪਤਾ ਹੋਵੇਗਾ ਕਿ ਹਰੇਕ ਮੰਤਰੀ ਦੇ ਦਫ਼ਤਰ ਵਿੱਚ ਆਰਐਸਐਸ ਦਾ ਇਕ ਬੰਦਾ ਬਿਠਾਇਆ ਗਿਆ ਹੈ ਤੇ ਉਹ ਹੁਕਮ ਚਾੜ੍ਹ ਰਿਹਾ ਹੈ। ਇਸ ਕਰ ਕੇ ਤੁਸੀਂ … ਸਿਵਾਇ ਸੰਸਥਾਵਾਂ ਦੀ ਕਦਰ ਘਟਾਈ ਦੇ ਕੀ ਉਮੀਦ ਕਰ ਸਕਦੇ ਹੋ। ਇਸ ਢੰਗ ਨਾਲ ਦੇਸ਼ ਦਾ ਬੈਂਕਿੰਗ ਸਿਸਟਮ ਤਹਿਸ ਨਹਿਸ ਕੀਤਾ ਗਿਆ ਹੈ।’’
‘‘ਨੀਰਵ ਮੋਦੀ ਤੇ ਮੇਹੁਲ ਚੋਕਸੀ ਜਿਹੇ ਲੋਕ ਕੌਣ ਹਨ? ਜਦੋਂ ਤੁਸੀਂ ਆਰਬੀਆਈ ਜਿਹੀਆਂ ਵਿੱਤੀ ਸੰਸਥਾਵਾਂ ਦੀ ਕਦਰ ਕਰਨਾ ਛੱਡ ਦਿਓ ਤਾਂ ਇਹੋ ਜਿਹੇ ਲੋਕ ਪੈਦਾ ਹੋਣ ਲੱਗ ਪੈਂਦੇ ਹਨ। ਹੁਣ ਅਸੀਂ ਪਿਉੂਸ਼ ਗੋਇਲ ਦਾ ਨਾਂ ਸੁਣ ਰਹੇ ਹਾਂ।’’ ਸ੍ਰੀ ਗਾਂਧੀ ਨੇ ਕੱਲ੍ਹ ਦੋਸ਼ ਲਾਇਆ ਸੀ ਕਿ ਕੇਂਦਰੀ ਮੰਤਰੀ ਪਿਊਸ਼ ਗੋਇਲ ਜਿਸ ਕੰਪਨੀ ਦੇ ਪ੍ਰਮੋਟਰ ਰਹੇ ਸਨ ਉਹ 650 ਕਰੋੜ ਰੁਪਏ ਦੀ ਡਿਫਾਲਟਰ ਹੋ ਗਈ ਹੈ।
ਉਨ੍ਹਾਂ ਕਿਹਾ ਕਿ ਆਰਬੀਆਈ ਦੇ ਸਾਬਕਾ ਗਵਰਨਰ ਰਘੂਰਾਮ ਰਾਜਨ ਨੇ ਨੋਟਬੰਦੀ ਖਿਲਾਫ਼ ਸਲਾਹ ਦਿੱਤੀ ਸੀ। ਉਨ੍ਹਾਂ ਦੋਸ਼ ਲਾਇਆ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਨੋਟਬੰਦੀ ਦੀ ਯੋਜਨਾ ਬਾਰੇ ਵਿੱਤ ਮੰਤਰੀ ਤੇ ਸਮੁੱਚੀ ਕੈਬਨਿਟ ਨੂੰ ਹਨੇਰੇ ’ਚ ਰੱਖਿਆ ਗਿਆ ਸੀ। ਸ੍ਰੀ ਗਾਂਧੀ ਟੁਮਕੁਰ ਸਥਿਤ ਸਿੱਧਾਗੰਗਾ ਸਥਿਤ ਮੱਠ ਵਿੱਚ ਵੀ ਗਏ ਤੇ ਮੱਠ ਦੇ ਮੁਖੀ ਸ਼ਿਵਕੁਮਾਰਾ ਸਵਾਮੀ ਤੋਂ ਆਸ਼ੀਰਵਾਦ ਲਿਆ।