ਟੋਰਾਂਟੋ, ਕੈਨੇਡਾ ਵਿਚ 151ਵਾਂ ‘ਕੈਨੇਡਾ ਡੇਅ’ ਮਨਾਇਆ ਜਾ ਰਿਹਾ ਹੈ। ਸਾਰੇ ਪਾਸੇ ਮੇਲਿਆਂ ਵਰਗਾ ਮਾਹੌਲ ਹੈ, ਕੈਨੇਡੀਅਨ ਇਸ ਵਿਚ ਹੁੰਮਹੁਮਾ ਕੇ ਭਾਗ ਲੈ ਰਹੇ ਹਨ। ਵੱਖ-ਵੱਖ ਭਾਈਚਾਰਿਆਂ ਤੇ ਕੈਨੇਡੀਅਨ ਨਾਗਰਿਕਾਂ ਵੱਲੋਂ ਦੁਨੀਆ ਦੇ ਸਭ ਤੋਂ ਸੋਹਣੇ ਮਲਟੀਕਲਚਰ ਵਾਲੇ ਇਸ ਦੇਸ਼ ‘ਚ ਵੱਖ-ਵੱਖ ਢੰਗਾਂ ਨਾਲ ਯੋਗਦਾਨ ਪਾਇਆ ਜਾ ਰਿਹਾ ਹੈ। ਇਸ ਖੁਸ਼ੀ ਦੇ ਮੌਕੇ ਭਾਰਤੀ ਮੂਲ ਦੇ ਕੈਨੇਡੀਅਨ ਪੰਜਾਬੀ ਕਲਾਕਾਰ ਬਲਜਿੰਦਰ ਸੇਖਾ ਨੇ ਦੇਸ਼ ਨੂੰ ‘ਕੈਨੇਡਾ ਡੇਅ’ ਮੌਕੇ ਯਾਦਗਾਰੀ ਟਿਕਟ ਦਾ ਡਿਜ਼ਾਇਨ ਆਪਣੇ ਵਲੋਂ ਭੇਟ ਕੀਤਾ ਹੈ। ਕੈਨੇਡਾ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਕਿਸੇ ਪੰਜਾਬੀ ਮੂਲ ਦੇ ਕੈਨੇਡੀਅਨ ਨੇ ਅਸਲੀ ਦੇਸ਼ ਪਿਆਰ ਦਾ ਨਿਵੇਕਲਾ ਤੋਹਫਾ ਭੇਟ ਕੀਤਾ ਹੈ। ਕੈਨੇਡਾ ਦੇ ਸਾਇੰਸ, ਖੋਜ ਤੇ ਇਕਨੋਮਿਕ ਡਿਵੈਲਪਮੈਂਟ ਫੈਡਰਲ ਮੰਤਰੀ ਨਵਦੀਪ ਸਿੰਘ ਬੈਂਸ ਨੇ ਕੈਨੇਡਾ ਸਰਕਾਰ ਵਲੋਂ ਡਾਕ ਟਿਕਟ ਦਾ ਯਾਦਗਾਰੀ ਚਿੱਤਰ ਪ੍ਰਾਪਤ ਕੀਤਾ।
ਇਸ ਮੌਕੇ ਮੈਂਬਰ ਪਾਰਲੀਮੈਂਟ ਕਮਲ ਖਹਿਰਾ ਅਤੇ ਰੂਬੀ ਸਹੋਤਾ ਆਦਿ ਨੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ। ਸਾਡੇ ਨਾਲ ਗੱਲਬਾਤ ਕਰਦੇ ਇਸ ਯਾਦਗਾਰੀ ਟਿਕਟ ਦੇ ਰਚੇਤਾ ਬਲਜਿੰਦਰ ਸੇਖਾ ਨੇ ਦੱਸਿਆ ਕਿ ਇਸ ਪ੍ਰਾਜੈਕਟ ‘ਤੇ ਉਨ੍ਹਾਂ ਨੇ ਤਕਰੀਬਨ 3 ਮਹੀਨੇ ਖੋਜ ਕੀਤੀ। ਇਸ ਡਿਜ਼ਾਇਨ ਵਿਚ ਕੈਨੇਡਾ ਦੀ ਪਾਰਲੀਮੈਂਟ ਦੇ ਸਾਹਮਣੇ ਕੈਨੇਡੀਅਨ ਖੁਸ਼ੀ ਵਿਚ ਨੱਚ ਰਹੇ ਹਨ।
ਕੈਨੇਡਾ ਦਾ ਮਾਣਮੱਤਾ ਰਾਸ਼ਟਰੀ ਝੰਡਾ ਲਹਿਰਾ ਰਹੇ ਸ਼੍ਰੀ ਸੇਖਾ ਦੀ ਤਸਵੀਰ ਉੱਪਰ ਟੀ ਸ਼ਰਟ ਅਤੇ ਹੇਠ ‘ਗੋ ਕੈਨੇਡਾ’ ਲਿਖਿਆ ਹੋਇਆ ਹੈ ਜਿਹੜਾ ਦੇਸ਼ ਨੂੰ ਦੁਨੀਆ ਵਿਚ ਤਰੱਕੀ ਵੱਲ ਹੋਰ ਵਧਣ ਲਈ ਪ੍ਰੇਰ ਰਿਹਾ ਹੈ। ਸੇਖਾ ਨੇ ਕਿਹਾ ਕਿ ਉਨ੍ਹਾਂ ਵਲੋਂ ਡਿਜ਼ਾਇਨ ਕੀਤੀ ਟਿਕਟ ਨਾਲ ਉਹ ਪਹਿਲੀ ਚਿੱਠੀ ਆਪਣੇ ਜੱਦੀ ਪਿੰਡ ਸੇਖਾਂ ਕਲਾਂ (ਪੰਜਾਬ) ਦੇ ਵਸਨੀਕਾਂ ਨੂੰ ਪਾਉਣਗੇ।